വാഷിംഗ്ടൺ: ജോർജിയയിലെ 14-ാമത് കൺഗ്രഷണൽ ഡിസ്ട്രിക്റ്റിലേക്ക് നടന്ന ആവേശകരമായ റൺഓഫ് തിരഞ്ഞെടുപ്പിൽ റിപ്പബ്ലിക്കൻ സ്ഥാനാർത്ഥി ക്ലേ ഫുള്ളർ വിജയിച്ചു. മുൻ പ്രതിനിധി മാർജോറി ടെയ്ലർ ഗ്രീൻ രാജിവെച്ചതിനെത്തുടർന്ന് ഒഴിവുവന്ന സീറ്റിലേക്കായിരുന്നു വോട്ടെടുപ്പ്. ഡെമോക്രാറ്റിക് സ്ഥാനാർത്ഥി ഷോൺ ഹാരിസിനെ പരാജയപ്പെടുത്തിയാണ് ഫുള്ളർ സഭയിലെത്തുന്നത്.
ചൊവ്വാഴ്ച നടന്ന വോട്ടെടുപ്പിൽ 57.5 ശതമാനം വോട്ട് നേടിയാണ് ഫുള്ളർ വിജയം ഉറപ്പിച്ചത്. എയർ നാഷണൽ ഗാർഡിലെ ലെഫ്റ്റനൻ്റ് കേണലും മുൻ ഡിസ്ട്രിക്റ്റ് അറ്റോർണിയുമായ ഫുള്ളർക്ക് പ്രസിഡൻ്റ് ഡോണൾഡ് ട്രംപിൻ്റെ പൂർണ്ണ പിന്തുണയുണ്ടായിരുന്നു.
യുഎസ് പ്രതിനിധി സഭയിൽ റിപ്പബ്ലിക്കൻ പാർട്ടിയുടെ ഭൂരിപക്ഷം നിലനിർത്തുന്നതിൽ ഈ വിജയം നിർണ്ണായകമായി. ഫുള്ളറുടെ വിജയത്തോടെ സഭയിൽ റിപ്പബ്ലിക്കൻ അംഗങ്ങളുടെ എണ്ണം 218 ആയി ഉയർന്നു. ഇതോടെ നേരിയ ഭൂരിപക്ഷത്തിലാണെങ്കിലും സഭയുടെ നിയന്ത്രണം റിപ്പബ്ലിക്കൻ പാർട്ടിക്ക് ഉറപ്പിക്കാനായി.
മുൻപ് സഭാംഗമായിരുന്ന മാർജോറി ടെയ്ലർ ഗ്രീൻ, ഡൊണാൾഡ് ട്രംപുമായുള്ള അഭിപ്രായവ്യത്യാസങ്ങളെത്തുടർന്ന് ജനുവരിയിലാണ് സ്ഥാനം രാജിവെച്ചത്. ഗ്രീനിൻ്റെ അവശേഷിക്കുന്ന കാലാവധി പൂർത്തിയാക്കാനാണ് ഫുള്ളർ ഇപ്പോൾ തിരഞ്ഞെടുക്കപ്പെട്ടിരിക്കുന്നത്. വരാനിരിക്കുന്ന നവംബറിലെ പൊതുതിരഞ്ഞെടുപ്പിലും ഫുള്ളർ തന്നെയാകും റിപ്പബ്ലിക്കൻ സ്ഥാനാർത്ഥി.
ഗ്രീനിനെപ്പോലെയുള്ള വിവാദ നായകരിൽ നിന്ന് മാറി കൂടുതൽ പക്വതയുള്ള നേതൃത്വത്തിലേക്ക് ഡിസ്ട്രിക്റ്റ് മാറുന്നു എന്നതിൻ്റെ സൂചനയായാണ് രാഷ്ട്രീയ നിരീക്ഷകർ ഈ വിജയത്തെ കാണുന്നത്.
Georgia runoff election: Clay Fuller replaces Marjorie Taylor Greene in the House
