വാഷിംഗ്ടണ്‍ : ഫിലിപ്പീന്‍സില്‍ ഒറ്റരാത്രികൊണ്ട് വീശിയടിച്ച ഫങ്-വോങ് ചുഴലിക്കാറ്റില്‍ രണ്ടുമരണം. വടക്കന്‍ ഫിലിപ്പീന്‍സിലാണ് ചുഴലിക്കാറ്റ് ദുരിതം വിതയ്ക്കുന്നത്. രാത്രി മുഴുവനുണ്ടായ ശക്തമായ കാറ്റിലും കനത്ത മഴയിലും വിവിധ ഇടങ്ങളില്‍ നിരവധി നാശനഷ്ടങ്ങള്‍ ഉണ്ടായി. കറ്റാന്‍ഡുവന്‍സിലെ കിഴക്കന്‍ പ്രവിശ്യയില്‍ ഉണ്ടായ വെള്ളപ്പൊക്കത്തിലാണ് ഒരാള്‍ മരിച്ചത്. കിഴക്കന്‍ സമര്‍ പ്രവിശ്യയിലെ കാറ്റ്ബലോഗന്‍ നഗരത്തില്‍ വീട് തകര്‍ന്നുവീണാണ് രണ്ടാമത്തെ മരണം സംഭവിച്ചത്.
ചൊവ്വാഴ്ച ഫിലിപ്പീന്‍സിലെ മധ്യ പ്രവിശ്യകളില്‍ കുറഞ്ഞത് 224 പേരുടെ മരണത്തിനിടയാക്കിയ കല്‍മേഗി ചുഴലിക്കാറ്റ് സൃഷ്ടിച്ച നാശനഷ്ടങ്ങളില്‍ നിന്നും രാജ്യം കരകയറുന്നതിനിടെയാണ് പുതിയ ചുഴലിക്കാറ്റ് എത്തിയത്.
അടിയന്തര സാഹചര്യം കണക്കിലെടുത്ത് 14 ലക്ഷത്തിലധികം ആളുകളെ മാറ്റിപ്പാര്‍പ്പിച്ചിട്ടുണ്ട്. കനത്തമഴ കുറഞ്ഞത് 132 വടക്കന്‍ ഗ്രാമങ്ങളെയെങ്കിലും വെള്ളത്തിലാഴ്ത്തിയിട്ടുണ്ട്. ഏകദേശം 1,000 വീടുകള്‍ക്ക് കേടുപാടുകള്‍ സംഭവിച്ചിട്ടുണ്ട്.
ഞായറാഴ്ച മുതല്‍ 400ലധികം വിമാനങ്ങള്‍ റദ്ദാക്കിയതായി സിവില്‍ ഏവിയേഷന്‍ റെഗുലേറ്റര്‍ അറിയിച്ചു. ഈ വര്‍ഷം ഫിലിപ്പീന്‍സില്‍ ആഞ്ഞടിച്ച 21ാമത്തെ കൊടുങ്കാറ്റാണ് ഫങ്-വോങ്.
Typhoon Fung-Wong wreaks havoc in the Philippines; Two dead, 1.4 million evacuated.
