ബാഗ്ദാദ്: മേഖലയിലെ സംഘർഷങ്ങളിൽ നിന്ന് വിട്ടുനിൽക്കാൻ ഇറാഖ് നടത്തുന്ന ശ്രമങ്ങൾക്കിടെ, രാജ്യത്തെ സൈനിക കേന്ദ്രങ്ങൾക്ക് നേരെയുണ്ടായ തുടർച്ചയായ ആക്രമണങ്ങൾ നയതന്ത്രപ്രതിസന്ധി രൂക്ഷമാക്കുന്നു. ഇന്ന് പുലർച്ചെ പടിഞ്ഞാറൻ ഇറാഖിലെ അൻബാർ പ്രവിശ്യയിലുള്ള പ്രതിരോധ മന്ത്രാലയത്തിന് കീഴിലെ ഹെൽത്ത് ക്ലിനിക്കിന് നേരെ നടന്ന വ്യോമാക്രമണത്തിൽ ഏഴ് ഇറാഖി സൈനികർ കൊല്ലപ്പെട്ടു. ഈ ആക്രമണത്തെത്തുടർന്ന് അമേരിക്കൻ എംബസിയിലെ ചാർജ് ഡി അഫയേഴ്സിനെ വിളിച്ചുവരുത്തി പ്രതിഷേധം അറിയിക്കാൻ ഇറാഖ് വിദേശകാര്യ മന്ത്രാലയം തീരുമാനിച്ചു.
ആക്രമണം നടത്തിയത് ആരാണെന്ന് പ്രതിരോധ മന്ത്രാലയം ഔദ്യോഗികമായി വെളിപ്പെടുത്തിയിട്ടില്ലെങ്കിലും, അമേരിക്കയുടെ നടപടികൾ അന്താരാഷ്ട്ര നിയമങ്ങളുടെ ലംഘനമാണെന്ന് ഇറാഖി സൈനിക വക്താവ് സബാഹ് അൽ-നുമാൻ കുറ്റപ്പെടുത്തി. “രാജ്യത്തെ പ്രാദേശിക സംഘർഷങ്ങളിൽ നിന്ന് മാറ്റിനിർത്താൻ ഞങ്ങൾ രാഷ്ട്രീയമായും പ്രായോഗികമായും കഠിനശ്രമം നടത്തുന്നുണ്ടെങ്കിലും, ഞങ്ങളുടെ സൈനിക യൂണിറ്റുകൾക്ക് നേരെയുള്ള ആക്രമണങ്ങൾ തുടരുകയാണ്,” അദ്ദേഹം പ്രസ്താവനയിൽ പറഞ്ഞു. ഈ നടപടി ഇറാഖും അമേരിക്കയും തമ്മിലുള്ള ബന്ധത്തെ വഷളാക്കുമെന്നും അദ്ദേഹം മുന്നറിയിപ്പ് നൽകി.
കഴിഞ്ഞ ദിവസങ്ങളിലും ഇറാഖിൽ സമാനമായ ആക്രമണങ്ങൾ റിപ്പോർട്ട് ചെയ്യപ്പെട്ടിരുന്നു. ഇറാൻ അനുകൂല ഷിയാ മിലിഷ്യകളുടെ കൂട്ടായ്മയായ പോപ്പുലർ മൊബിലൈസേഷൻ ഫോഴ്സിന്റെ (PMF) ആസ്ഥാനത്തിന് നേരെ നടന്ന അമേരിക്കൻ-ഇസ്രായേൽ വ്യോമാക്രമണത്തിൽ 15 പേർ കൊല്ലപ്പെട്ടിരുന്നു. കൂടാതെ, ഇർബിലിലെ കുർദിഷ് പെഷ്മെർഗ പോരാളികളുടെ ക്യാമ്പിന് നേരെ ഇറാൻ നടത്തിയ മിസൈൽ ആക്രമണത്തിൽ ആറ് പേർ കൊല്ലപ്പെടുകയും 30 പേർക്ക് പരിക്കേൽക്കുകയും ചെയ്തു. സ്വന്തം പരമാധികാരം സംരക്ഷിക്കുന്നതിലും ഇത്തരം ഉത്തരവാദിത്തമില്ലാത്ത നടപടികളെ അപലപിക്കുന്നതിലും ഇറാഖ് വിദേശകാര്യ മന്ത്രി അമേരിക്കൻ പ്രതിനിധിയോട് ശക്തമായ നിലപാട് വ്യക്തമാക്കുമെന്നും വക്താവ് കൂട്ടിച്ചേർത്തു.
