വാഷിംഗ്ടൺ: അമേരിക്കയിൽ പണപ്പെരുപ്പം വീണ്ടും ശക്തിപ്പെട്ടു. താരിഫുകൾ ഉൾപ്പെടെയുള്ള വില വർദ്ധനവുകൾ കാരണം ജൂണിൽ നാല് മാസത്തെ ഏറ്റവും ഉയർന്ന നിലയിലേക്ക് പണപ്പെരുപ്പം എത്തി. ബ്യൂറോ ഓഫ് ലേബർ സ്റ്റാറ്റിസ്റ്റിക്സ് ചൊവ്വാഴ്ച പുറത്തുവിട്ട ഏറ്റവും പുതിയ കൺസ്യൂമർ പ്രൈസ് ഇൻഡക്സ് (സിപിഐ) ഡാറ്റ അനുസരിച്ച്, കഴിഞ്ഞ മാസം ഉപഭോക്തൃ വിലകൾ 0.3 ശതമാനം വർദ്ധിച്ചു. ഇതോടെ വാർഷിക പണപ്പെരുപ്പ നിരക്ക് 2.7 ശതമാനം ആയി ഉയർന്നു. ഇത് ഫെബ്രുവരിക്ക് ശേഷമുള്ള ഏറ്റവും ഉയർന്ന നിരക്കാണ്.
സാമ്പത്തിക വിദഗ്ധർ പ്രതീക്ഷിച്ചതിന് സമാനമായ കണക്കുകളാണ് ചൊവ്വാഴ്ച പുറത്തുവന്നത്. അഞ്ച് മാസത്തിനിടെ ആദ്യമായി ഗ്യാസ് വില വർധിക്കുകയും, പ്രധാന സേവന, ഉൽപ്പന്ന വിഭാഗങ്ങളിൽ വില കൂടുകയും ചെയ്തു. പെട്രോൾ, ഭക്ഷ്യവസ്തുക്കൾ എന്നിവയുടെ വിലയിലെ വലിയ വ്യതിയാനങ്ങൾ ഒഴിവാക്കിയുള്ള കോർ സിപിഐ മെയ് മാസത്തെ അപേക്ഷിച്ച് 0.2 ശതമാനം വർദ്ധിച്ചു. ജൂൺ മാസം അവസാനിച്ച 12 മാസങ്ങളിൽ ഇത് 2.9 ശതമാനം ഉയർന്നു. ഇത് മുൻ മാസത്തെ 0.1 ശതമാനം, 2.8 ശതമാനം എന്നീ നിരക്കുകളിൽ നിന്ന് വർദ്ധനവ് രേഖപ്പെടുത്തി.
ഈ റിപ്പോർട്ടിന് ശേഷം ഓഹരി വിപണികൾ ഉയർന്നപ്പോൾ, ഓപ്പണിംഗ് ബെല്ലിൽ ഡൗ ജോൺസ് നേരിയ തോതിൽ ഉയർന്നു. എസ്&പി 500 0.4 ശതമാനം നേട്ടമുണ്ടാക്കിയപ്പോൾ നാസ്ഡാക് കോമ്പോസിറ്റ് 0.8 ശതമാനം വർദ്ധിച്ചു. അടുത്തിടെയായി, പ്രസിഡന്‍റ് ഡോണൾഡ് ട്രംപ് അമേരിക്കയിലേക്ക് വരുന്ന മിക്ക ഉൽപ്പന്നങ്ങൾക്കും കനത്ത താരിഫ് ഏർപ്പെടുത്തുന്ന ഒരു വ്യാപാര നയം നടപ്പിലാക്കിയിട്ടുണ്ട്. താരിഫുകളുടെ വലിയ വ്യാപ്തിയും അവ നടപ്പിലാക്കുന്നതിലെ അനിശ്ചിതത്വവും വിപണികളെ ഇളക്കിമറിക്കുകയും, വിലകൾ എത്രത്തോളം ഉയരുമെന്നതിനെക്കുറിച്ച് ബിസിനസുകൾക്കും ഉപഭോക്താക്കൾക്കും ഇടയിൽ വലിയ അനിശ്ചിതത്വങ്ങൾ സൃഷ്ടിക്കുകയും ചെയ്തിട്ടുണ്ട്.
