വാഷിംഗ്ടൺ: ഇറാനിൽ തുടരുന്ന സൈനിക നടപടികളിൽ വ്യക്തത വരുത്താൻ പ്രസിഡന്റ് ഡോണൾഡ് ട്രംപിന് ബാധ്യതയുണ്ടെന്ന ആവശ്യവുമായി മുതിർന്ന റിപ്പബ്ലിക്കൻ സെനറ്റർ തോം ടിലിസ്. യുദ്ധത്തിന്റെ ലക്ഷ്യങ്ങളെന്താണെന്ന് അമേരിക്കൻ ജനതയോടും കോൺഗ്രസിനോടും തുറന്നു പറയാൻ പ്രസിഡന്റ് തയ്യാറാകണം. ഈ യുദ്ധത്തിൽ രാജ്യം ഭാഗമാകണോ എന്ന് ജനങ്ങൾ സംശയിക്കുന്ന സാഹചര്യത്തിൽ, കൃത്യമായ ലക്ഷ്യബോധമില്ലാതെ മുന്നോട്ട് പോകുന്നത് തിരിച്ചടിയാകുമെന്ന് അദ്ദേഹം സി.എൻ.എൻ ചാനലിന് നൽകിയ അഭിമുഖത്തിൽ മുന്നറിയിപ്പ് നൽകി.
അമേരിക്കൻ നിയമമായ ‘വാർ പവേഴ്സ് റെസല്യൂഷൻ’ അനുസരിച്ച്, കോൺഗ്രസിന്റെ പ്രത്യേക അനുമതിയില്ലാതെ 60 ദിവസത്തിൽ കൂടുതൽ സൈനിക നടപടികൾ തുടരാൻ പ്രസിഡന്റിന് കഴിയില്ല. ഈ കാലാവധി പിന്നിടുകയാണെങ്കിൽ യുദ്ധം തുടരാൻ ജനപ്രതിനിധി സഭയുടെ അംഗീകാരം തേടുകയോ അല്ലെങ്കിൽ പോരാട്ടം അവസാനിപ്പിക്കുകയോ ചെയ്യേണ്ടി വരും. വരും മാസങ്ങളിലും സൈനിക ഇടപെടൽ തുടരണമെങ്കിൽ ജനങ്ങളുടെയും ജനപ്രതിനിധികളുടെയും പിന്തുണ ഉറപ്പാക്കേണ്ടത് അനിവാര്യമാണെന്നും ടിലിസ് ചൂണ്ടിക്കാട്ടി.
ദീർഘകാലാടിസ്ഥാനത്തിലുള്ള സൈനിക നീക്കമാണോ അതോ താൽക്കാലിക തിരിച്ചടിയാണോ ട്രംപ് ലക്ഷ്യമിടുന്നത് എന്ന കാര്യത്തിൽ നിലവിൽ വലിയ ആശയക്കുഴപ്പമുണ്ട്. ഈ സാഹചര്യത്തിൽ, വരും ദിവസങ്ങളിൽ ഭരണകൂടം കോൺഗ്രസിനെ വിശ്വാസത്തിലെടുക്കുമോ അതോ ഏകപക്ഷീയമായി മുന്നോട്ട് പോകുമോ എന്നാണ് രാഷ്ട്രീയ ലോകം ഉറ്റുനോക്കുന്നത്. അമേരിക്കൻ ഭരണഘടന വിഭാവനം ചെയ്യുന്ന അധികാര പരിധികൾക്കുള്ളിൽ നിന്ന് മാത്രമേ പ്രസിഡന്റിന് പ്രവർത്തിക്കാനാവൂ എന്ന കർശനമായ ഓർമ്മപ്പെടുത്തലാണ് സ്വന്തം പാർട്ടിയിൽ നിന്നുള്ള ഈ പ്രതികരണം വ്യക്തമാക്കുന്നത്.
