വാഷിംഗ്ടൺ: കൊച്ചുമകൾ കൈ ട്രംപിനൊപ്പമുള്ള ഗോൾഫ് കളിക്ക് ഇടയിൽ തന്‍റെ ഏറ്റവും വലിയ സ്വപ്നം വെളിപ്പെടുത്തി യുഎസ് പ്രസിഡന്റ് ഡോണൾഡ് ട്രംപ്. ഗോൾഫിനോടുള്ള താൽപര്യത്തിന് പേരുകേട്ട ട്രംപ്, കൈ ട്രംപിന്‍റെ പുതിയ യൂട്യൂബ് സീരീസായ ‘വൺ ഓൺ വൺ വിത്ത് കൈ’യുടെ ഭാഗമായാണ് ഒമ്പത് ഹോളുള്ള ഗോൾഫ് മത്സരത്തിൽ പങ്കെടുത്തത്. കളിക്കിടെ, ഇനിയും പൂർത്തിയാക്കാൻ ബാക്കിയുള്ള സ്വപ്നങ്ങൾ എന്തെങ്കിലുമുണ്ടോ എന്ന് കൈ മുത്തശ്ശനോട് ചോദിച്ചു. ഇതിന് ട്രംപ് മറുപടി നൽകുകയും ചെയ്തു.
“നീ എന്നോട് ടിവിയിലെന്ന പോലെ ചോദ്യങ്ങൾ ചോദിക്കുകയാണല്ലോ! പ്രസിഡന്‍റാകുക, അതൊരു സ്വപ്നമാണ്. എന്നാൽ ഇപ്പോൾ, നീ ആഗ്രഹിക്കുന്നത് പോലെ ഒരു മികച്ച പ്രസിഡന്‍റാകാനാണ്,” ട്രംപ് പ്രതികരിച്ചു. “നിങ്ങൾ വളരെ മികച്ച രീതിയിൽ ജോലി ചെയ്യുന്നുണ്ട്,” എന്ന് കൈ മുത്തശ്ശന് മറുപടി നൽകി. ഡോണൾഡ് ട്രംപ് ജൂനിയറിന്‍റെയും മുൻ ഭാര്യ വനേസ ട്രംപിന്‍റെയും മകളാണ് കൈ ട്രംപ്. യുഎസ് പ്രസിഡന്‍റിന്‍റെ മൂത്ത കൊച്ചുമകളാണ് കൈ.
ഗോൾഫ് കളിയുടെ ചിത്രങ്ങൾ പങ്കുവെച്ചുകൊണ്ട് കൈ തന്‍റെ എക്സ് അക്കൗണ്ടിൽ ഇങ്ങനെ കുറിച്ചു: “എന്റെ പുതിയ സീരീസ് ആരംഭിക്കുന്നതിനായി മുത്തശ്ശനോടൊപ്പം ഷൂട്ട് ചെയ്തത് അതിശയകരമായ അനുഭവമായിരുന്നു. ഈ വീഡിയോയിൽ ഞങ്ങൾ തമ്മിലുള്ള ബന്ധം, പ്രത്യേകിച്ച് ഗോൾഫ് കോഴ്സിലെ ഞങ്ങളുടെ അടുപ്പം, എല്ലാവർക്കും കാണാൻ കഴിയും. ഞാൻ ഇതുവരെ ചിത്രീകരിച്ചതിൽ വെച്ച് ഏറ്റവും പ്രിയപ്പെട്ട വീഡിയോ ഇതാണ്, എനിക്ക് ഒരുപാട് അർത്ഥമുണ്ട് ഇതിന്. നിങ്ങൾ ഈ പ്രത്യേക വീഡിയോ ആസ്വദിക്കുമെന്ന് പ്രതീക്ഷിക്കുന്നു.”
“ആളുകൾ അദ്ദേഹത്തെ ഒരു വ്യവസായി എന്ന നിലയിലോ രാഷ്ട്രീയക്കാരനെന്ന നിലയിലോ അറിയുന്നുണ്ടാവാം. എന്നാൽ എനിക്ക്, അദ്ദേഹം എന്റെ മുത്തശ്ശൻ മാത്രമാണ്. ഞങ്ങൾ വർഷങ്ങളായി ഒരുമിച്ച് ഗോൾഫ് കളിക്കുന്നു,” കൈ പറഞ്ഞു. “അദ്ദേഹം എപ്പോഴും ഇഷ്ടപ്പെട്ടിരുന്ന ഒന്നാണിത്, ഞങ്ങൾക്ക് ഒരുമിച്ച് സമയം ചെലവഴിക്കാനുള്ള ഒരു മാർഗമായി ഇത് മാറി. ഗോൾഫ് കോഴ്സിൽ അദ്ദേഹത്തോടൊപ്പമുള്ള വർഷങ്ങളിലൂടെ ഗോൾഫിനെക്കുറിച്ച് മാത്രമല്ല, ജീവിതത്തെക്കുറിച്ചും ഞാൻ ഒരുപാട് കാര്യങ്ങൾ പഠിച്ചു.” – കൈ കൂട്ടിച്ചേർത്തു.
