വാഷിംഗ്ടൺ: പരസ്പരം വാക്കുകൾക്കൊണ്ട് യുദ്ധം തീർത്ത് അമേരിക്കയും ഇറാനും. അമേരിക്കൻ പ്രസിഡൻ്റ് ഡോണൾഡ് ട്രംപിന് നേരെ ഇറാൻ ഭരണകൂടം കടുത്ത മുന്നറിയിപ്പുമായി രംഗത്തെത്തി. പശ്ചിമേഷ്യയിലേക്ക് അമേരിക്കയുടെ യുദ്ധക്കപ്പൽക്കൂട്ടം നീങ്ങുന്നതായി റിപ്പോർട്ടുകൾ വന്നതിന് പിന്നാലെയാണ് ഇറാൻ്റെ പ്രതികരണം എത്തിയത്. “ഇത്തവണ നമ്മൾ ഒത്തുതീർപ്പിലെത്തി. സമഗ്രമായ യുദ്ധത്തോടെ” എന്ന കടുത്ത ഭാഷയിലാണ് ഇറാൻ പ്രതികരിച്ചത്. അമേരിക്കയുടെ ഏത് സൈനിക നീക്കത്തെയും പൂർണ്ണമായ യുദ്ധത്തിലൂടെ നേരിടുമെന്ന് ഇറാൻ ഉന്നത വക്താക്കൾ അറിയിച്ചു.
മിഡിൽ ഈസ്റ്റിലെ തങ്ങളുടെ താത്പര്യങ്ങൾ സംരക്ഷിക്കുന്നതിനായി കപ്പൽസംഘത്തെ വിന്യസിക്കാൻ ട്രംപ് ഭരണകൂടം നിർദ്ദേശം നൽകിയിരുന്നു. ഇത് മേഖലയിൽ വൻതോതിലുള്ള സൈനിക സംഘർഷത്തിന് കാരണമായേക്കാമെന്ന് അന്താരാഷ്ട്ര നിരീക്ഷകർ വിലയിരുത്തുന്നു. നിലവിലെ സാഹചര്യത്തിൽ ഇരുരാജ്യങ്ങളും തമ്മിലുള്ള നയതന്ത്ര ബന്ധം അതീവ ഗുരുതരമായി തുടരുകയാണ്.
ട്രംപിന് മറുപടിയായി, ഇറാൻ ഏതൊരു ആക്രമണത്തെയും “ഒരു സമഗ്ര യുദ്ധമായി” കണക്കാക്കുമെന്ന് വെള്ളിയാഴ്ച ഒരു മുതിർന്ന ഇറാനിയൻ ഉദ്യോഗസ്ഥൻ പറഞ്ഞു. “ഈ സൈനിക സജ്ജീകരണം – ഇത് യഥാർത്ഥ ഏറ്റുമുട്ടലിന് ഉദ്ദേശിച്ചുള്ളതല്ലെന്ന് ഞങ്ങൾ പ്രതീക്ഷിക്കുന്നു – പക്ഷേ ഞങ്ങളുടെ സൈന്യം ഏറ്റവും മോശം സാഹചര്യത്തിന് തയ്യാറാണ്. അതുകൊണ്ടാണ് ഇറാനിൽ എല്ലാം അതീവ ജാഗ്രതയിലായിരിക്കുന്നത്,” ഒരു മുതിർന്ന ഇറാനിയൻ ഉദ്യോഗസ്ഥൻ പറഞ്ഞതായി റോയിട്ടേഴ്സ് റിപ്പോർട്ട് ചെയ്തു.
അതേസമയം, ഇറാനിലെ മനുഷ്യാവകാശ സംഘടനകളും അന്താരാഷ്ട്ര നിരീക്ഷകരും പുറത്തുവിടുന്ന കണക്കുകൾ പ്രകാരം പ്രതിഷേധങ്ങളിൽ കൊല്ലപ്പെട്ടവരുടെ എണ്ണം 5,000 കടന്നതായി റിപ്പോർട്ടുകളുണ്ട്. എന്നാൽ ഇറാൻ സർക്കാർ ഈ കണക്കുകൾ ഔദ്യോഗികമായി സ്ഥിരീകരിച്ചിട്ടില്ല. സാമ്പത്തിക പ്രതിസന്ധി, രാഷ്ട്രീയ അടിച്ചമർത്തലുകൾ, വ്യക്തിസ്വാതന്ത്ര്യത്തിന്മേലുള്ള നിയന്ത്രണങ്ങൾ എന്നിവയ്ക്കെതിരെയാണ് ഇറാനിൽ ജനങ്ങൾ തെരുവിലിറങ്ങിയത്. ഈ പ്രതിഷേധങ്ങൾ രാജ്യത്തിൻ്റെ ശത്രുക്കളായ വിദേശ ശക്തികൾ സ്പോൺസർ ചെയ്യുന്നതാണെന്നാണ് ഇറാൻ ഭരണകൂടത്തിൻ്റെ ആരോപണം. ഇതിൻ്റെ ഭാഗമായാണ് പ്രതിഷേധക്കാർക്കെതിരെ കടുത്ത സൈനിക നടപടികൾ സ്വീകരിക്കുന്നത്.
Iran warns Trump that any attack on Iran will be considered ‘all-out war’
