വാഷിങ്ടന്‍ : ദോഹയില്‍ ഹമാസ് നേതാക്കളെ ലക്ഷ്യമിട്ട് ഇസ്രയേല്‍ നടത്തിയ അപ്രതീക്ഷിത ആക്രമണത്തില്‍ അമര്‍ഷം പരസ്യമാക്കിയ ഖത്തറിനെ അനുനയിപ്പിക്കാന്‍ യുഎസ് നീക്കം. ചൊവ്വാഴ്ച ഖത്തറില്‍ സംഭവിച്ചതുപോലെയുള്ള ആക്രമണങ്ങള്‍ ഇനി ഇസ്രയേലിന്റെ ഭാഗത്തുനിന്ന് ഉണ്ടാവില്ലെന്ന് പ്രസിഡന്റ് ഡോണള്‍ഡ് ട്രംപ് ഉറപ്പുനല്‍കി. യുഎസ് സന്ദര്‍ശനത്തിനെത്തിയ ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുല്‍റ ഹ്‌മാന്‍ അല്‍താനി വൈറ്റ് ഹൗസില്‍ യുഎസ് ഉന്നത നേതാക്കളുമായി കൂടിക്കാഴ്ച നടത്തി. വൈസ് പ്രസിഡന്റ് ജെ.ഡി. വാന്‍സുമായും സ്റ്റേറ്റ് സെക്രട്ടറി മാര്‍ക്കോ റൂബിയോയുമായും അല്‍താനി സംസാരിച്ചു.
ഖത്തര്‍ പ്രധാനമന്ത്രിക്ക് ട്രംപ് അത്താഴവിരുന്ന് നല്‍കുമെന്ന് വൈറ്റ് ഹൗസ് വക്താവ് വെളിപ്പെടുത്തി. യുഎസ് പ്രത്യേക പ്രതിനിധി സ്റ്റീവ് വിറ്റ്‌കോഫും പങ്കെടുക്കും.
ഖത്തറില്‍ ആക്രമണം നടത്തി ഹമാസിന്റെ രാഷ്ട്രീയ നേതാക്കളെ വധിക്കാനാണ് ചൊവ്വാഴ്ച ഇസ്രയേല്‍ ശ്രമിച്ചത്. എന്നാല്‍ ലക്ഷ്യം നിറവേറ്റാന്‍ ഇസ്രയേലിനായില്ല. ഇസ്രായേല്‍ ആക്രമണങ്ങളില്‍ യുഎസ് പ്രസിഡന്റ് കടുത്ത അതൃപ്തി രേഖപ്പെടുത്തിയിരുന്നു. യുഎസ് നീക്കങ്ങളുടെ ഭാഗമായി സ്റ്റേറ്റ് സെക്രട്ടറി മാര്‍ക്കോ റൂബിയോ ഉടന്‍ ഇസ്രയേല്‍ സന്ദര്‍ശിക്കുമെന്നും റിപ്പോര്‍ട്ടുകളുണ്ട്.
