ന്യൂയോർക്ക്: വൈറ്റ് ഹൗസിൽ പ്രസിഡന്‍റ് ഡോണൾഡ് ട്രംപുമായി നടത്തിയ കൂടിക്കാഴ്ചയ്ക്കിടെ താൻ കണ്ട ഏറ്റവും വിചിത്രമായ കാര്യം വെളിപ്പെടുത്തി ന്യൂയോർക്ക് സിറ്റി മേയർ-ഇലക്‌ട് സൊഹ്റാൻ മംദാനി. ഡെമോക്രാറ്റിക് സോഷ്യലിസ്റ്റായ മംദാനി, ട്രംപിന്‍റെ വായനാ സാമഗ്രികൾക്കിടയിൽ ഒരു യുഎഫ്‌സി (UFC – അൾട്ടിമേറ്റ് ഫൈറ്റിംഗ് ചാമ്പ്യൻഷിപ്പ്) കോഫി ടേബിൾ ബുക്ക് കണ്ടുവെന്നും, വൈറ്റ് ഹൗസിന്‍റെ സൗത്ത് ലോണിൽ മിക്സഡ് മാർഷ്യൽ ആർട്സ് (എംഎംഎ) ഇവന്‍റ് നടത്താൻ തീരുമാനിച്ചതിനെക്കുറിച്ച് തനിക്ക് ഒരു അറിവുമില്ലായിരുന്നു എന്നും വെബ് അധിഷ്ഠിത പരിപാടിയായ ദി ആദം ഫ്രീഡ്‌ലാൻഡ് ഷോയിൽ സംസാരിക്കവെ അദ്ദേഹം വെളിപ്പെടുത്തി.
“ഞാൻ ഇരുന്നു, മീറ്റിംഗ് സമയം കാത്തിരിക്കുകയായിരുന്നു. എന്‍റെ മുന്നിൽ പലതരം കോഫി-ടേബിൾ ബുക്കുകൾ വെച്ചിട്ടുണ്ടായിരുന്നു. അതിലൊന്ന് ‘യുഎഫ്‌സി അറ്റ് ദി വൈറ്റ് ഹൗസ്’ എന്നതായിരുന്നു. എനിക്കതിനെക്കുറിച്ച് ഒരു വിവരവും ഉണ്ടായിരുന്നില്ല, ഞാൻ അത് മറിച്ചു നോക്കുകയായിരുന്നു.” – മാംദാനി പറഞ്ഞു. ബുക്കിൽ ആളുകൾ പരസ്പരം പോരടിക്കുന്ന ചിത്രങ്ങളുണ്ടോ എന്ന് ചോദിച്ചപ്പോൾ, സൗത്ത് ലോണിൽ യുഎഫ്സിയുടെ ഒക്ടാഗൺ ആകൃതിയിലുള്ള (എട്ട് വശങ്ങളുള്ള) അരീന എങ്ങനെയായിരിക്കും എന്നതിന്‍റെ ദൃശ്യവൽക്കരണം മാത്രമാണ് അതിലുണ്ടായിരുന്നത് എന്ന് മംദാനി പറഞ്ഞു.
ട്രംപിന്‍റെ 80-ാം ജന്മദിനമായ 2026 ജൂൺ 14ന് ലോകമെമ്പാടുമുള്ള യുഎസ്‌എയുടെ 250-ാം വാർഷിക ആഘോഷത്തിന്‍റെ ഭാഗമായി ഈ ഇവന്‍റ് നടത്താനാണ് പദ്ധതിയിടുന്നത്. മംദാനി ഈ പരിപാടിയിൽ പങ്കെടുക്കാൻ ഉദ്ദേശിക്കുന്നുണ്ടോ എന്ന് ചോദിച്ചപ്പോൾ ചിരിച്ചുകൊണ്ട് ഇല്ല എന്നും അദ്ദേഹം മറുപടി നൽകി. വൈറ്റ് ഹൗസിൽ അമേരിക്കൻ പ്രസിഡൻ്റുമായി സൗഹൃദപരമായി കൂടിക്കാഴ്ച നടത്തിയതിന് ദിവസങ്ങൾക്ക് ശേഷവും, താൻ ട്രംപിനെ ഫാസിസ്റ്റ് ആയും “ഏകാധിപതി” ആയും ആണ് കാണുന്നതെന്ന് മംദാനി എൻബിസിയുമായുള്ള മറ്റൊരു അഭിമുഖത്തിൽ ആവർത്തിച്ചു.
