ഗാസ സിറ്റി: കടുത്ത ഫണ്ട് ക്ഷാമത്തെത്തുടർന്ന് ഗാസ മുനമ്പിലെ ലക്ഷക്കണക്കിന് അഭയാർത്ഥികൾക്ക് നൽകിവരുന്ന അടിയന്തര ഭക്ഷ്യസഹായം വൻതോതിൽ വെട്ടിക്കുറയ്ക്കാൻ ഐക്യരാഷ്ട്രസഭയുടെ കീഴിലുള്ള വേൾഡ് ഫുഡ് പ്രോഗ്രാം നിർബന്ധിതരായി. വരാനിരിക്കുന്ന കഠിനമായ ശീതകാലത്ത് ഗാസയിലെ ജന ജീവിതം കൂടുതൽ ദുസ്സഹമാക്കുന്നതാണ് യു.എൻ ഏജൻസിയുടെ ഈ പുതിയ തീരുമാനം.
ഇതോടെ സംഘടനയുടെ സഹായം ലഭിക്കുന്ന ആളുകളുടെ എണ്ണം മൂന്നിലൊന്നായി കുറയും. നിലവിൽ 1.6 ദശലക്ഷം (16 ലക്ഷം) ആളുകൾക്ക് സഹായം നൽകിയിരുന്ന സ്ഥാനത്ത് ഇനി മുതൽ 1.1 ദശലക്ഷം (11 ലക്ഷം) പേർക്ക് മാത്രമേ റേഷൻ ലഭിക്കുകയുള്ളൂ. ഗാസയിലെ മൊത്തം ജനസംഖ്യയായ 2.1 ദശലക്ഷത്തിൽ ഭൂരിഭാഗവും യുദ്ധത്തെത്തുടർന്ന് പലായനം ചെയ്യപ്പെട്ടവരും നിലനിൽപ്പിനായി പൂർണ്ണമായും വിദേശ സഹായങ്ങളെ ആശ്രയിക്കുന്നവരുമാണ്.
സന്നദ്ധ അടുക്കളകൾ വഴി വിതരണം ചെയ്തിരുന്ന ചൂടുള്ള ഭക്ഷണത്തിന്റെ എണ്ണം പ്രതിദിനം 250,000-ൽ നിന്നും 150,000 ആയി കുറയും. ഇസ്രായേൽ സൈനിക നിയന്ത്രണത്തിലുള്ള അതിർത്തി പ്രദേശങ്ങളായ ‘യല്ലോ ലൈൻ’ പോലെയുള്ള തന്ത്രപ്രധാന മേഖലകളിൽ കഴിയുന്ന കുടുംബങ്ങൾക്ക് ഇനി മുതൽ ദിവസേനയുള്ള ഭക്ഷണത്തിന് പകരം ഒന്നിടവിട്ട ദിവസങ്ങളിൽ മാത്രമേ ഭക്ഷണം നൽകാൻ സാധിക്കൂ എന്ന് യു.എൻ ഏജൻസി വ്യക്തമാക്കി.
മാവും റേഷൻ ബോക്സുകളും ലഭിക്കുന്ന ഗാസക്കാരുടെ എണ്ണം പ്രതിമാസം 1.1 ദശലക്ഷത്തിൽ നിന്ന് 600,000 ആയി കുത്തനെ കുറയും. കഴിഞ്ഞ ജൂലൈ മാസം മുതൽ തന്നെ ലക്ഷക്കണക്കിന് ആളുകൾക്ക് നൽകിയിരുന്ന ധനസഹായവും സംഘടന വെട്ടിക്കുറച്ചിരുന്നു.
ഗാസയിലെ ജനങ്ങളുടെ ആവശ്യങ്ങൾ കുറഞ്ഞതുകൊണ്ടോ, അവർക്ക് അരികിലേക്ക് എത്താൻ സാധിക്കാത്തതുകൊണ്ടോ അല്ല ഈ തീരുമാനമെന്ന് വേൾഡ് ഫുഡ് പ്രോഗ്രാം ഫലസ്തീൻ ഡയറക്ടർ ഷോൺ ഹ്യൂസ് വ്യക്തമാക്കി. പൂർണ്ണമായും സാമ്പത്തിക പ്രതിസന്ധിയാണ് ഇതിന് കാരണം. 2026-ൽ ഫലസ്തീനിലെ പ്രവർത്തനങ്ങൾക്കായി സംഘടനയ്ക്ക് ലഭിച്ചത് മുൻവർഷങ്ങളിൽ ലഭിച്ചതിന്റെ പകുതിയിൽ താഴെ ഫണ്ട് മാത്രമാണ്. വരും മാസങ്ങളിൽ പ്രവർത്തനങ്ങൾ മുന്നോട്ട് കൊണ്ടുപോകാൻ 450 മില്യൺ ഡോളർ (ഏകദേശം 338 മില്യൺ പൗണ്ട്) അടിയന്തിരമായി ആവശ്യമുണ്ടെന്നും അദ്ദേഹം അറിയിച്ചു.
ഒരു വർഷം മുൻപ് വെടിനിർത്തൽ പ്രഖ്യാപിച്ചിരുന്നെങ്കിലും ഗാസയിൽ ഇസ്രായേൽ ആക്രമണങ്ങളും കടുത്ത നിയന്ത്രണങ്ങളും തുടരുകയാണ്. വിപണിയിൽ സാധനങ്ങൾ ലഭ്യമാണെങ്കിലും 80 ശതമാനത്തിലധികം ആളുകളും തൊഴിലില്ലാത്തതിനാൽ സാധനങ്ങൾ വാങ്ങാൻ ജനങ്ങളുടെ കൈയിൽ പണമില്ല. പാചകവാതക വിതരണം ഇസ്രായേൽ പൂർണ്ണമായും തടഞ്ഞിരിക്കുകയാണ്. വിറകിന് വലിയ വിലയായതിനാൽ കുട്ടികൾ തെരുവിൽ നിന്ന് പ്ലാസ്റ്റിക്കും കാർബോർഡും ശേഖരിച്ചാണ് റൊട്ടിയുണ്ടാക്കാനും ഭക്ഷണം ചൂടാക്കാനും ഇന്ധനമായി ഉപയോഗിക്കുന്നത്. കടുത്ത പട്ടിണിയും പോഷകാഹാരക്കുറവും ഗാസയെ വീണ്ടും വിഴുങ്ങാൻ സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകുന്നു.
അതേസമയം, ഗാസയിലെ റൊട്ടി ആവശ്യത്തിന്റെ മൂന്നിലൊന്ന് നൽകുന്ന ബേക്കറികൾക്കുള്ള പിന്തുണയും, ഗർഭിണികൾക്കും കുട്ടികൾക്കുമുള്ള പ്രത്യേക പോഷകാഹാര സഹായവും തൽക്കാലം തുടരുമെന്ന് വേൾഡ് ഫുഡ് പ്രോഗ്രാം അറിയിച്ചു.
Gaza faces starvation again; UN agency cuts food aid due to a funding crisis, leaving around 500,000 people without food.
