കൊച്ചി: മുന്മന്ത്രി വി കെ ഇബ്രാഹിംകുഞ്ഞ് അന്തരിച്ചു. 74 വയസായിരുന്നു. കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. ശ്വാസകോശ അർബുദത്തെ തുടർന്ന് ഏറെനാള് ചികിത്സയിലായിരുന്നു. ആരോഗ്യസ്ഥിതി മോശമായതിനെ തുടർന്ന് ഇന്നലെയാണ് ഇബ്രാഹിംകുഞ്ഞിനെ വീണ്ടും ആശുപത്രിയിൽ പ്രവേശിപ്പിച്ചത്. മധ്യകേരളത്തിലെ ലീഗിന്റെ ജനകീയമുഖമായിരുന്ന ഇബ്രാഹിംകുഞ്ഞ് നാല് തവണ എംഎല്എയും രണ്ട് തവണ മന്ത്രിയുമായിരുന്നു.
എംഎസ്എഫിലൂടെ രാഷ്ട്രീയ പ്രവര്ത്തനം തുടങ്ങിയ വി കെ ഇബ്രാഹിംകുഞ്ഞ് 2001 ലും 2006 ലും മട്ടാഞ്ചേരിയില് നിന്ന് മത്സരിച്ചു. 2011ലും, 2016ലും കളമശ്ശേരിയെ പ്രതിനിധീകരിച്ചു. മട്ടാഞ്ചേരി മണ്ഡലത്തിന്റെ അവസാന എംഎല്എ, കളമശ്ശേരി മണ്ഡലത്തിന്റെ ആദ്യ എംഎല്എ എന്നീ വിശേഷണങ്ങളും വി കെ ഇബ്രാഹിംകുഞ്ഞിനുണ്ട്. 2005 മുതല് 2006 വരെ വ്യവസായ സാമൂഹ്യക്ഷേമ വകുപ്പ് മന്ത്രിയായിരുന്നു. 2011- 2016 വരെ പൊതുമരാമത്ത് മന്ത്രിയായിരുന്നു. മുസ്ലിം ലീഗിനെ പ്രതിനിധീകരിച്ച് നാല് തവണ അദ്ദേഹം എംഎല്എയായി. നിലവില് ഐയുഎംഎല് നാഷണല് എക്സിക്യൂട്ടിവ് അംഗമായിരുന്നു.
ചികില്സയിലായിരുന്ന ഇബ്രാഹിംകുഞ്ഞിനെ പ്രതിപക്ഷനേതാവ് വി.ഡി സതീശനും മുസ്ലിം ലീഗ് അഖിലേന്ത്യ ജനറല് സെക്രട്ടറി പി.കെ കുഞ്ഞാലിക്കുട്ടിയും രാവിലെ ആശുപത്രിയിലെത്തി സന്ദര്ശിച്ചിരുന്നു. ശ്വാസതടസമുണ്ടായതിനെത്തുടര്ന്ന് ഞായറാഴ്ചയാണ് ആശുപത്രിയില് പ്രവേശിപ്പിച്ചത്.
Former Minister VK Ibrahimkunju passes away
