വാഷിംഗ്ടൺ: ട്രംപ് ഭരണകൂടം ഏർപ്പെടുത്തിയ താരിഫുകൾക്ക് കോടതിയിൽ തിരിച്ചടി നേരിട്ടതിന് പിന്നാലെ രൂക്ഷമായ പ്രതികരണവുമായി പ്രസിഡന്റ് ഡോണൾഡ് ട്രംപ് രംഗത്തെത്തി. താരിഫുകളില്ലെങ്കിൽ രാജ്യം പൂർണ്ണമായും നശിക്കുമെന്നും സൈനിക ശക്തി ഉടൻ ഇല്ലാതാവുമെന്നും ട്രംപ് മുന്നറിയിപ്പ് നൽകി. ഒരു ഫെഡറൽ അപ്പീൽ കോടതി ട്രംപ് ഭരണകൂടം ഏർപ്പെടുത്തിയ താരിഫുകളിൽ ഭൂരിഭാഗവും അധികാര പരിധി ലംഘിച്ചതാണെന്ന് വിധിച്ചിരുന്നു.
ഈ വിധിയെ ട്രംപ് ട്രൂത്ത് സോഷ്യൽ എന്ന സോഷ്യൽ മീഡിയ പ്ലാറ്റ്ഫോമിൽ വിമർശിച്ചു. 7-4 എന്ന ഭൂരിപക്ഷത്തിൽ വിധി പുറപ്പെടുവിച്ച “റാഡിക്കൽ ലെഫ്റ്റ് ജഡ്ജിമാരുടെ” കൂട്ടത്തെയാണ് അദ്ദേഹം ലക്ഷ്യമിട്ടത്. എന്നാൽ ഒരു ഡെമോക്രാറ്റായ, ഒബാമ നിയമിച്ച ജഡ്ജി രാജ്യത്തെ രക്ഷിക്കാൻ ധീരമായി വോട്ട് ചെയ്തതിന് നന്ദി അറിയിക്കുകയും ചെയ്തു.
താരിഫുകളില്ലെങ്കിൽ, നമ്മൾ ഇതിനകം നേടിയ കോടിക്കണക്കിന് ഡോളറുകൾ ഇല്ലെങ്കിൽ, നമ്മുടെ രാജ്യം പൂർണ്ണമായും നശിക്കും. നമ്മുടെ സൈനിക ശക്തി തൽക്ഷണം ഇല്ലാതാകുമെന്ന് ട്രംപ് എഴുതി. “7-നും 4-നും എതിരെ ഒരു കൂട്ടം റാഡിക്കൽ ലെഫ്റ്റ് ജഡ്ജിമാർക്ക് ഇത് പ്രശ്നമായിരുന്നില്ല. എന്നാൽ ഒബാമ നിയമിച്ച ഒരു ഡെമോക്രാറ്റ്, നമ്മുടെ രാജ്യത്തെ രക്ഷിക്കാൻ വോട്ട് ചെയ്തു. അദ്ദേഹത്തിന്റെ ധൈര്യത്തിന് ഞാൻ നന്ദി പറയുന്നു! അദ്ദേഹം യുഎസ്എയെ സ്നേഹിക്കുകയും ബഹുമാനിക്കുകയും ചെയ്യുന്നു,” ട്രംപ് കൂട്ടിച്ചേർത്തു.
