ടെഹ്റാൻ: അമേരിക്കയെയും ഇസ്രായേലിനെയും ലക്ഷ്യമിട്ട് ഇറാൻ നടത്തിവരുന്ന സൈനിക നീക്കങ്ങളുടെ വിശദാംശങ്ങൾ പുറത്തുവിട്ട് ഇസ്ലാമിക് റെവല്യൂഷണറി ഗാർഡ് കോർപ്സ്. തങ്ങളുടെ ആകെ പ്രഹരശേഷിയുടെ 60 ശതമാനവും മേഖലയിലെ അമേരിക്കൻ സൈനിക താവളങ്ങളെയും തന്ത്രപ്രധാന താൽപ്പര്യങ്ങളെയും തകർക്കാനാണ് ഉപയോഗിക്കുന്നതെന്ന് ഐആർജിസി വക്താവ് അലി മുഹമ്മദ് നയിനി വെളിപ്പെടുത്തി. ബാക്കിയുള്ള 40 ശതമാനം മാത്രമാണ് ഇസ്രായേലിലെ ലക്ഷ്യങ്ങൾക്ക് നേരെ തിരിച്ചുവിട്ടിട്ടുള്ളത്. ടെഹ്റാനിൽ നടത്തിയ ടെലിവിഷൻ പ്രസംഗത്തിലായിരുന്നു അദ്ദേഹത്തിന്റെ ഈ നിർണ്ണായക വെളിപ്പെടുത്തൽ.
ഈ യുദ്ധത്തിൽ തങ്ങളുടെ പ്രധാന ശത്രു അമേരിക്കയാണെന്നും അതിനാൽ തന്നെ അവരെ ശിക്ഷിക്കുന്നതിനാണ് മുൻഗണന നൽകുന്നതെന്നും നയിനി പറഞ്ഞു. കഴിഞ്ഞ എഴുപത് വർഷമായി മേഖലയിൽ നിലയുറപ്പിച്ചിരിക്കുന്ന അമേരിക്കൻ സൈനിക കേന്ദ്രങ്ങൾ തങ്ങളുടെ നിയമപരമായ ലക്ഷ്യങ്ങളാണെന്നും അദ്ദേഹം കൂട്ടിച്ചേർത്തു. യുദ്ധമുഖത്ത് ഇറാൻ വലിയ തിരിച്ചടികൾ നേരിടുന്നുണ്ടെന്ന പാശ്ചാത്യ രാജ്യങ്ങളുടെ വാദങ്ങളെ തള്ളിയ വക്താവ്, ഇറാനിലേക്ക് എത്തിയ എൺപതോളം ഡ്രോണുകൾ തങ്ങൾ വെടിവെച്ചിട്ടതായി അവകാശപ്പെട്ടു. ഇതിൽ അമേരിക്കയുടെ അത്യാധുനികമായ മൂന്ന് ഭീമൻ MQ-9 ഡ്രോണുകളും 74 ഇസ്രായേൽ ഡ്രോണുകളും ഉൾപ്പെടുന്നുണ്ടെന്നാണ് ഇറാന്റെ വാദം.
മേഖലയിൽ ദീർഘകാലാടിസ്ഥാനത്തിലുള്ള ഒരു യുദ്ധത്തിന് ഇറാൻ സജ്ജമാണെന്നും ശത്രുക്കൾക്ക് വരും ദിവസങ്ങളിൽ കൂടുതൽ കനത്ത പ്രഹരങ്ങൾ ഏൽപ്പിക്കുമെന്നും നയിനി മുന്നറിയിപ്പ് നൽകി. അമേരിക്കൻ താവളങ്ങൾക്ക് നേരെയുള്ള ആക്രമണം വർദ്ധിപ്പിക്കുന്നതിലൂടെ വാഷിംഗ്ടണിനെ സമ്മർദ്ദത്തിലാക്കാനാണ് ബീജിംഗ് ലക്ഷ്യമിടുന്നത്. ഇതോടെ മിഡിൽ ഈസ്റ്റിലെ സംഘർഷം അമേരിക്കയും ഇറാനും തമ്മിലുള്ള നേരിട്ടുള്ള ഏറ്റുമുട്ടലായി പൂർണ്ണമായും മാറിക്കഴിഞ്ഞുവെന്ന് രാഷ്ട്രീയ നിരീക്ഷകർ വിലയിരുത്തുന്നു.
