കീവ്: റഷ്യയുമായുള്ള സമാധാന ഉടമ്പടി അന്തിമമാക്കുന്നതിനായി യുക്രൈൻ പ്രസിഡന്‍റ് വോളോഡിമിർ സെലെൻസ്കി അടുത്ത ദിവസങ്ങളിൽ യുഎസ് സന്ദർശിക്കുമെന്ന് യുക്രൈൻ ഉന്നത ഉദ്യോഗസ്ഥൻ അറിയിച്ചു. യുഎസ് പ്രസിഡന്‍റ് ഡോണൾഡ് ട്രംപുമായി കൂടിക്കാഴ്ച നടത്തി കരാർ പൂർത്തിയാക്കുകയാണ് ലക്ഷ്യം. “ജനീവയിൽ ചർച്ച ചെയ്ത കരാറിലെ പ്രധാന നിബന്ധനകളെക്കുറിച്ച് ഞങ്ങളുടെ പ്രതിനിധി സംഘങ്ങൾ ഒരു പൊതുധാരണയിലെത്തിയിരിക്കുന്നു,” യുക്രൈന്‍റെ ദേശീയ സുരക്ഷാ മേധാവി റുസ്തം ഉമറോവ് സോഷ്യൽ മീഡിയയിൽ കുറിച്ചു.
“ഞങ്ങളുടെ തുടർന്നുള്ള നടപടികൾക്ക് യൂറോപ്യൻ പങ്കാളികളുടെ പിന്തുണ ഞങ്ങൾ പ്രതീക്ഷിക്കുന്നു. അവസാന നടപടികൾ പൂർത്തിയാക്കാനും പ്രസിഡന്‍റ് ട്രംപുമായി കരാർ ഉറപ്പിക്കാനുമായി നവംബറിൽ ഏറ്റവും അനുയോജ്യമായ തീയതിയിൽ യുക്രൈൻ പ്രസിഡന്‍റിന്‍റെ യുഎസ് സന്ദർശനം സംഘടിപ്പിക്കാൻ ഞങ്ങൾ കാത്തിരിക്കുകയാണ്,” ഉമറോവ് കൂട്ടിച്ചേർത്തു. സ്വിറ്റ്സർലൻഡിൽ യുഎസ് ഉദ്യോഗസ്ഥരുമായി നടത്തിയ ചർച്ചകൾ ഫലപ്രദവും ക്രിയാത്മകവും ആയിരുന്നെന്നും, യുദ്ധം അവസാനിപ്പിക്കാനുള്ള ട്രംപിന്‍റെ ഉറച്ച ശ്രമങ്ങളെ യുക്രൈൻ അഭിനന്ദിക്കുന്നെന്നും ഉമറോവ് പറഞ്ഞു.
