വാഷിംഗ്ടൺ: ബോയിംഗ് 737 മാക്സ് വിമാനങ്ങളുടെ സോഫ്റ്റ്വെയറിലുണ്ടായ പുതിയ തകരാറിനെക്കുറിച്ച് യുഎസ് ഫെഡറൽ ഏവിയേഷൻ അഡ്മിനിസ്ട്രേഷൻ അന്വേഷണം ആരംഭിച്ചു. ലാൻഡിംഗ് ശ്രമം ഉപേക്ഷിച്ച് വിമാനം വീണ്ടും ഉയർന്നുപൊങ്ങുന്ന ‘ഗോ-എറൗണ്ട്’ ഘട്ടത്തിൽ സ്വയംപ്രേരിത നാവിഗേഷൻ സംവിധാനം പ്രവർത്തനം നിർത്താൻ ഈ തകരാർ കാരണമാകുമെന്നാണ് കണ്ടെത്തിയിരിക്കുന്നത്.
ഓട്ടോ പൈലറ്റ് സംവിധാനത്തിലായിരിക്കുമ്പോൾ പ്രീ-പ്രോഗ്രാം ചെയ്ത ഫ്ലൈറ്റ് പ്ലാനിൽ പൈലറ്റുമാർ മാറ്റങ്ങൾ വരുത്തുമ്പോഴാണ് ഈ തകരാർ സംഭവിക്കുന്നത്. വിമാനത്തിന്റെ നിശ്ചിത ഉയരം സ്വയം നിയന്ത്രിക്കുന്ന ‘വെർട്ടിക്കൽ നാവിഗേഷൻ സിസ്റ്റം’ പ്രവർത്തനരഹിതമാകുകയും വിമാനം മുൻഗണന കുറഞ്ഞ സാങ്കേതിക നിയന്ത്രണ സംവിധാനത്തിലേക്ക് മാറുകയും ചെയ്യും. ലാൻഡിംഗ് വേളയിൽ ഉയർന്ന ജോലിഭാരം നേരിടുന്ന പൈലറ്റുമാർക്ക് ഈ തകരാർ കൂടുതൽ വെല്ലുവിളിയും ശ്രദ്ധാതിരിവും സൃഷ്ടിക്കുമെന്ന് വ്യോമയാന വിദഗ്ധർ ആശങ്ക പ്രകടിപ്പിക്കുന്നു.
അതേസമയം, പ്രശ്നത്തെക്കുറിച്ച് എല്ലാ 737 മാക്സ് വിമാന സർവ്വീസ് ദാതാക്കൾക്കും മുന്നറിയിപ്പ് നൽകിയിട്ടുണ്ടെന്ന് ബോയിംഗ് വക്താവ് അറിയിച്ചു. ഇത്തരം സാഹചര്യങ്ങൾ സുരക്ഷിതമായി കൈകാര്യം ചെയ്യുന്നതിനുള്ള നടപടിക്രമങ്ങൾ പൈലറ്റുമാർക്ക് കൈമാറിയിട്ടുണ്ടെന്നും, പ്രശ്നം ശാശ്വതമായി പരിഹരിക്കാനുള്ള സോഫ്റ്റ്വെയർ അപ്ഡേറ്റ് തയ്യാറാക്കിവരികയാണെന്നും ബോയിംഗ് വ്യക്തമാക്കി.
