സിഡ്നി: ഇസ്രയേൽ പ്രസിഡന്റ് ഐസക് ഹെർസോഗിന്റെ ഓസ്ട്രേലിയൻ സന്ദർശനത്തിനെതിരെ നടന്ന പ്രതിഷേധത്തിനിടെ ഉണ്ടായ അക്രമസംഭവങ്ങളിൽ പോലീസ് നടപടികൾ ന്യായീകരിച്ച് ഓസ്ട്രേലിയൻ അധികൃതർ. സിഡ്നിയിൽ തിങ്കളാഴ്ച രാത്രി നടന്ന പ്രതിഷേധത്തിനിടെ പോലീസ് പ്രതിഷേധക്കാരുമായി ഏറ്റുമുട്ടിയതിന്റെ ദൃശ്യങ്ങൾ പുറത്തുവന്നിരുന്നു.
പ്രതിഷേധത്തിനിടെ പോലീസ് പ്രതിഷേധക്കാരെ അടിക്കുകയും ബലപ്രയോഗത്തിലൂടെ നീക്കം ചെയ്യുകയും ചെയ്തതായി ദൃശ്യങ്ങളിൽ കാണാം. ഈ സംഭവങ്ങളിൽ സംസ്ഥാന നിയമസഭയിലെ ഒരു എംപിയുൾപ്പെടെ നിരവധി പേർക്ക് പരിക്കേറ്റതായി റിപ്പോർട്ടുണ്ട്. 27 പേരെ അറസ്റ്റ് ചെയ്തതായും, ഒമ്പത് പേർക്കെതിരെ കേസെടുത്തതായും, 10 പോലീസ് ഉദ്യോഗസ്ഥർക്കെതിരെയും
ആക്രമണമുണ്ടായതായും പോലീസ് അറിയിച്ചു.
പോലീസ് “അത്യന്തം സംയമനം” പാലിച്ചുവെന്നും ആവശ്യമായ നടപടികളാണ് സ്വീകരിച്ചതെന്നും ന്യൂ സൗത്ത് വെയിൽസ് പോലീസ് കമ്മീഷണർ മാൽ ലാന്യൻ പറഞ്ഞു. ഹെർസോഗിന്റെ സന്ദർശനവുമായി ബന്ധപ്പെട്ട് പ്രതിഷേധങ്ങൾ നിയന്ത്രിക്കാൻ പോലീസ് ഏർപ്പെടുത്തിയ നിയന്ത്രണങ്ങൾ നീക്കണമെന്നാവശ്യപ്പെട്ട് പ്രതിഷേധസംഘാടകർ കോടതിയെ സമീപിച്ചിരുന്നെങ്കിലും ഹർജി തള്ളിയിരുന്നു.
ബോണ്ടി ബീച്ചിൽ ഉണ്ടായ യഹൂദ വിരുദ്ധ ആക്രമണത്തിന്റെ പശ്ചാത്തലത്തിലാണ് ഹെർസോഗിനെ ഓസ്ട്രേലിയയിലേക്ക് ക്ഷണിച്ചതെന്ന് സർക്കാർ അറിയിച്ചു. ഇത് യഹൂദ സമൂഹത്തിന് ആശ്വാസമാകുമെന്ന് സർക്കാർ വാദിച്ചു. എന്നാൽ പ്രൊ-പാലസ്തീൻ സംഘടനകൾ ഈ സന്ദർശനത്തെ ശക്തമായി എതിർത്തു. സിഡ്നി ടൗൺ ഹാളിന് പുറത്തും പരിസര പ്രദേശങ്ങളിലുമായിരുന്നു പ്രതിഷേധം. ഏകദേശം 6,000 പേർ പങ്കെടുത്തുവെന്നാണ് പോലീസ് കണക്ക്, എന്നാൽ സംഘാടകർ 50,000 പേരുണ്ടായിരുന്നുവെന്ന് അവകാശപ്പെട്ടു. പ്രതിഷേധത്തിനിടെ പോലീസ് മുസ്ലിം പുരുഷന്മാരെ പ്രാർത്ഥനയ്ക്കിടെ വലിച്ചിഴച്ച് നീക്കുന്നതടക്കമുള്ള സംഭവങ്ങളും റിപ്പോർട്ട് ചെയ്തു.
പാലസ്തീൻ ആക്ഷൻ ഗ്രൂപ്പിലെ ജോഷ് ലീസ്, സമീപകാലത്ത് കണ്ട ഏറ്റവും മോശം അക്രമമാണിതെന്ന് പ്രതികരിച്ചു. മാർച്ചിന് അനുമതി നൽകിയിരുന്നെങ്കിൽ പ്രശ്നങ്ങൾ ഒഴിവാക്കാമായിരുന്നുവെന്നും അദ്ദേഹം പറഞ്ഞു. ഡിസംബറിൽ നടന്ന വെടിവെപ്പിന് പിന്നാലെ പൊതുപ്രതിഷേധങ്ങൾക്ക് നിയന്ത്രണം ഏർപ്പെടുത്തിയിരുന്നു. ഹെർസോഗിന്റെ സന്ദർശനത്തിന് മുൻപ് ‘മേജർ ഇവന്റ്’ ചട്ടങ്ങൾ കൂടി നടപ്പാക്കി, മാർച്ചുകൾ നിരോധിക്കുകയും സ്ഥലത്ത് നിൽക്കുന്ന പ്രതിഷേധങ്ങൾക്ക് മാത്രം അനുമതി നൽകുകയും ചെയ്തു. ഈ ചട്ടങ്ങൾ ചോദ്യം ചെയ്ത നിയമനടപടി പ്രതിഷേധത്തിന് തൊട്ടുമുമ്പ് തള്ളിയിരുന്നു.
മുഖ്യമന്ത്രി ക്രിസ് മിൻസ്, പോലീസ് “അസാധ്യമായ സാഹചര്യത്തിലാണ്” പ്രവർത്തിച്ചതെന്ന് പറഞ്ഞു. സംഭവത്തിന്റെ പൂർണ പശ്ചാത്തലം അറിയാതെ ചെറിയ ദൃശ്യങ്ങൾ മാത്രം വിലയിരുത്തരുതെന്നും അദ്ദേഹം അഭ്യർഥിച്ചു. പ്രതിഷേധത്തിനിടെ പോലീസിനെ ഭീഷണിപ്പെടുത്തുകയും ആക്രമിക്കുകയും ചെയ്തതായി അസിസ്റ്റന്റ് കമ്മീഷണർ പീറ്റർ മകെന്ന പറഞ്ഞു. പോലീസ് എണ്ണം കുറവായിരുന്നുവെന്നും അദ്ദേഹം കൂട്ടിച്ചേർത്തു.
ടൗൺ ഹാളിലെ പ്രസംഗങ്ങൾ സമാധാനപരമായിരുന്നെങ്കിലും പിന്നീട് ‘മാർച്ച് അനുവദിക്കണം’ എന്ന മുദ്രാവാക്യങ്ങളോടെ പ്രതിഷേധം ശക്തമായി. തുടർന്ന് പോലീസ് പെപ്പർ സ്പ്രേ പ്രയോഗിച്ചു. പോലീസ് വളയം കാരണം പ്രതിഷേധക്കാർക്ക് പ്രദേശം വിട്ടുപോകാനും സാധിച്ചില്ല. ഇതിനിടെ, പ്രാർത്ഥനയ്ക്കിടെ മുസ്ലിം പുരുഷന്മാരെ ബലമായി നീക്കിയ ദൃശ്യങ്ങൾ ഞെട്ടിക്കുന്നതും അംഗീകരിക്കാനാവാത്തതുമാണെന്ന് ഓസ്ട്രേലിയൻ നാഷണൽ ഇമാംസ് കൗൺസിൽ പ്രതികരിച്ചു.
എൻഎസ്ഡബ്ല്യു ഗ്രീൻസ് എംപി അബിഗെയിൽ ബോയ്ഡ്, താൻ എംപിയാണെന്ന് അറിയിച്ചിട്ടും പോലീസ് തള്ളിയെന്നും കഴുത്തിന് പരിക്കേറ്റെന്നും ആരോപിച്ചു.പ്രധാനമന്ത്രി ആന്തണി ആൽബനീസ് സംഭവങ്ങളിൽ ദുഃഖം രേഖപ്പെടുത്തി. ഇത്തരം ദൃശ്യങ്ങൾ ഉണ്ടാകരുതായിരുന്നുവെന്നും, എന്നാൽ ഹെർസോഗിനെ ക്ഷണിച്ച തീരുമാനം ശരിയാണെന്നും അദ്ദേഹം പറഞ്ഞു. പ്രതിഷേധക്കാർ സ്വന്തം ലക്ഷ്യം തന്നെ ദുർബലപ്പെടുത്തിയെന്നും ആൽബനീസ് അഭിപ്രായപ്പെട്ടു.
ഹെർസോഗിനെതിരെ ഐക്യരാഷ്ട്രസഭാ കമ്മീഷൻ ഉന്നയിച്ച വിമർശനങ്ങളും ഗാസ യുദ്ധവുമായി ബന്ധപ്പെട്ട വിവാദ പ്രസ്താവനകളും ചൂണ്ടിക്കാട്ടിയാണ് പ്രൊ-പാലസ്തീൻ സംഘടനകൾ അദ്ദേഹത്തിന്റെ സന്ദർശനം എതിർത്തത്. എന്നാൽ റിപ്പോർട്ട് വസ്തുതാവിരുദ്ധമാണെന്ന നിലപാടിലാണ് ഇസ്രയേൽ.
Israeli President’s visit: Violence during protests; Australia justifies police actions
