കീവ്: രാജ്യത്തെ യുദ്ധം അവസാനിപ്പിക്കാനുള്ള നിർദ്ദിഷ്ട പദ്ധതിയിൽ യുക്രൈൻ അമേരിക്കയുമായി ചേർന്ന് പ്രവർത്തിക്കുമെന്ന് യുക്രൈൻ പ്രസിഡൻ്റ് വോളോഡിമർ സെലെൻസ്കി. എന്നാൽ, ഏതൊരു പദ്ധതിയും യുക്രൈൻ്റെ സുരക്ഷ ശക്തിപ്പെടുത്തുന്നുണ്ടെന്ന് ഉറപ്പാക്കേണ്ടതിൻ്റെ പ്രാധാന്യം അദ്ദേഹം ഊന്നിപ്പറഞ്ഞു. “ഇപ്പോൾ നമ്മൾ ഒരു നിർണ്ണായക ഘട്ടത്തിലാണ്. റഷ്യയുടെ യുദ്ധം അവസാനിപ്പിക്കാനും യഥാർത്ഥ സുരക്ഷ കൊണ്ടുവരാനും കഴിയുന്ന നടപടികൾ നിർണ്ണയിക്കാൻ ഞങ്ങൾ അമേരിക്കയുമായും യൂറോപ്യൻ പങ്കാളികളുമായും മറ്റ് പലരുമായും ചേർന്ന് പ്രവർത്തിക്കുകയാണ്,” സ്വീഡിഷ് പാർലമെൻ്റ് ഉച്ചകോടിയിൽ വീഡിയോ ലിങ്ക് വഴി സംസാരിക്കവെ അദ്ദേഹം പറഞ്ഞു.
“പങ്കാളികളുമായി, പ്രത്യേകിച്ച് അമേരിക്കയുമായി, ഞങ്ങൾ തുടർന്നും പ്രവർത്തിക്കും. ഞങ്ങളെ ദുർബലപ്പെടുത്താതെ ശക്തിപ്പെടുത്തുന്ന വിട്ടുവീഴ്ചകൾക്കായി ഞങ്ങൾ ശ്രമിക്കും. ആക്രമണത്തെ കണ്ടില്ലെന്ന് നടിച്ച് മുന്നോട്ട് പോകുന്നത് എത്രത്തോളം അപകടകരമാണെന്ന് ഞങ്ങൾ വിശദീകരിക്കും,” അദ്ദേഹം പറഞ്ഞു.
സ്വിറ്റ്സർലൻഡിലെ ജനീവയിൽ നടന്ന ചർച്ചകൾക്കിടയിലും, തടവിലുള്ള യുക്രൈൻ സൈനികരെ പൂർണ്ണമായും വിട്ടയക്കുക, റഷ്യ തട്ടിക്കൊണ്ടുപോയ യുക്രൈൻ കുട്ടികളെ തിരികെ കൊണ്ടുവരിക തുടങ്ങിയ അതീവ പ്രധാനപ്പെട്ട വിഷയങ്ങൾ ചർച്ചയിൽ നിലനിർത്താൻ വാഷിംഗ്ടണിനെ ബോധ്യപ്പെടുത്തുന്നതിൽ യുക്രൈൻ വിജയിച്ചതായി സെലെൻസ്കി കൂട്ടിച്ചേർത്തു. റഷ്യൻ ആസ്തികൾ കണ്ടുകെട്ടുന്നതുമായി ബന്ധപ്പെട്ട് യൂറോപ്യൻ രാജ്യങ്ങൾ തീരുമാനമെടുക്കണമെന്നും യുദ്ധത്തിന് മോസ്കോ പൂർണ്ണമായി പണം നൽകണം എന്നും അദ്ദേഹം ആവശ്യപ്പെട്ടു.
