അറ്റ്ലാൻ്റ: അമേരിക്കയിലെ ജോർജിയയിൽ ബാറിന് പുറത്തുണ്ടായ സംഘർഷത്തിനിടയിൽ മുൻ കോളേജ് ഫുട്ബോൾ താരം ജോർദാൻ ജോൺസ് (25) വെടിയേറ്റു മരിച്ചു. അക്വർത്തിലെ ‘സാഡിൽ ബാറിൽ’ സെക്യൂരിറ്റി ഗാർഡായി ജോലി ചെയ്യുന്നതിനിടെയാണ് ജോൺസിന് വെടിയേറ്റത്.
ശനിയാഴ്ച പുലർച്ചെ ബാറിൽ വലിയ രീതിയിലുള്ള സംഘർഷം പൊട്ടിപ്പുറപ്പെട്ടിരുന്നു. ഇത് തടയാൻ ശ്രമിക്കുന്നതിനിടെ പ്രതിയായ ഡാനിയൽ ഡി വോൺ പാർസൺസ് ജോൺസിനെ വെടിവെക്കുകയായിരുന്നു. ഗുരുതരമായി പരിക്കേറ്റ ജോൺസിനെ ഉടൻ തന്നെ കെനസ്റ്റോൺ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പ്രതിയെ പോലീസ് അറസ്റ്റ് ചെയ്യുകയും കൊലപാതകക്കുറ്റം ചുമത്തുകയും ചെയ്തു.
യൂണിവേഴ്സിറ്റി ഓഫ് വെസ്റ്റ് അലബാമയിലെ മികച്ച താരമായിരുന്ന ജോൺസ്, ഇൻഡോർ ഫുട്ബോൾ ലീഗിലെ (IFL) പ്രമുഖ കളിക്കാരൻ കൂടിയായിരുന്നു. ടൽസ ഓയിലേഴ്സ്, സാൻ അന്റോണിയോ ഗൺസ്ലിംഗേഴ്സ് എന്നീ ടീമുകൾക്കായി അദ്ദേഹം കളിച്ചിട്ടുണ്ട്. ഈ സീസണിൽ മിഷിഗൺ ആഴ്സണൽ ടീമിന് വേണ്ടി കളിക്കാൻ തയ്യാറെടുക്കുന്നതിനിടെയാണ് ദാരുണ സംഭവം.
തങ്ങളുടെ പ്രിയപ്പെട്ട താരം വിടവാങ്ങിയതിൽ ഇൻഡോർ ഫുട്ബോൾ ലീഗ് അനുശോചനം രേഖപ്പെടുത്തി. കളിമിടുക്ക് കൊണ്ടും മാന്യമായ പെരുമാറ്റം കൊണ്ടും എല്ലാവരുടെയും സ്നേഹം പിടിച്ചുപറ്റിയ വ്യക്തിയായിരുന്നു ജോൺസെന്ന് സുഹൃത്തുക്കൾ ഓർമ്മിച്ചു. “എല്ലാവരെയും ചേർത്തുനിർത്തുന്ന ഒരു വലിയ സഹോദരനെയാണ് ഞങ്ങൾക്ക് നഷ്ടമായത്,” ജോൺസിന്റെ മുൻ സഹതാരങ്ങൾ പറഞ്ഞു. സംഭവത്തിൽ പൊലീസ് അന്വേഷണം തുടരുകയാണ്.
Former football player Jordan Jones shot dead while trying to break up a fight at a bar
