ജനീവ/മോസ്കോ: റഷ്യയും യുക്രെയ്നും തമ്മിലുള്ള യുദ്ധം അവസാനിപ്പിക്കുന്നതിനായുള്ള മൂന്നാം ഘട്ട ത്രികക്ഷി ചർച്ചകൾ അടുത്ത ചൊവ്വ, ബുധൻ ദിവസങ്ങളിൽ (ഫെബ്രുവരി 17, 18) സ്വിറ്റ്സർലൻഡിലെ ജനീവയിൽ നടക്കും. അമേരിക്കയുടെ മധ്യസ്ഥതയിൽ നടക്കുന്ന ഈ ചർച്ചയിൽ റഷ്യ, യുക്രെയ്ൻ, യുഎസ് എന്നീ രാജ്യങ്ങളിലെ ഉന്നത പ്രതിനിധികൾ പങ്കെടുക്കുമെന്ന് മോസ്കോയും കീവും സ്ഥിരീകരിച്ചു. അബുദാബിയിൽ നടന്ന കഴിഞ്ഞ രണ്ട് റൗണ്ട് ചർച്ചകൾക്ക് ശേഷമാണ് വേദിയായി ജനീവയെ തിരഞ്ഞെടുത്തത്. അമേരിക്കൻ പ്രസിഡന്റ് ഡോണൾഡ് ട്രംപിന്റെ മധ്യസ്ഥതയിലുള്ള ഈ ചർച്ചകൾ യുദ്ധം അവസാനിപ്പിക്കുന്നതിൽ നിർണ്ണായകമാണെന്ന് വിലയിരുത്തപ്പെടുന്നു.
റഷ്യൻ പ്രതിനിധി സംഘത്തെ പ്രസിഡന്റിന്റെ സഹായിയായ വ്ലാദിമിർ മെഡിൻസ്കി നയിക്കും. നേരത്തെ മിലിട്ടറി ഇന്റലിജൻസ് മേധാവി ഇഗോർ കോസ്റ്റ്യുക്കോവ് ആയിരുന്നു റഷ്യൻ സംഘത്തെ നയിച്ചിരുന്നത്. മെഡിൻസ്കിയുടെ തിരിച്ചുവരവ് റഷ്യൻ നിലപാടുകളിൽ മാറ്റമുണ്ടാക്കുമോ എന്ന് ലോകം ഉറ്റുനോക്കുന്നു. യുക്രെയ്ൻ ദേശീയ സുരക്ഷാ കൗൺസിൽ സെക്രട്ടറി റസ്തം ഉമെറോവ്, സൈനിക രഹസ്യാന്വേഷണ മേധാവി കിറിലോ ബുഡാനോവ് എന്നിവരടങ്ങുന്ന ഉന്നതതല സംഘമാണ് കൈവിനെ പ്രതിനിധീകരിക്കുക.
വെടിനിർത്തൽ നടപ്പിലാക്കുക, യുദ്ധത്തടവുകാരെ കൈമാറുക, ഡോൺബാസ് മേഖലയുടെ ഭാവി തുടങ്ങിയ നിർണ്ണായക വിഷയങ്ങളാകും ചർച്ചയിൽ വരിക. കഴിഞ്ഞ തവണ അബുദാബിയിൽ നടന്ന ചർച്ചയ്ക്ക് തൊട്ടുപിന്നാലെ റഷ്യൻ ഡെപ്യൂട്ടി ഇന്റലിജൻസ് ചീഫ് വ്ലാദിമിർ അലക്സീവിന് നേരെ മോസ്കോയിൽ വധശ്രമം ഉണ്ടായിരുന്നു. ഈ സംഘർഷഭരിതമായ അന്തരീക്ഷത്തിനിടയിലാണ് മൂന്നാം ഘട്ട ചർച്ചകൾക്ക് തുടക്കമാകുന്നത്.
