വാഷിംഗ്ടണ് : റഷ്യന് എണ്ണ കമ്പനികള്ക്ക് മേല് ഉപരോധം ഏര്പ്പെടുത്തി യുഎസ്.
പ്രസിഡന്റ് വ്ളാഡിമിര് പുടിന് യുക്രെയ്ന് സമാധാന ചര്ച്ചകളില് ‘സത്യസന്ധത പുലര്ത്തിയില്ലെന്ന് നിഗമനത്തിലെത്തിയതിന് ശേഷമാണ് റഷ്യയിലെ ഏറ്റവും വലിയ രണ്ട് എണ്ണ കമ്പനികള്ക്ക് മേല് പ്രസിഡന്റ് ഡോണള്ഡ് ട്രംപ് വലിയ ഉപരോധങ്ങള് ഏര്പ്പെടുത്തിയതെന്ന് യുഎസ് ട്രഷറി മേധാവി പറഞ്ഞു. റോസ്നെഫ്റ്റിനും ലുക്കോയിലിനുമെതിരായാണ് ഉപരോധങ്ങള് പ്രഖ്യാപിച്ചിരിക്കുന്നത്.
ബുഡാപെസ്റ്റില് നടക്കാനിരുന്ന ട്രംപ്-പുടിന് ഉച്ചകോടി മാറ്റിവച്ചതിന് ഒരു ദിവസത്തിന് ശേഷമാണ് ഉപരോധങ്ങള് വരുന്നത്. റഷ്യ-യുക്രെയ്ന് വെടിനിര്ത്തല് ചര്ച്ചകളില് പുരോഗതിയില്ലാത്തതില് യുഎസ് വൃത്തങ്ങള് കടുത്ത നിരാശ പ്രകടിപ്പിച്ചു. ഔദ്യോഗിക പ്രഖ്യാപനത്തിന് മുമ്പ് ഫോക്സ് ബിസിനസിനോട് സംസാരിച്ച യുഎസ് ട്രഷറി സെക്രട്ടറി സ്കോട്ട് ബെസെന്റ്, ഈ നീക്കം ‘റഷ്യന് ഫെഡറേഷനെതിരെ ഞങ്ങള് നടത്തിയ ഏറ്റവും വലിയ ഉപരോധങ്ങളില് ഒന്നാണ്’ എന്നും പറഞ്ഞു.
‘ഈ അര്ത്ഥശൂന്യമായ യുദ്ധം അവസാനിപ്പിക്കാന് പ്രസിഡന്റ് പുടിന് വിസമ്മതിച്ചതിനാല്, റഷ്യയുടെ യുദ്ധ യന്ത്രത്തിന് ധനസഹായം നല്കുന്ന റഷ്യയിലെ ഏറ്റവും വലിയ രണ്ട് എണ്ണ കമ്പനികള്ക്ക് ട്രഷറി അനുമതി നിഷേധിക്കുന്നു,’ – ബെസെന്റ് പ്രസ്താവനയില് പറഞ്ഞു. അതേസമയം, യുദ്ധം അവസാനിപ്പിക്കാനുള്ള ട്രംപിന്റെ ശ്രമങ്ങളെ പിന്തുണയ്ക്കുന്നതിന് ആവശ്യമെങ്കില് കൂടുതല് നടപടിയെടുക്കാനും ട്രഷറി തയ്യാറാണെന്ന മുന്നറിയിപ്പും അദ്ദേഹം നല്കി.
US imposes new sanctions on Russian oil companies.
