മോണ്ട്ഗോമറി: അലബാമയിൽ സ്റ്റേറ്റ് ട്രൂപ്പർ പിന്തുടരുന്നതിനിടെ നിയന്ത്രണം വിട്ട കാർ മരത്തിലിടിച്ചുണ്ടായ അപകടത്തിൽ നാലുപേർ കൊല്ലപ്പെട്ടു. തെക്കുകിഴക്കൻ അലബാമയിലെ പൈക്ക് കൗണ്ടിയിൽ വെള്ളിയാഴ്ച രാത്രി വൈകിയാണ് അപകടമുണ്ടായത്.
അലബാമ ലോ എൻഫോഴ്സ്മെൻ്റ് ഏജൻസിയുടെ (ALEA) ഹൈവേ പട്രോൾ സംഘത്തിൽ നിന്ന് രക്ഷപ്പെടാൻ ശ്രമിക്കുന്നതിനിടെയാണ് ഇവർ സഞ്ചരിച്ചിരുന്ന 2022 മോഡൽ ഹ്യുണ്ടായ് എലാൻട്ര റോഡരികിലെ മരത്തിലിടിച്ചത്. കാർ ഓടിച്ചിരുന്ന യൂഫോള സ്വദേശി ടൈക്കേവിയസ് ഡി. റസ്സാവു (27), യാത്രക്കാരായ റോബർട്ട് ഡി. ഹാൾ (27), ക്വാമേ റിച്ചാർഡ്സൺ (24), പേരുവിവരങ്ങൾ പുറത്തുവിടാത്ത 17 വയസ്സുകാരൻ എന്നിവരാണ് മരിച്ചത്.
അപകടസമയത്ത് ഡ്രൈവറും രണ്ട് യാത്രക്കാരും സീറ്റ് ബെൽറ്റ് ധരിച്ചിരുന്നില്ലെന്ന് അധികൃതർ വ്യക്തമാക്കി. ഇവർ കാറിൽ നിന്ന് പുറത്തേക്ക് തെറിച്ചുവീണ നിലയിലായിരുന്നു. നാലുപേരും സംഭവസ്ഥലത്ത് വെച്ച് തന്നെ മരണപ്പെട്ടു.
അതേസമയം, എന്ത് കാരണത്താലാണ് പൊലീസ് ഇവരെ പിന്തുടർന്നതെന്ന് ലോ എൻഫോഴ്സ്മെൻ്റ് ഏജൻസി ഇതുവരെ വ്യക്തമാക്കിയിട്ടില്ല. സംഭവത്തിൽ കൂടുതൽ അന്വേഷണം നടന്നുവരികയാണെന്ന് എ.എൽ.ഇ.എ വക്താവ് അമാൻഡ വാസ്ഡൻ അറിയിച്ചു. അപകടത്തിൽ മറ്റ് വാഹനങ്ങളൊന്നും ഉൾപ്പെട്ടിട്ടില്ല.
Car crashes into tree during police chase in Alabama: Four people, including a 17-year-old, die tragically
