വാഷിംഗ്ടൺ: ഇറാൻ ഭരണകൂടം തങ്ങളുടെ ജനങ്ങളെ അപകടത്തിലാക്കുന്ന രീതിയിൽ ജനവാസ കേന്ദ്രങ്ങളെ സൈനിക ആവശ്യങ്ങൾക്കായി ഉപയോഗിക്കുന്നതിനെതിരെ അതിശക്തമായ മുന്നറിയിപ്പുമായി യുഎസ് സെൻട്രൽ കമാൻഡ്. ഡ്രോണുകളും ബാലിസ്റ്റിക് മിസൈലുകളും തൊടുത്തുവിടാൻ ഇറാൻ സൈന്യം ജനസാന്ദ്രതയേറിയ മേഖലകൾ ഉപയോഗിക്കുന്നത് ആഗോളതലത്തിൽ വലിയ ആശങ്കയ്ക്ക് കാരണമായിട്ടുണ്ട്. അന്താരാഷ്ട്ര നിയമപ്രകാരം സൈനിക ആവശ്യങ്ങൾക്കായി ഉപയോഗിക്കുന്ന ഇടങ്ങൾക്ക് ലഭിക്കേണ്ട പ്രത്യേക സുരക്ഷാ പദവി നഷ്ടപ്പെടുമെന്നും അവ സൈനിക ലക്ഷ്യങ്ങളായി മാറാൻ സാധ്യതയുണ്ടെന്നും യുഎസ് പുറത്തിറക്കിയ പ്രസ്താവനയിൽ വ്യക്തമാക്കുന്നു.
ഇറാൻ സൈന്യം തങ്ങളുടെ മൊബൈൽ ഡ്രോൺ ലോഞ്ചറുകളും മിസൈൽ വിക്ഷേപിണികളും നഗരങ്ങളിലെ തിരക്കേറിയ ഇടങ്ങളിലേക്ക് മാറ്റുന്നതായി യുഎസ് ഉദ്യോഗസ്ഥർ സ്ഥിരീകരിച്ചു. ഡെസ്ഫുൾ, എസ്ഫഹാൻ, ഷിറാസ് എന്നീ നഗരങ്ങളെയാണ് മുന്നറിയിപ്പിൽ പ്രത്യേകം പരാമർശിച്ചിരിക്കുന്നത്. ഈ നഗരങ്ങളിലെ ജനവാസ കേന്ദ്രങ്ങളിൽ നിന്ന് ഇറാൻ മിസൈൽ ആക്രമണങ്ങൾ നടത്തുന്നതായി അമേരിക്ക നിരീക്ഷിച്ചിട്ടുണ്ട്. നിലവിൽ ഈ സ്ഥലങ്ങളിൽ ആക്രമണം നടത്താൻ അമേരിക്ക പദ്ധതിയിടുന്നില്ലെങ്കിലും, സൈനിക കേന്ദ്രങ്ങളായി മാറിയ ഈ ഇടങ്ങളിലെ ജനങ്ങളുടെ സുരക്ഷ ഉറപ്പാക്കാൻ തങ്ങൾക്ക് കഴിയില്ലെന്ന് സെൻട്രൽ കമാൻഡ് വ്യക്തമാക്കി.
“നിങ്ങൾ എന്താണ് ചെയ്യുന്നതെന്ന് ഞങ്ങൾ കാണുന്നുണ്ട്” എന്ന് ഇറാൻ ഭരണകൂടത്തെ അറിയിക്കാനും, സ്വന്തം സർക്കാർ തങ്ങളെ അപകടത്തിലാക്കുകയാണെന്ന് ഇറാനിലെ സാധാരണക്കാരെ ബോധ്യപ്പെടുത്താനുമാണ് ഈ മുന്നറിയിപ്പ്. ഇറാനിലെ സാധാരണ ജനങ്ങൾ വീടുകൾക്കുള്ളിൽ തന്നെ തുടരണമെന്ന് യുഎസ് സൈന്യം ആവശ്യപ്പെട്ടു. നിരപരാധികളായ മനുഷ്യരുടെ ജീവൻ ഇറാൻ ഭരണകൂടം ബോധപൂർവ്വം പണയപ്പെടുത്തുകയാണെന്നും പ്രസ്താവനയിൽ കുറ്റപ്പെടുത്തുന്നു. യുദ്ധമുഖത്ത് ഇറാൻ സ്വീകരിക്കുന്ന ഈ പുതിയ തന്ത്രം വരും ദിവസങ്ങളിൽ കൂടുതൽ ഗുരുതരമായ പ്രത്യാഘാതങ്ങൾ ഉണ്ടാക്കുമെന്നാണ് വിലയിരുത്തപ്പെടുന്നത്.
