ഡൽഹി: പുതിയ ഇറക്കുമതി തീരുവകൾ യുഎസിലെ സാധാരണക്കാർക്ക് വലിയ സാമ്പത്തിക പ്രയാസമുണ്ടാക്കുമെന്ന് എസ്.ബി.ഐ.യുടെ ഗവേഷണ റിപ്പോർട്ട്. ഈ തീരുവകൾ മൂലം ഉണ്ടാകുന്ന പണപ്പെരുപ്പം കാരണം, ഒരു കുടുംബത്തിന് ശരാശരി 2,400 യു.എസ്. ഡോളറിൻ്റെ അധിക സാമ്പത്തിക ബാധ്യത ഉണ്ടാകാൻ സാധ്യതയുണ്ടെന്നാണ് റിപ്പോർട്ടിലെ പ്രധാന കണ്ടെത്തൽ.
എന്നാൽ, ഈ സാമ്പത്തിക ബാധ്യത എല്ലാ കുടുംബങ്ങളിലും ഒരുപോലെയായിരിക്കില്ല. താഴ്ന്ന വരുമാനക്കാരായ കുടുംബങ്ങൾക്ക് ഏകദേശം 1,300 ഡോളറിന്റെ നഷ്ടം നേരിടേണ്ടി വരും. ഇത് സമ്പന്നരായ കുടുംബങ്ങളെ അപേക്ഷിച്ച് മൂന്നിരട്ടിയിലധികം ആനുപാതിക ഭാരം സൃഷ്ടിക്കുമെന്നും റിപ്പോർട്ട് പറയുന്നു. അതേസമയം, ഉയർന്ന വരുമാനമുള്ള കുടുംബങ്ങൾക്ക് 5,000 ഡോളർ വരെ നഷ്ടം സംഭവിച്ചാലും അവരുടെ സാമ്പത്തിക ഭദ്രതയെ കാര്യമായി ബാധിക്കില്ല.
പുതിയ വ്യാപാര യുദ്ധം ഇന്ത്യയേക്കാൾ കൂടുതൽ അമേരിക്കൻ സമ്പദ്‌വ്യവസ്ഥയെയാണ് ദോഷകരമായി ബാധിക്കാൻ സാധ്യതയെന്നും റിപ്പോർട്ടിൽ പറയുന്നു. നിലവിൽ ദുർബലമായ ഡോളർ, ഉയർന്ന പണപ്പെരുപ്പം, കൂടാതെ ഈ തീരുവകൾ കാരണം വില വർധിക്കാനുള്ള സാധ്യത എന്നിവയാണ് ഇതിന് കാരണങ്ങളായി എസ്.ബി.ഐ. ചൂണ്ടിക്കാട്ടുന്നത്.
