വാഷിങ്ടൺ: അമേരിക്കൻ പ്രസിഡന്റ് ഡോണൾഡ് ട്രംപിന്റെ ജനസമ്മിതി അളക്കുന്ന പുതിയ എൻബിസി ന്യൂസ്/സർവേ മങ്കി പോൾ റിപ്പോർട്ട് പുറത്ത്.
അദ്ദേഹത്തിന്റെ അംഗീകാര റേറ്റിംഗ് വളരെ താഴ്ന്ന നിലയിൽ തുടരുന്നു. രാജ്യത്തെ വോട്ടർമാരുടെ മുഖ്യ ആശങ്കയായി സമ്പദ്വ്യവസ്ഥ മാറിയെന്ന കണ്ടെത്തലും ട്രംപിന് കനത്ത വെല്ലുവിളിയാണ് ഉയർത്തുന്നത്. മൊത്തത്തിൽ, 42% പേർ ട്രംപിനെ പിന്തുണയ്ക്കുമ്പോൾ, 58% പേർക്കും അതൃപ്തിയാണ് രേഖപ്പെടുത്തിയത്. നിലവിലുള്ള മറ്റ് പ്രമുഖ സർവേകളിലെ ഫലങ്ങളുമായി ഇത് ഏറെക്കുറെ യോജിച്ചു പോകുന്നു.
എല്ലാ അമേരിക്കക്കാർക്കിടയിലും, ട്രംപിനെ ശക്തമായി പിന്തുണയ്ക്കുന്നവരുടെ എണ്ണം 21% ആയി കുറഞ്ഞു. രണ്ടാം തവണ അധികാരമേറ്റെടുത്ത് നൂറു ദിവസം പിന്നിട്ടപ്പോൾ ഇത് 26% ആയിരുന്നു. റിപ്പബ്ലിക്കൻ പാർട്ടിയെക്കാൾ ‘മാഗ’ പ്രസ്ഥാനത്തെ പിന്തുണയ്ക്കുന്നവരിൽ പോലും ട്രംപിനുള്ള കടുത്ത പിന്തുണയിൽ വലിയ ഇടിവുണ്ടായി. ഏപ്രിലിൽ 78% പേർ ട്രംപിനെ ശക്തമായി പിന്തുണച്ചിരുന്ന സ്ഥാനത്ത്, പുതിയ സർവേയിൽ ഇത് 70% ആയി കുറഞ്ഞു. പാർട്ടിയുമായി കൂടുതൽ ചേർന്ന് നിൽക്കുന്ന റിപ്പബ്ലിക്കൻമാരുടെ ശക്തമായ പിന്തുണയാകട്ടെ 35% മാത്രമാണ്.
റിപ്പബ്ലിക്കൻ പാർട്ടിയിൽ, തങ്ങൾ പ്രധാനമായും ‘മാഗ’ പ്രസ്ഥാനത്തിന്റെ ഭാഗമാണെന്ന് കരുതുന്നവരുടെ എണ്ണത്തിലും നിർണായകമായ കുറവ് രേഖപ്പെടുത്തി. ഏപ്രിലിൽ 57% പേർ ഇങ്ങനെ അഭിപ്രായപ്പെട്ടിരുന്നെങ്കിൽ, ഇപ്പോൾ അത് 50% ആയി ചുരുങ്ങി. ഈ കണക്ക് ട്രംപിന്റെ സ്വാധീനം പാർട്ടിയിൽ മങ്ങുന്നു എന്നതിന്റെ സൂചനയാണ്. അമേരിക്കക്കാർക്ക് നിലവിൽ ഏറ്റവും പ്രധാനപ്പെട്ട വിഷയമായി 27% പേർ സമ്പദ്വ്യവസ്ഥയെ തിരഞ്ഞെടുത്തു. ജനാധിപത്യത്തിനുള്ള ഭീഷണി 23% പേർ മുഖ്യവിഷയമായി കണക്കാക്കുന്നു. ആരോഗ്യ സംരക്ഷണം 17% പിന്തുണയോടെ മൂന്നാം സ്ഥാനത്താണ്. ജീവിതച്ചെലവ് വർധിക്കുന്നതിലുള്ള അതിരൂക്ഷമായ ആശങ്കയാണ് ഈ മാറ്റത്തിന് പിന്നിലെ പ്രേരകശക്തി. നവംബർ 20 മുതൽ ഡിസംബർ 8 വരെ, രാജ്യവ്യാപകമായി 20,252 വോട്ടർമാർക്കിടയിലാണ് എൻബിസി ന്യൂസ്/സർവേ മങ്കി ഓൺലൈൻ പോൾ നടത്തിയത്.
