വാഷിംഗ്ടണ്‍: ശതകോടീശ്വരന്‍ ഇലോണ്‍ മസ്ക് പുതിയ രാഷ്ട്രീയ പാര്‍ട്ടി പ്രഖ്യാപിച്ചതിൽ പരിഹസിച്ച് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. കഴിഞ്ഞ അഞ്ച് ആഴ്ച്ചയിലേറെയായി ഇലോണ്‍ മസ്ക് സമനില നഷ്ടമായതുപോലെയാണ് പെരുമാറുന്നത്. അതില്‍ താന്‍ അതീവ ദുഃഖിതനാണ്. അമേരിക്കയില്‍ ഒരു മൂന്നാം രാഷ്ട്രീയ പാര്‍ട്ടി ആരംഭിക്കാന്‍ വരെ അദ്ദേഹം ആഗ്രഹിക്കുന്നു. പാർട്ടി ഒന്നും അവര്‍ക്കു പറഞ്ഞിട്ടുളളതല്ല. സാധാരണയായി അവര്‍ ചെയ്യുന്നത് തടസങ്ങളും കുഴപ്പങ്ങളും സൃഷ്ടിക്കുക എന്നതാണെന്നും തീവ്ര ഇടതുപക്ഷ ഡെമോക്രാറ്റുകളില്‍ നിന്ന് അത് ആവശ്യത്തിന് ലഭിക്കുന്നുണ്ടെന്നും ട്രംപ് പറഞ്ഞു.
അതേസമയം അമേരിക്കയുടെ ചരിത്രത്തിലെ തന്നെ ഏറ്റവും പ്രധാനപ്പെട്ട ഒരു ബില്‍ അടുത്തിടെ പാസാക്കി. മികച്ച ബില്ലാണെങ്കിലും ഇലോണ്‍ മസ്‌കിന് അത് ഇഷ്ടപ്പെടില്ല. കാരണം അത് ഇലക്ട്രിക് വെഹിക്കിള്‍ മാന്‍ഡേറ്റ് (ഇവി) നീക്കം ചെയ്യുന്നതാണ്. ഇനി ഇലക്ട്രിക് വാഹനങ്ങള്‍ വാങ്ങാന്‍ ആരുടെ മേലും നിര്‍ബന്ധമുണ്ടാകില്ല. ആളുകള്‍ക്ക് ഗ്യാസ് ഉപയോഗിച്ച് പ്രവര്‍ത്തിക്കുന്ന കാറുകളും ഹൈബ്രിഡുകളും തുടങ്ങി ഇഷ്ടമുളളതെന്തും തിരഞ്ഞെടുക്കാനുളള സ്വാതന്ത്ര്യമുണ്ടെന്നും ഞാന്‍ പ്രഥമ പരിഗണന നല്‍കുന്നത് അമേരിക്കയിലെ ജനങ്ങള്‍ക്കാണെന്നും ട്രംപ് ട്രൂത്ത് സോഷ്യലില്‍ കുറിച്ചു.
കഴിഞ്ഞ ദിവസമാണ് അമേരിക്കന്‍ പ്രസിഡന്റ് ഡോണള്‍ഡ് ട്രംപുമായുളള ഭിന്നത രൂക്ഷമായതിനു പിന്നാലെയാണ് മസ്ക് പുതിയ രാഷ്ട്രീയ പാര്‍ട്ടി പ്രഖ്യാപനം നടത്തിയത്. ‘അമേരിക്ക പാര്‍ട്ടി’ എന്ന പേരിലാണ് പുതിയ രാഷ്ട്രീയ പാര്‍ട്ടി പ്രഖ്യാപിച്ചത്. എക്‌സിലൂടെ പ്രഖ്യാപിച്ച പുതിയ പാർട്ടിയെ കുറിച്ച് മസ്ക് , ഇന്ന് നിങ്ങളുടെ സ്വാതന്ത്ര്യം തിരികെ നല്‍കുന്നതിനായാണ് അമേരിക്ക പാര്‍ട്ടി രൂപീകരിച്ചിരിക്കുന്നത്’-എന്നാണ് പോസ്റ്റിൽ കുറിച്ചത്.
