ടെഹ്റാൻ: ഇറാനിലെ ജനകീയ പ്രതിഷേധങ്ങളെ അടിച്ചമർത്തുന്നതിൽ അമേരിക്ക ഇടപെട്ടാൽ, പശ്ചിമേഷ്യയിലെ യുഎസ് സൈനിക കേന്ദ്രങ്ങളെയും വാണിജ്യ-ഷിപ്പിങ് സൗകര്യങ്ങളെയും ലക്ഷ്യമാക്കുമെന്ന് ഇറാൻ പാർലമെന്റ് സ്പീക്കർ മുഹമ്മദ് ബഖർ ഖാലിബാഫ് ശക്തമായ മുന്നറിയിപ്പ് നൽകി. ഇറാൻ ഭരണകൂടം പ്രക്ഷോഭങ്ങളെ സമാധാനപരമായി നേരിടാൻ ശ്രമിക്കുന്നതിനിടയിൽ, യുഎസ് പ്രസിഡന്റ് ഡോണൾഡ് ട്രംപ് ഉയർത്തിയ സൈനിക ഭീഷണിക്കുള്ള മറുപടിയായാണ് ഈ പ്രസ്താവന.
ഇറാനെയോ അതിന്റെ സ്വാധീന മേഖലകളെയോ ലക്ഷ്യമാക്കി അമേരിക്ക സൈനിക നടപടി സ്വീകരിച്ചാൽ, മേഖലയിലെ അമേരിക്കൻ സൈനിക താവളങ്ങൾ, കപ്പലുകൾ, ഷിപ്പിങ് കേന്ദ്രങ്ങൾ എന്നിവയെല്ലാം നിയമാനുസൃത ലക്ഷ്യങ്ങളായി ഇറാൻ കണക്കാക്കുമെന്ന് ഖാലിബാഫ് വ്യക്തമാക്കി (ഇസ്രായേലിനെ ‘അധിനിവേശ പ്രദേശം’ എന്ന് വിശേഷിപ്പിച്ചുകൊണ്ട് അതിനെയും ഉൾപ്പെടുത്തി). ആക്രമണം നടന്ന ശേഷം മാത്രം പ്രതികരിക്കുന്ന രീതിയിൽ ഒതുങ്ങില്ല ഇറാന്റെ നിലപാടെന്നും അദ്ദേഹം വ്യക്തമാക്കി. അതായത്, അമേരിക്കൻ ഭീഷണി തുടരുന്നതിനിടയിൽ തന്നെ മുൻകൂർ പ്രതിരോധ നടപടികൾ സ്വീകരിക്കാൻ ഇറാൻ തയ്യാറാണെന്ന സൂചനയാണിത്.
കഴിഞ്ഞ ദിവസങ്ങളിൽ, പ്രതിഷേധക്കാർക്ക് നേരെ സുരക്ഷാ സേന വെടിയുതിർത്താൽ ശക്തമായി തിരിച്ചടിക്കുമെന്ന് ട്രംപ് ആവർത്തിച്ച് പ്രഖ്യാപിച്ചിരുന്നു. ഇതിന്റെ പശ്ചാത്തലത്തിലാണ് ഇറാൻ തങ്ങളുടെ സൈനിക നിലപാട് കൂടുതൽ കടുപ്പിച്ചത്.
പശ്ചിമേഷ്യയിൽ ഇറാനും അമേരിക്കയും തമ്മിലുള്ള പൊരുത്തക്കേടുകൾ ഒരു വലിയ പ്രാദേശിക യുദ്ധത്തിലേക്ക് വഴിവെക്കുമോ എന്ന ആശങ്ക അന്താരാഷ്ട്ര സമൂഹം ഉയർത്തുന്നുണ്ട്. ഇറാനിലെ ഇന്റർനെറ്റ്-ഫോൺ നിരോധനവും പ്രതിഷേധങ്ങളിലെ കൊലപാതകങ്ങളും തുടരുന്നതിനിടെയാണ് ഈ പുതിയ ഭീഷണി ഉയർന്നുവന്നിരിക്കുന്നത്.
