വാഷിംഗ്ടൺ: നിരീക്ഷണ പ്രവർത്തനങ്ങളുമായും അന്വേഷണങ്ങളുമായും ബന്ധപ്പെട്ട തന്ത്രപ്രധാന വിവരങ്ങൾ അടങ്ങിയ ആഭ്യന്തര കമ്പ്യൂട്ടർ സിസ്റ്റത്തിൽ “സംശയാസ്പദമായ പ്രവർത്തനങ്ങൾ” നടന്നതായും അതിൽ അന്വേഷണം ആരംഭിച്ചതായും എഫ്ബിഐ അറിയിച്ചു. പ്രശ്നത്തിൻ്റെ വ്യാപ്തിയും ആഘാതവും എത്രത്തോളമുണ്ടെന്ന് കണ്ടെത്താനുള്ള ശ്രമത്തിലാണ് ബ്യൂറോ. അത്യാധുനിക സാങ്കേതിക വിദ്യകൾ ഉപയോഗിച്ച് എഫ്ബിഐയുടെ നെറ്റ്വർക്ക് സുരക്ഷാ സംവിധാനങ്ങളെ അജ്ഞാതരായ കുറ്റവാളികൾ മറികടന്നതായി കോൺഗ്രസ് അംഗങ്ങൾക്ക് അയച്ച അറിയിപ്പിലാണ് വ്യക്തമാക്കിയിരിക്കുന്നത്.
ഫെബ്രുവരി 17-നാണ് നെറ്റ്വർക്കിലെ ഒരു സിസ്റ്റവുമായി ബന്ധപ്പെട്ട അസ്വാഭാവികമായ ലോഗ് വിവരങ്ങൾ എഫ്ബിഐയുടെ ശ്രദ്ധയിൽപ്പെട്ടതെന്ന് അസോസിയേറ്റഡ് പ്രസ്സിന് ലഭിച്ച റിപ്പോർട്ടുകൾ സൂചിപ്പിക്കുന്നു.
“ബാധിക്കപ്പെട്ട സിസ്റ്റം തരംതിരിക്കാത്തതാണെങ്കിലും (unclassified), അതിൽ നിയമപാലകർക്ക് ആവശ്യമായ അതീവ രഹസ്യ വിവരങ്ങൾ അടങ്ങിയിട്ടുണ്ട്. ഫോൺ വിളികൾ നിരീക്ഷിക്കുന്ന പെൻ രജിസ്റ്റർ, ട്രാപ്പ് ആൻഡ് ട്രേസ് തുടങ്ങിയ നിയമപരമായ നടപടികളിലൂടെ ലഭിച്ച വിവരങ്ങളും അന്വേഷണ പരിധിയിലുള്ള വ്യക്തികളുടെ സ്വകാര്യ വിവരങ്ങളും ഇതിൽ ഉൾപ്പെടുന്നു,” എഫ്ബിഐ അറിയിച്ചു. ഒരു പ്രത്യേക ഫോൺ ലൈനിൽ നിന്ന് വിളിക്കുന്ന നമ്പറുകൾ രേഖപ്പെടുത്താൻ നിയമപാലകരെ സഹായിക്കുന്ന ഒരു നിരീക്ഷണ ഉപകരണമാണ് പെൻ രജിസ്റ്റർ.
സൈബർ ആക്രമണം നടന്ന കാര്യം എഫ്ബിഐ സ്ഥിരീകരിച്ചിട്ടുണ്ടെങ്കിലും കൂടുതൽ വിവരങ്ങൾ വെളിപ്പെടുത്തിയിട്ടില്ല. “എഫ്ബിഐ നെറ്റ്വർക്കിലെ സംശയാസ്പദമായ നീക്കങ്ങൾ ഞങ്ങൾ തിരിച്ചറിയുകയും പരിഹരിക്കുകയും ചെയ്തിട്ടുണ്ട്. ഇതിനോട് പ്രതികരിക്കാൻ ലഭ്യമായ എല്ലാ സാങ്കേതിക വിദ്യകളും ഉപയോഗിക്കുന്നു,” എന്ന് എഫ്ബിഐ പ്രസ്താവനയിൽ പറഞ്ഞു.
ആരാണ് ഇതിന് പിന്നിലെന്ന് എഫ്ബിഐ വ്യക്തമാക്കിയിട്ടില്ല. എന്നിരുന്നാലും, സെൻസിറ്റീവ് ഓപ്പറേഷനുകൾ ചോർത്താൻ വിദേശ ഹാക്കർമാർ പണ്ടുമുതലേ ഫെഡറൽ ഏജൻസികളെ ലക്ഷ്യമിടാറുണ്ട്. ഇത്തവണ, ഒരു കൊമേഴ്സ്യൽ ഇന്റർനെറ്റ് സേവന ദാതാവിൻ്റെ ഇൻഫ്രാസ്ട്രക്ചർ ദുരുപയോഗം ചെയ്തുകൊണ്ടാണ് അതീവ സങ്കീർണ്ണമായ രീതിയിൽ സുരക്ഷാ സംവിധാനങ്ങൾ ഹാക്ക് ചെയ്തതെന്നാണ് എഫ്ബിഐ അറിയിച്ചിരിക്കുന്നത്.
FBI network hacked: Investigation underway into whether top-secret information was leaked
