മയാമി: 2026-ലെ അറ്റ്ലാന്റിക് ചുഴലിക്കാറ്റ് സീസണിലെ ആദ്യ ചുഴലിക്കാറ്റായ ‘ഇസൈയാസ്’ (Isaias) ശക്തി പ്രാപ്തമാകുന്നതായി നാഷണൽ ഹറികെയ്ൻ സെന്റർ അറിയിച്ചു. ബുധനാഴ്ച രാത്രിയോടെ ട്രോപ്പിക്കൽ കൊടുങ്കാറ്റിൽ നിന്ന് ശക്തിപ്രാപിച്ച ഇത് ഈ സീസണിലെ ആദ്യ ചുഴലിക്കാറ്റായി മാറി. വ്യാഴാഴ്ച ഉച്ചയോടെ കൂടുതൽ ശക്തിയാർജ്ജിക്കുന്ന കാറ്റ് വെള്ളിയാഴ്ച രാത്രിയോടോ ശനിയാഴ്ച രാവിലെയോ യു.എസ് ഗൾഫ് തീരത്ത് കരയിലെത്തുമെന്നാണ് പ്രവചനം. മിസിസിപ്പി, അലബാമ, ഫ്ലോറിഡ പാൻഹാൻഡിലിന്റെ പടിഞ്ഞാറൻ ഭാഗങ്ങൾ എന്നിവടങ്ങളിൽ കാറ്റ് വൻ നാശനഷ്ടം വിതച്ചേക്കുമെന്നാണ് ആശങ്ക.
മിസിസിപ്പി-അലബാമ അതിർത്തി മുതൽ തെക്കൻ അലബാമ കടന്ന് ഫ്ലോറിഡയിലെ പനാമ സിറ്റി വരെയുള്ള വടക്കൻ ഗൾഫ് തീരമേഖലകളിൽ കനത്ത ജാഗ്രതാ നിർദ്ദേശവും (ഹറികെയ്ൻ വാണിങ്) പുറപ്പെടുവിച്ചിട്ടുണ്ട്. അടിയന്തര സാഹചര്യങ്ങളെ നേരിടാൻ ഫ്ലോറിഡ ഗവർണർ റോൺ ഡിസാന്റിസ് സംസ്ഥാനത്തെ രണ്ട് ഡസനിലധികം കൗണ്ടികളിലും, അലബാമ ഗവർണർ കേ ഐവി 40 കൗണ്ടികളിലും അടിയന്തരാവസ്ഥ പ്രഖ്യാപിച്ചു.
നാഷണൽ ഹറികെയ്ൻ സെന്ററിന്റെ കണക്കുകൾ പ്രകാരം മിസിസിപ്പി നദിയുടെ മുഖത്തിന് ഏകദേശം 380 മൈൽ തെക്കായി സ്ഥിതി ചെയ്യുന്ന കാറ്റിന് മണിക്കൂറിൽ 85 മൈൽ വേഗതയുണ്ട്. ചുഴലിക്കാറ്റിന്റെ കേന്ദ്രഭാഗത്തുനിന്ന് 15 മൈൽ ചുറ്റളവിൽ ശക്തമായ ചുഴലിക്കാറ്റിന്റെ ആഞ്ഞടികളും, 90 മൈൽ വരെ ദൂരത്തിൽ ട്രോപ്പിക്കൽ കൊടുങ്കാറ്റിന്റെ വേഗതയുള്ള കാറ്റും അനുഭവപ്പെടുന്നുണ്ട്. ‘ഇസൈയാസ്’ (Isaias – ഈസ്-ആ-ഈ-ആസ്) വടക്കൻ ഗൾഫ് തീരത്തേക്ക് അടുക്കുമ്പോൾ കൂടുതൽ അപകടകാരിയായി മാറുമെന്നും, തീരദേശവാസികൾ സുരക്ഷിത സ്ഥാനങ്ങളിലേക്ക് മാറാനുള്ള തയ്യാറെടുപ്പുകൾ അടിയന്തരമായി പൂർത്തിയാക്കണമെന്നും കാലാവസ്ഥാ നിരീക്ഷകർ മുന്നറിയിപ്പ് നൽകി.
മുന്നറിയിപ്പിന്റെ ഭാഗമായി ഫ്ലോറിഡയിലെ ഒകാലൂസ കൗണ്ടിയിൽ ഉൾപ്പെടെയുള്ള പ്രദേശങ്ങളിൽ നിർബന്ധിത ഒഴിഞ്ഞുപോകൽ ഉത്തരവ് (മാൻഡേറ്ററി എവാക്വേഷൻ) നടപ്പിലാക്കി. തെക്കുകിഴക്കൻ അലബാമയിലെ തീരദേശങ്ങളിലും സന്നദ്ധ ഒഴിഞ്ഞുപോകൽ പ്രഖ്യാപിച്ചിട്ടുണ്ട്. രക്ഷാപ്രവർത്തനങ്ങൾ സുഗമമാക്കുന്നതിനും ഗതാഗത കുരുക്ക് ഒഴിവാക്കുന്നതിനും സന്ദർശകരും താമസക്കാരല്ലാത്തവരും പ്രദേശത്തുനിന്ന് ഒഴിഞ്ഞുപോകണമെന്ന് ഗൾഫ് ഷേഴ്സ് അധികൃതർ അഭ്യർത്ഥിച്ചു. ചുഴലിക്കാറ്റിന്റെ വരവോടെ തീരദേശ ജനത കനത്ത ആശങ്കയിലാണ്.
