ഇസ്ലാമാബാദ്: ഇറാനുമായുള്ള യുദ്ധം അവസാനിപ്പിക്കുന്നതിനും മേഖലയിൽ സമാധാനം പുനഃസ്ഥാപിക്കുന്നതിനുമുള്ള നിർണ്ണായക ചർച്ചകൾക്കായി യുഎസ് വൈസ് പ്രസിഡൻ്റ് ജെ.ഡി. വാൻസിൻ്റെ നേതൃത്വത്തിലുള്ള ഉന്നതതല സംഘം പാകിസ്താനിലേക്ക് തിരിക്കുന്നു. ശനിയാഴ്ച രാവിലെ ഇസ്ലാമാബാദിൽ വച്ച് ചർച്ചകളുടെ ആദ്യഘട്ടം ആരംഭിക്കുമെന്ന് വൈറ്റ് ഹൗസ് ഔദ്യോഗികമായി സ്ഥിരീകരിച്ചു.
പ്രസിഡൻ്റ് ഡോണൾഡ് ട്രംപിൻ്റെ പ്രത്യേക നിർദ്ദേശപ്രകാരമാണ് വാൻസ് ദൗത്യത്തിന് നേതൃത്വം നൽകുന്നത്. അമേരിക്കയുടെ പ്രത്യേക പ്രതിനിധി സ്റ്റീവ് വിറ്റ്കോഫ്, ട്രംപിൻ്റെ മരുമകനും പ്രമുഖ നയതന്ത്രജ്ഞനുമായ ജാരെഡ് കുഷ്നർ എന്നിവരും സംഘത്തിലുണ്ട്. സുരക്ഷാ കാരണങ്ങളാൽ വാൻസിൻ്റെ യാത്രയിൽ നേരത്തെ ചില ആശങ്കകൾ ഉയർന്നിരുന്നെങ്കിലും, വൈസ് പ്രസിഡൻ്റ് തന്നെ നേരിട്ട് ചർച്ചകളിൽ പങ്കെടുക്കുമെന്ന് വൈറ്റ് ഹൗസ് അറിയിച്ചു.
പാകിസ്താൻ പ്രധാനമന്ത്രി ഷഹ്ബാസ് ഷെരീഫിൻ്റെ മധ്യസ്ഥതയിൽ നിലവിൽ ഇരുരാജ്യങ്ങളും തമ്മിൽ രണ്ടാഴ്ചത്തെ വെടിനിർത്തൽ നിലവിലുണ്ട്. ഈ സാഹചര്യത്തിൽ നടക്കുന്ന നേരിട്ടുള്ള ചർച്ചകൾക്ക് വലിയ പ്രാധാന്യമാണ് അന്താരാഷ്ട്ര സമൂഹം കൽപ്പിക്കുന്നത്. ഈ കൂടിക്കാഴ്ചയിൽ മൂന്ന് പ്രധാന വിഷയങ്ങളിലായിരിക്കും ധാരണയിലെത്താൻ ശ്രമിക്കുന്നത്.
- ആഗോള എണ്ണക്കടത്തിൻ്റെ കേന്ദ്രമായ ഹോർമുസ് കടലിടുക്ക് ഇറാൻ തുറന്നുനൽകുക എന്നത് അമേരിക്കയുടെ പ്രധാന ആവശ്യമാണ്. ഇതിന് പകരമായി ഇറാനുമേലുള്ള ചില സാമ്പത്തിക ഉപരോധങ്ങൾ നീക്കുന്നത് ചർച്ചയാകും.
- ഇറാൻ്റെ പക്കലുള്ള 60% വരെ സമ്പുഷ്ടീകരിച്ച യുറേനിയം റഷ്യയിലേക്കോ മറ്റേതെങ്കിലും മൂന്നാമതൊരു രാജ്യത്തേക്കോ മാറ്റുന്നതിനെക്കുറിച്ച് സംസാരിക്കും.
- ഇരുരാജ്യങ്ങളും കസ്റ്റഡിയിലെടുത്തിട്ടുള്ള തടവുകാരെ മോചിപ്പിക്കുന്നത് സംബന്ധിച്ചും പ്രാഥമിക ചാരണകൾ നടന്നേക്കാം.
ഇറാൻ പക്ഷത്തുനിന്ന് പാർലമെന്റ് സ്പീക്കർ മുഹമ്മദ് ബാഗർ ഖാലിബാഫിന്റെ നേതൃത്വത്തിലുള്ള ഉന്നതതല സംഘമായിരിക്കും ചർച്ചകളിൽ പങ്കെടുക്കുക എന്നാണ് റിപ്പോർട്ടുകൾ. ഈ നയതന്ത്ര നീക്കം വിജയിക്കുകയാണെങ്കിൽ പശ്ചിമേഷ്യയിലെ സംഘർഷങ്ങൾക്ക് വലിയൊരളവിൽ ശമനമുണ്ടാകുമെന്നാണ് പ്രതീക്ഷിക്കപ്പെടുന്നത്.
ഒമാനും ഖത്തറും സാധാരണയായി ഇത്തരം ചർച്ചകൾക്ക് വേദിയാകാറുണ്ടെങ്കിലും, ഇത്തവണ പാകിസ്താൻ തിരഞ്ഞെടുക്കപ്പെട്ടത് ശ്രദ്ധേയമാണ്. ചൈനയുമായും ഇറാനുമായും പാകിസ്താനുള്ള അടുത്ത ബന്ധവും, ട്രംപ് ഭരണകൂടത്തിന് പാകിസ്താൻ സർക്കാരിലുള്ള വിശ്വാസവുമാണ് ഇതിന് കാരണം. പ്രധാനമന്ത്രി ഷഹ്ബാസ് ഷെരീഫ് തന്നെയാകും ചർച്ചകൾക്ക് ആതിഥേയത്വം വഹിക്കുക.
ഏപ്രിൽ 11ന് നടക്കുന്ന ആദ്യ ഘട്ട ചർച്ചയിൽ വൈസ് പ്രസിഡന്റ് ജെ.ഡി. വാൻസും ഇറാൻ പ്രതിനിധി മുഹമ്മദ് ബാഗർ ഖാലിബാഫും തമ്മിലുള്ള നേരിട്ടുള്ള കൂടിക്കാഴ്ചയാകും ഉണ്ടാകുക. ഇതിൽ ഒരു ‘റോഡ് മാപ്പ്’ തയ്യാറാക്കുകയാണ് ലക്ഷ്യം.
രാഷ്ട്രീയമായ ധാരണയുണ്ടായാൽ, ആണവ കരാറിലെയും സുരക്ഷാ കരാറിലെയും സാങ്കേതിക വശങ്ങൾ പരിശോധിക്കാൻ ഉദ്യോഗസ്ഥതല ചർച്ചകൾ പിന്നീട് നടക്കും.
ഇസ്ലാമാബാദിലെ ചർച്ചകൾ വൻ വിജയമാവുകയാണെങ്കിൽ, ഭാവിയിൽ ട്രംപും ഇറാൻ്റെ പരമോന്നത നേതാവോ പ്രസിഡൻ്റോ തമ്മിലുള്ള നേരിട്ടുള്ള കൂടിക്കാഴ്ചയ്ക്ക് ഇത് വഴിയൊരുക്കിയേക്കാം.
J.D. Vance as Trump’s peace envoy: Islamabad to be venue for direct talks with Iran, crucial meeting on Saturday
