വാഷിംഗ്ടൺ: ജെഫ്രി എപ്സ്റ്റീൻ കേസുമായി ബന്ധപ്പെട്ട് അമേരിക്കൻ ജനപ്രതിനിധി സഭയുടെ മേൽനോട്ട സമിതി നടത്തുന്ന അന്വേഷണത്തിൻ്റെ ഭാഗമായി ഹിലാരി ക്ലിൻ്റൺ ഇന്നലെയും മുൻ യുഎസ് പ്രസിഡൻ്റ് ബിൽ ക്ലിൻ്റൺ ഇന്നുമായി സമിതിക്ക് മുന്നിൽ മൊഴി നൽകുന്നു. സത്യം പുറത്തുവരുന്നത് കാണാൻ ഞാൻ ആഗ്രഹിക്കുന്നു’ എന്നാണ് മൊഴി നൽകൽ പൂർത്തിയായതിനു പിന്നാലെ മുൻ സ്റ്റേറ്റ് സെക്രട്ടറി ഹിലാരി ക്ലിൻ്റൺ പ്രതികരിച്ചത്. അന്വേഷണത്തിൻ്റെ സ്വഭാവത്തെക്കുറിച്ച് സുപ്രധാനമായ നിരവധി ചോദ്യങ്ങൾ ഉന്നയിച്ചതിനും, അന്വേഷിക്കപ്പെടേണ്ടതെന്ന് താൻ കരുതുന്ന കാര്യങ്ങൾ കേൾക്കാൻ തയ്യാറായതിനും കമ്മിറ്റി ചെയർമാൻ ജെയിംസ് കോമറെ ഹിലാരി ക്ലിൻ്റൺ പ്രശംസിച്ചു.
“ഞാൻ അതിനെ അഭിനന്ദിക്കുന്നു. സത്യം പുറത്തുവരണമെന്ന് ഞാൻ ആഗ്രഹിക്കുന്നു, അതുകൊണ്ട് തന്നെ വളരെ ദൈർഘ്യമേറിയതും ആവർത്തന വിരസവുമായ ഒരു മൊഴിയെടുപ്പ് അവസാനിപ്പിക്കാൻ ആശ്വാസകരമായ ഒരു വഴിയായിരുന്നു അത്.” എന്നാണ് അവർ പറഞ്ഞത്. എപ്സ്റ്റീൻ കേസിലെ ദുരൂഹതകൾ നീക്കുന്നതിനും ഇരകൾക്ക് നീതി ഉറപ്പാക്കുന്നതിനും ഈ അന്വേഷണം നിർണ്ണായകമാണെന്ന സൂചനയാണ് അവരുടെ വാക്കുകൾ നൽകുന്നത്. അതേസമയം, എപ്സ്റ്റീൻ്റെ വിമാനത്തിൽ പലതവണ യാത്ര ചെയ്തതായി ബിൽ ക്ലിൻ്റൺ നേരത്തെ സമ്മതിച്ചിട്ടുണ്ടെങ്കിലും, എപ്സ്റ്റീൻ്റെ കുറ്റകൃത്യങ്ങളെക്കുറിച്ച് തനിക്ക് അറിവില്ലായിരുന്നു എന്നാണ് അദ്ദേഹത്തിൻ്റെ നിലപാട്. ക്ലിൻ്റൺ ദമ്പതികളുടെ മൊഴികളുടെ വീഡിയോയും ട്രാൻസ്ക്രിപ്റ്റും എത്രയും വേഗം പുറത്തുവിടുമെന്ന് സമിതി അറിയിച്ചിട്ടുണ്ട്.
ന്യൂയോർക്കിലെ ചാപ്പക്വയിൽ വെച്ച് ഏകദേശം 6 മണിക്കൂറിലധികം നീണ്ട അടച്ചിട്ട മുറിയിലുള്ള മൊഴിയെടുപ്പാണ് നടന്നത്. “ഞാൻ ഒരിക്കലും ജെഫ്രി എപ്സ്റ്റീനെ കണ്ടിട്ടില്ല, അദ്ദേഹവുമായി യാതൊരു ബന്ധമോ ആശയവിനിമയമോ ഉണ്ടായിട്ടില്ല” എന്ന് അവർ മാധ്യമങ്ങളോട് പറഞ്ഞു. എപ്സ്റ്റീന്റെയോ സഹായി ഗിസ്ലെയ്ൻ മാക്സ്വെല്ലിന്റെയോ ക്രിമിനൽ പ്രവർത്തനങ്ങളെക്കുറിച്ച് തനിക്ക് യാതൊരു അറിവുമില്ലെന്ന് അവർ കമ്മിറ്റിയെ അറിയിച്ചു. ഗിസ്ലെയ്ൻ മാക്സ്വെല്ലിനെ പരിചയമുണ്ടെങ്കിലും അത് വളരെ പരിമിതമായ ഒന്നാണെന്നും അവർ വ്യക്തമാക്കിയിട്ടുണ്ട്. ഈ അന്വേഷണം വെറും “രാഷ്ട്രീയ നാടകമാണെന്നും” , ട്രംപിൻ്റെ എപ്സ്റ്റീൻ ബന്ധങ്ങളിൽ നിന്ന് ശ്രദ്ധ തിരിക്കാനാണ് റിപ്പബ്ലിക്കൻ സമിതി ശ്രമിക്കുന്നതെന്നും അവർ ആരോപിച്ചിട്ടുണ്ട്.
എപ്സ്റ്റീന്റെ വിമാനത്തിൽ താൻ ഒരിക്കലും യാത്ര ചെയ്തിട്ടില്ലെന്നും അദ്ദേഹത്തിന്റെ ദ്വീപുകളോ ഓഫീസുകളോ വീടുകളോ സന്ദർശിച്ചിട്ടില്ലെന്നും അവർ വ്യക്തമാക്കി.
ഗിസ്ലെയ്ൻ മാക്സ്വെല്ലുമായുള്ള ബന്ധം: മാക്സ്വെല്ലിനെ ഒരു പരിചയക്കാരി എന്ന നിലയിൽ മാത്രമേ അറിയാവൂ എന്നും അവർ പറഞ്ഞു. ആറുമണിക്കൂറോളം നീണ്ട ഈ മൊഴിയെടുപ്പ് അടച്ചിട്ട മുറിയിലാണ് നടന്നതെങ്കിലും ഇതിനിടെ, റിപ്പബ്ലിക്കൻ പ്രതിനിധി ലോറൻ ബോബെർട്ട് മൊഴിയെടുപ്പിന്റെ ചിത്രം ചോർത്തിയത് ചെറിയ തോതിൽ തർക്കങ്ങൾക്ക് ഇടയാക്കിയിരുന്നു.
എപ്സ്റ്റീനെ സമ്പന്നനാക്കാൻ സഹായിച്ചുവെന്ന് ആരോപിക്കപ്പെടുന്ന ശതകോടീശ്വരൻ ലെസ് വെക്സ്നർ കഴിഞ്ഞ ആഴ്ച അടച്ചിട്ട മുറിയിൽ നടന്ന മൊഴിയെടുപ്പിൽ പങ്കെടുത്തു. തൻ്റെ സാമ്പത്തിക ഉപദേഷ്ടാവായിരുന്ന കാലത്ത് എപ്സ്റ്റീൻ തൻ്റെ കുടുംബത്തിൽ നിന്ന് വൻ തുക മോഷ്ടിച്ചതായി വിക്ടോറിയാസ് സീക്രട്ട് മുൻ സിഇഒ കൂടിയായ വെക്സ്നർ ആരോപിച്ചു. താൻ തെറ്റൊന്നും ചെയ്തിട്ടില്ലെന്ന് അദ്ദേഹം ആവർത്തിച്ചു.
സെക്സ് ട്രാഫിക്കിംഗ് കേസിൽ 20 വർഷത്തെ തടവുശിക്ഷ അനുഭവിക്കുന്ന എപ്സ്റ്റീൻ്റെ മുൻ കാമുകി ഗിസ്ലെയ്ൻ മാക്സ്വെൽ ഫെബ്രുവരി 9-ന് ജയിലിൽ നിന്ന് വീഡിയോ കോൺഫറൻസിംഗിലൂടെ ഹാജരായെങ്കിലും, മൗനം പാലിക്കാനുള്ള അവകാശം ഉപയോഗിച്ച് ചോദ്യങ്ങൾക്ക് മറുപടി നൽകാൻ വിസമ്മതിച്ചു.
ട്രംപ് ഭരണകൂടത്തിലെ മുൻ അറ്റോർണി ജനറൽ ബിൽ ബാർ ഓഗസ്റ്റിൽ നടന്ന മൊഴിയെടുപ്പിൽ, എപ്സ്റ്റീൻ അന്വേഷണത്തെക്കുറിച്ച് തനിക്ക് പരിമിതമായ അറിവേ ഉള്ളൂവെന്നും ട്രംപിനെ കുറ്റവിമുക്തനാക്കാൻ കഴിയില്ലെന്നും അറിയിച്ചു. ജെയിംസ് കോമി, റോബർട്ട് മുള്ളർ, മെറിക് ഗാർലൻഡ് തുടങ്ങിയ മുൻ ഉന്നത ഉദ്യോഗസ്ഥർക്കും സമിതി അധ്യക്ഷൻ ജെയിംസ് കോമർ സമൻസയച്ചിരുന്നു. ഇതിൽ മുള്ളറെ ആരോഗ്യപ്രശ്നങ്ങൾ കാരണം ഒഴിവാക്കി. മറ്റുള്ളവരിൽ പലരും തങ്ങൾക്ക് ഈ കാര്യത്തിൽ അറിവില്ലെന്നാണ് പ്രതികരിച്ചിട്ടുള്ളത്.
Hillary Clinton testifies in Epstein case, ‘I want to see the truth come out’
