ഓസ്റ്റിൻ: അടുത്ത ചൊവ്വാഴ്ച നടക്കാനിരിക്കുന്ന യുഎസ് സെനറ്റ് പ്രൈമറി തെരഞ്ഞെടുപ്പിന് മുന്നോടിയായി ടെക്സസിൽ നിന്നുള്ള ആദ്യഘട്ട വോട്ടിംഗ് കണക്കുകൾ പുറത്തുവരുമ്പോൾ ഡെമോക്രാറ്റിക് പാർട്ടിക്ക് അനുകൂലമായ തരംഗം പ്രകടമാകുന്നു. വോട്ടർമാരുടെ പങ്കാളിത്തത്തിൽ ഡെമോക്രാറ്റിക് പാർട്ടി റെക്കോർഡ് കുതിപ്പാണ് രേഖപ്പെടുത്തുന്നത്.
ചൊവ്വാഴ്ച വരെ ഏകദേശം 8.5 ലക്ഷം (850,000) വോട്ടുകളാണ് ഡെമോക്രാറ്റിക് പ്രൈമറിയിൽ രേഖപ്പെടുത്തിയത്. ഇത് 2020-ലെ സമാന സാഹചര്യത്തേക്കാൾ 60% കൂടുതലാണ്. 2022-ലെയും 2024-ലെയും മൊത്തം അഡ്വാൻസ് വോട്ടുകളേക്കാൾ അധികമാണിത്.
ജനസംഖ്യ കൂടുതലുള്ള പ്രധാന കൗണ്ടികളിലെല്ലാം മുൻവർഷങ്ങളിലെ മൊത്തം പോളിംഗിനെ മറികടക്കുന്ന പ്രകടനമാണ് ആദ്യ ദിനങ്ങളിൽ തന്നെ ദൃശ്യമായത്. റിപ്പബ്ലിക്കൻ പക്ഷത്തും വോട്ടർമാരുടെ എണ്ണത്തിൽ വർദ്ധനവുണ്ടായിട്ടുണ്ട്. 2022-നെ അപേക്ഷിച്ച് 15% കൂടുതൽ വോട്ടുകൾ രേഖപ്പെടുത്തിയെങ്കിലും 2024-ലെ കണക്കുകളേക്കാൾ അല്പം പിന്നിലാണ് റിപ്പബ്ലിക്കൻ പാർട്ടി. സാധാരണയായി റിപ്പബ്ലിക്കൻ പാർട്ടിയുടെ ഉരുക്കുകോട്ടയായി അറിയപ്പെടുന്ന ടെക്സസിൽ ഡെമോക്രാറ്റിക് വോട്ടർമാർക്കിടയിലുള്ള ഈ ആവേശം രാഷ്ട്രീയ നിരീക്ഷകർ കൗതുകത്തോടെയാണ് കാണുന്നത്.
ഗർഭച്ഛിദ്രം, തോക്ക് നിയന്ത്രണം തുടങ്ങിയ വിഷയങ്ങളിൽ ഭരണകൂടത്തിന്റെ നിലപാടുകളിൽ പ്രതിഷേധിച്ചുള്ള വോട്ടർമാരുടെ കൂട്ടായ വരവാണിതെന്ന് കരുതപ്പെടുന്നു. ഇതോടൊപ്പം ഇസ്രായേൽ-യുക്രെയ്ൻ യുദ്ധങ്ങളിലെ അമേരിക്കയുടെ നിലപാടും വോട്ടർമാരെ സ്വാധീനിച്ചിട്ടുണ്ട്. തിരഞ്ഞെടുപ്പ് ദിനത്തിന് ഇനിയും ദിവസങ്ങൾ ബാക്കി നിൽക്കെ, ടെക്സസിലെ ജനവിധി ആർക്കൊപ്പം നിൽക്കുമെന്നത് അമേരിക്കൻ രാഷ്ട്രീയത്തിൽ നിർണ്ണായകമാകും.
