വാഷിംഗ്ടൺ: സിഐഎ പുറത്തിറക്കിയ 19 രഹസ്യാന്വേഷണ റിപ്പോർട്ടുകൾ പിൻവലിക്കാനോ അല്ലെങ്കിൽ വലിയ മാറ്റങ്ങൾ വരുത്താനോ ഡയറക്ടർ ജോൺ റാറ്റ്ക്ലിഫ് ഉത്തരവിട്ടു. കഴിഞ്ഞ 10 വർഷത്തിനിടെ പുറത്തിറങ്ങിയ ഈ റിപ്പോർട്ടുകൾ പക്ഷപാതപരമാണെന്നും ഏജൻസിയുടെ നിഷ്പക്ഷമായ പ്രവർത്തന ശൈലിക്ക് നിരക്കാത്തതാണെന്നും കണ്ടെത്തിയതിനെത്തുടർന്നാണ് നടപടി. പിൻവലിച്ചവയിൽ പ്രധാനമായും പശ്ചിമേഷ്യയിലെ എൽജിബിടി പ്രവർത്തകർ, ആഗോളതലത്തിൽ സ്ത്രീകളും തീവ്രവാദവും, കോവിഡ് കാലത്തെ ഗർഭനിരോധന മാർഗ്ഗങ്ങൾ എന്നീ വിഷയങ്ങളെക്കുറിച്ചുള്ള റിപ്പോർട്ടുകൾ ഉൾപ്പെടുന്നു.
ഈ റിപ്പോർട്ടുകൾ വസ്തുനിഷ്ഠമല്ലെന്നും രാഷ്ട്രീയ താൽപ്പര്യങ്ങളാൽ സ്വാധീനിക്കപ്പെട്ടവയാണെന്നും പ്രസിഡൻഷ്യൽ ഇന്റലിജൻസ് അഡ്വൈസറി ബോർഡ് നടത്തിയ അവലോകനത്തിൽ കണ്ടെത്തി. “രഹസ്യാന്വേഷണ മേഖലയിൽ പക്ഷപാതത്തിന് സ്ഥാനമില്ല,” എന്ന് റാറ്റ്ക്ലിഫ് പ്രസ്താവനയിൽ വ്യക്തമാക്കി. പിൻവലിക്കപ്പെട്ട റിപ്പോർട്ടുകളിൽ ഒബാമ, ട്രംപ് (ആദ്യ ടേം), ബൈഡൻ ഭരണകൂടങ്ങളുടെ കാലത്ത് പുറത്തിറങ്ങിയവ ഉൾപ്പെടുന്നു.
സിഐഎയിൽ മുൻപ് നടന്ന പിഴവുകൾ തിരുത്താനുള്ള നീക്കമായാണ് റാറ്റ്ക്ലിഫ് ഇതിനെ കാണുന്നത്. വൈവിധ്യം, തുല്യത തുടങ്ങിയ വിഷയങ്ങളിൽ ശ്രദ്ധ കേന്ദ്രീകരിക്കുന്നതിന് പകരം ഏജൻസിയുടെ അടിസ്ഥാന ദൗത്യങ്ങളിലേക്ക് മടങ്ങാനാണ് അദ്ദേഹത്തിന്റെ നിർദ്ദേശം. ഇതിന്റെ ഭാഗമായി പ്രസിദ്ധമായ ‘സിഐഎ വേൾഡ് ഫാക്ട് ബുക്ക്’ പ്രസിദ്ധീകരിക്കുന്നതും അടുത്തിടെ നിർത്തലാക്കിയിരുന്നു. ഈ നീക്കം ഏജൻസിക്കുള്ളിലെ സ്വതന്ത്രമായ വിശകലനങ്ങളെ ബാധിക്കുമെന്ന് മുൻ ഉദ്യോഗസ്ഥർക്കിടയിൽ വിമർശനമുയരുന്നുണ്ട്. രാഷ്ട്രീയ താൽപ്പര്യങ്ങൾക്കായി രഹസ്യാന്വേഷണ റിപ്പോർട്ടുകളിൽ കൈകടത്തുകയാണെന്ന ആരോപണവും ഡെമോക്രാറ്റുകൾ ഉന്നയിക്കുന്നു.
