ചെന്നൈ: സന്ദർശക വിസ (ബി1/ബി2) കാത്തിരിക്കുന്നവർക്ക് ആശ്വാസകരമായ വാർത്തയുമായി കൊൽക്കത്തയിലെ യുഎസ് കോൺസുലേറ്റ്. അമേരിക്കയിൽ നിയമപരമായി താമസിക്കുന്ന മക്കളെ സന്ദർശിക്കാൻ ആഗ്രഹിക്കുന്ന 50 വയസ്സിന് മുകളിലുള്ള മാതാപിതാക്കൾക്കായി പ്രത്യേക ‘പ്രയോറിറ്റി സ്ലോട്ടുകൾ’ അനുവദിക്കുമെന്ന് കോൺസുലേറ്റ് അറിയിച്ചു. “അമേരിക്കൻ ഫസ്റ്റ് ഇൻ ഫാമിലി വാല്യൂസ്” എന്നാണ് ഈ നീക്കത്തെ വിശേഷിപ്പിക്കുന്നത്. വ്യക്തമായ രേഖകളും കൃത്യമായ സന്ദർശന ലക്ഷ്യവുമുള്ള യാത്രക്കാർക്ക് വിസയ്ക്കായുള്ള കാത്തിരിപ്പ് സമയം കുറയ്ക്കാൻ ഇത് സഹായിക്കും.
മാതാപിതാക്കളെ കൂടാതെ, ബിസിനസ് ആവശ്യങ്ങൾക്കായി യാത്ര ചെയ്യുന്നവർക്കും പുതിയ വിസ ഷെഡ്യൂളിംഗ് സംവിധാനത്തിലൂടെ മുൻഗണന ലഭിക്കും. കൊൽക്കത്ത കോൺസുലേറ്റ് നാല് പുതിയ വിഭാഗങ്ങളിലായി വിസ അപേക്ഷകൾ തരംതിരിച്ചിട്ടുണ്ട്:
- ബിസിനസ് പ്രൊഫഷണലുകൾ (നിബന്ധനകൾക്ക് വിധേയമായി)
- മക്കളെ സന്ദർശിക്കാനെത്തുന്ന മാതാപിതാക്കൾ (50 വയസ്സിന് മുകളിൽ)
- ടൂറിസ്റ്റ് വിസ (മുമ്പ് വിസ നിരസിക്കപ്പെടാത്തവർക്ക്)
- വിസ നിരസിക്കപ്പെട്ടവർ (കഴിഞ്ഞ 24 മാസത്തിനുള്ളിൽ നിരസിക്കപ്പെട്ടവർ)
അടുത്തിടെ സന്ദർശക വിസ അപേക്ഷകളിൽ നിരസിക്കപ്പെടുന്നവരുടെ എണ്ണം വർദ്ധിച്ചതായി വിസ വിദഗ്ധർ നിരീക്ഷിക്കുന്നുണ്ട്. അപേക്ഷകർക്ക് ഇന്ത്യയുമായി ശക്തമായ ബന്ധമുണ്ടെന്നും സന്ദർശനത്തിന് ശേഷം അവർ തിരികെ വരുമെന്നും വിസ ഓഫീസർമാർക്ക് ബോധ്യപ്പെടേണ്ടതുണ്ട്. വിസ വിദഗ്ദ്ധൻ പ്രിയേഷ് ശർമയുടെ അഭിപ്രായത്തിൽ, കൊൽക്കത്ത കോൺസുലേറ്റിലെ തിരക്ക് നിയന്ത്രിക്കാനും പുതിയ അപേക്ഷകരെയും വിസ നിരസിക്കപ്പെട്ടവരെയും വേർതിരിക്കാനും പുതിയ തരംതിരിക്കൽ സഹായിക്കുന്നു. നിരസിക്കപ്പെട്ടവർക്കായി പ്രത്യേക കാറ്റഗറി കൊണ്ടുവരുന്നത് വഴി വിസ ഓഫീസർമാർ സവിശേഷമായ ഒരു ഇന്റേണൽ പ്രോട്ടോക്കോൾ പിന്തുടരാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു. അതേസമയം, കൊൽക്കത്തയിൽ നടപ്പിലാക്കിയ ഈ പുതിയ രീതി മറ്റ് കോൺസുലേറ്റുകളിലേക്കും വ്യാപിപ്പിക്കുമോ എന്ന് വ്യക്തമല്ല.
America First in Family Values!
— U.S. Consulate Kolkata (@USAndKolkata) May 7, 2026
Parents 50 years of age and over visiting children residing legally in the U.S. now benefit from priority appointment slots at Consulate Kolkata. We’re helping with shorter wait times for qualified travelers with established ties and verified… pic.twitter.com/MchI2SmyI2
American visa: Priority given to parents above 50 years of age; New decision of Kolkata Consulate
