വാഷിംഗ്ടൺ: വൈറ്റ് ഹൗസ് സമുച്ചയത്തിന്റെ മുഖച്ഛായ മാറ്റാൻ ലക്ഷ്യമിട്ടുള്ള ബൃഹത്തായ ബോൾറൂം പദ്ധതിയുടെ കൂടുതൽ വ്യക്തമായ ചിത്രങ്ങൾ പുറത്തുവന്നു. 89,000 ചതുരശ്ര അടി വിസ്തീർണ്ണത്തിൽ നിർമ്മിക്കുന്ന ഈ വമ്പൻ ഹാൾ നിലവിലെ വൈറ്റ് ഹൗസിന്റെ പ്രധാന കെട്ടിടത്തെക്കാൾ വലുപ്പമുള്ളതായിരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. ഷാലോം ബരാനസ് അസോസിയേറ്റ്സ് തയ്യാറാക്കിയ ഈ രൂപരേഖകൾ ‘നാഷണൽ ക്യാപിറ്റൽ പ്ലാനിംഗ് കമ്മീഷൻ’ വെബ്സൈറ്റിൽ അൽപ്പനേരം പ്രത്യക്ഷപ്പെട്ടെങ്കിലും നിമിഷങ്ങൾക്കുള്ളിൽ അവ നീക്കം ചെയ്തു.
89,000 ചതുരശ്ര അടി വിസ്തീർണ്ണമുള്ള പുതിയ ഈസ്റ്റ് വിംഗ്, നിലവിലെ വെസ്റ്റ് വിംഗിനെക്കാൾ നീളമുള്ളതായിരിക്കും. ഏകദേശം 1,000 പേർക്ക് ഇരിക്കാവുന്ന തരത്തിലാണ് ഇതിന്റെ രൂപകൽപ്പന. 400 മില്യൺ ഡോളർ (ഏകദേശം 3,300 കോടി രൂപ) ചിലവ് പ്രതീക്ഷിക്കുന്ന ഈ പദ്ധതിക്കായി ആപ്പിൾ, ആമസോൺ, ഗൂഗിൾ, മെറ്റാ തുടങ്ങിയ പ്രമുഖ കമ്പനികളും മറ്റ് സ്വകാര്യ ദാതാക്കളുമാണ് പണം നൽകുന്നത്. നികുതിപ്പണം ഇതിനായി ഉപയോഗിക്കില്ലെന്ന് ട്രംപ് വ്യക്തമാക്കിയിട്ടുണ്ട്. ലോകത്തിലെ ഏറ്റവും മികച്ച ബോൾറൂം ആയിരിക്കും ഇതെന്നും ഭാവിയിലെ പ്രസിഡന്റ് സ്ഥാനാരോഹണ ചടങ്ങുകൾ വരെ ഇവിടെ നടത്താമെന്നും ട്രംപ് അവകാശപ്പെടുന്നു.
കഴിഞ്ഞ ഒക്ടോബറിൽ വൈറ്റ് ഹൗസിലെ ചരിത്രപ്രധാനമായ ഈസ്റ്റ് വിംഗ് പൊളിച്ചുനീക്കിയാണ് നിർമ്മാണം ആരംഭിച്ചത്. എന്നാൽ, കോൺഗ്രസിന്റെ മുൻകൂർ അനുമതിയില്ലാതെ ഇത്തരം ഒരു നിർമ്മാണം നടത്താൻ പ്രസിഡന്റിന് അധികാരമില്ലെന്ന് കാണിച്ച് ‘നാഷണൽ ട്രസ്റ്റ് ഫോർ ഹിസ്റ്റോറിക് പ്രിസർവേഷൻ’ കോടതിയെ സമീപിച്ചിട്ടുണ്ട്. കോടതിയിൽ നിന്നുള്ള അന്തിമ വിധി ഈ മാസം തന്നെ ഉണ്ടായേക്കും. ചരിത്രപ്രധാനമായ വൈറ്റ് ഹൗസിന്റെ ഭംഗിയെ ഈ വമ്പൻ കെട്ടിടം നശിപ്പിക്കുമെന്ന് ആർക്കിടെക്റ്റുകളും പരിസ്ഥിതി പ്രവർത്തകരും ആശങ്കപ്പെടുന്നു. എല്ലാ തടസ്സങ്ങളെയും അവഗണിച്ച് നിർമ്മാണം അതിവേഗം മുന്നോട്ട് കൊണ്ടുപോകാനാണ് ട്രംപ് ഭരണകൂടത്തിന്റെ തീരുമാനം. മാർച്ച് 5-ന് ചേരുന്ന പ്ലാനിംഗ് കമ്മീഷൻ യോഗത്തിൽ ഈ പദ്ധതിക്ക് ഔദ്യോഗിക അംഗീകാരം ലഭിക്കുമെന്നാണ് പ്രതീക്ഷിക്കുന്നത്.
