വാഷിംഗ്ടൺ: അമേരിക്കൻ ഹോംലാന്റ് സെക്യൂരിറ്റി ഡിപ്പാർട്ട്മെന്റിന് ഫണ്ട് അനുവദിക്കുന്ന കാര്യത്തിൽ ഭരണകൂടവും പ്രതിപക്ഷവും തമ്മിലുള്ള ചർച്ചകൾ പരാജയപ്പെട്ടതോടെ രാജ്യം വീണ്ടും ഭാഗികമായ ഭരണസ്തംഭനത്തിലേക്ക് നീങ്ങുന്നു. വെള്ളിയാഴ്ച രാത്രിയാണ് ഫണ്ട് അനുവദിക്കാനുള്ള സമയപരിധി അവസാനിക്കുന്നത്. ഐ.സി.ഇ ഉദ്യോഗസ്ഥരുടെ അധികാരങ്ങൾ പരിമിതപ്പെടുത്തണമെന്ന ഡെമോക്രാറ്റുകളുടെ ആവശ്യം വൈറ്റ് ഹൗസ് പൂർണ്ണമായും അംഗീകരിക്കാത്തതാണ് പ്രതിസന്ധിക്ക് കാരണം.
നിലവിലെ സാഹചര്യത്തിൽ സെനറ്റിൽ ഇന്ന് നടക്കാനിരിക്കുന്ന വോട്ടെടുപ്പ് പരാജയപ്പെടാനാണ് സാധ്യത. മിനസോട്ടയിലെ കുടിയേറ്റ വിരുദ്ധ നടപടികൾക്കിടെ രണ്ട് അമേരിക്കൻ പൗരന്മാർ കൊല്ലപ്പെട്ടതിനെത്തുടർന്ന്, ഐ.സി.ഇ ഉദ്യോഗസ്ഥർ ബോഡി ക്യാമറകൾ ധരിക്കണമെന്നും സ്കൂളുകൾക്കും ആശുപത്രികൾക്കും സമീപമുള്ള പരിശോധനകൾ ഒഴിവാക്കണമെന്നും ഡെമോക്രാറ്റുകൾ കർശനമായി ആവശ്യപ്പെടുന്നുണ്ട്. എന്നാൽ വൈറ്റ് ഹൗസ് നൽകിയ പുതിയ നിർദ്ദേശങ്ങൾ “അപര്യാപ്തമാണെന്ന്” ഡെമോക്രാറ്റിക് നേതാക്കളായ ചക്ക് ഷുമറും ഹക്കീം ജെഫ്രീസും വ്യക്തമാക്കി.
അതേസമയം, കഴിഞ്ഞ വർഷം ട്രംപ് ഒപ്പിട്ട ‘വൺ ബിഗ് ബ്യൂട്ടിഫുൾ ബിൽ’ വഴി കുടിയേറ്റ നിയന്ത്രണ ഏജൻസികളായ ICE, CBP എന്നിവയ്ക്ക് ആവശ്യമായ ഫണ്ട് നേരത്തെ തന്നെ ലഭ്യമാക്കിയിട്ടുണ്ട്. അതിനാൽ ഭരണസ്തംഭനം ഉണ്ടായാലും കുടിയേറ്റക്കാരെ നാടുകടത്താനുള്ള നടപടികൾ തടസ്സമില്ലാതെ തുടരുമെന്നതാണ് ഈ പ്രതിസന്ധിയുടെ മറ്റൊരു വശം. എങ്കിലും മറ്റ് പ്രധാന സേവനങ്ങളെ ബാധിക്കുന്ന ഈ സ്തംഭനം ഒഴിവാക്കാൻ അവസാന നിമിഷം എന്തെങ്കിലും വിട്ടുവീഴ്ചകൾ ഉണ്ടാകുമോ എന്നാണ് രാജ്യം ഉറ്റുനോക്കുന്നത്.
