വാഷിംഗ്ടൺ: ട്രംപ് ഭരണകൂടം മാസങ്ങളായി തുടരുന്നതും വ്യാപകമായി നിയമവിരുദ്ധമെന്ന് വിമർശിക്കപ്പെടുന്നതുമായ കടലിലെ മയക്കുമരുന്ന് കടത്തുകാരെ ലക്ഷ്യമിട്ടുള്ള വേട്ട ശനിയാഴ്ചയും തുടർന്നു. ഏറ്റവും പുതിയ ആക്രമണം കരീബിയൻ കടലിൽ വെച്ച് നടന്നതായും മൂന്ന് പേർ കൊല്ലപ്പെട്ടതായും പ്രതിരോധ സെക്രട്ടറി പീറ്റ് ഹെഗ്‌സെത്ത് സ്ഥിരീകരിച്ചു. പ്രസിഡന്‍റ് ട്രംപിന്‍റെ നിർദ്ദേശപ്രകാരം, പ്രതിരോധ വകുപ്പ് കരീബിയൻ കടലിൽ മയക്കുമരുന്ന് കടത്ത് കപ്പലിന് നേരെ വിനാശകരമായ ആക്രമണം നടത്തിയെന്ന് അദ്ദേഹം വ്യക്തമാക്കി.
ഈ ഓപ്പറേഷനിൽ നാർക്കോ-തീവ്രവാദികൾ എന്ന് അദ്ദേഹം വിശേഷിപ്പിച്ച മൂന്ന് പേർ കൊല്ലപ്പെട്ടു. ആക്രമണം അന്താരാഷ്ട്ര സമുദ്ര അതിർത്തിയിലാണ് നടത്തിയതെന്നും യുഎസ് സേനാംഗങ്ങൾക്ക് ആർക്കും പരിക്കില്ലെന്നും അദ്ദേഹം അറിയിച്ചു. മയക്കുമരുന്ന് കടത്തുകാരെ ലക്ഷ്യമിട്ടുള്ള ഈ സൈനിക നടപടികളുടെ നിയമപരമായ ന്യായീകരണങ്ങളെക്കുറിച്ച് കോൺഗ്രസിലെ ഡെമോക്രാറ്റുകൾ ഉൾപ്പെടെയുള്ളവർ ശക്തമായ വിമർശനം ഉന്നയിക്കുന്നതിനിടയിലാണ് ട്രംപ് ഭരണകൂടം ആക്രമണങ്ങൾ തുടരുന്നത്.
