വാഷിംഗ്ടൺ: ഏജൻ്റുമാർ നൽകിയ തെറ്റായ വിവരങ്ങളുടെ അടിസ്ഥാനത്തിൽ നാടുകടത്തപ്പെട്ട മൂന്ന് കുടിയേറ്റ കുടുംബങ്ങളെ യുഎസിലേക്ക് തിരികെ എത്തിക്കാൻ സാൻ ഡിയാഗോയിലെ ഫെഡറൽ ജഡ്ജി ഉത്തരവിട്ടു. ഇമിഗ്രേഷൻ ഏജൻ്റുമാർ “നുണകളും വഞ്ചനയും ഭീഷണിയും” ഉപയോഗിച്ചാണ് ഈ കുടുംബങ്ങളെ പുറത്താക്കിയതെന്ന് സാൻ ഡിയാഗോ ജില്ലാ ജഡ്ജി ഡാന സാബ്രോ നിരീക്ഷിച്ചു.
2018-ലെ വിവാദപരമായ ‘സീറോ ടോളറൻസ്’ നയപ്രകാരം അതിർത്തിയിൽ വെച്ച് വേർപിരിക്കപ്പെട്ടവരായിരുന്നു ഈ കുടുംബങ്ങൾ. 2023-ലെ ഒരു കോടതി ഒത്തുതീർപ്പ് പ്രകാരം ഇവർക്ക് യുഎസിൽ തുടരാൻ നിയമപരമായ അവകാശമുണ്ടായിരുന്നു.എന്നാൽ ഈ സംരക്ഷണം മറികടന്നുകൊണ്ട് കഴിഞ്ഞ വേനൽക്കാലത്ത് ഇവരെ നാടുകടത്തുകയായിരുന്നു. ഇവരെ നാടുകടത്തിയത് നിയമവിരുദ്ധമാണെന്ന് കണ്ടെത്തിയ കോടതി, സർക്കാർ ചിലവിൽ തന്നെ ഇവരെ തിരികെ കൊണ്ടുവരണമെന്ന് നിർദ്ദേശിച്ചു.
എട്ടു പേജുള്ള വിധിന്യായത്തിൽ, സർക്കാർ ഈ കുടുംബങ്ങളെ പുറത്താക്കിയത് അവർക്ക് ലഭിക്കേണ്ട നിയമപരമായ പരിരക്ഷകളെ അർത്ഥശൂന്യമാക്കിയെന്ന് ജഡ്ജി സാബ്രോ നിരീക്ഷിച്ചു. “ഈ കുടുംബങ്ങളെ പുറത്താക്കിയ രീതി നിയമവിരുദ്ധമാണെന്ന് മാത്രമല്ല, അതിൽ നുണകളും വഞ്ചനയും ഭീഷണിയും ഉൾപ്പെട്ടിട്ടുണ്ട്,” എന്ന് അദ്ദേഹം കുറിച്ചു.
ഹോണ്ടുറാസിലേക്ക് നാടുകടത്തപ്പെട്ട ഒരു അമ്മയോട്, സ്വയം യുഎസ് ഒഴിഞ്ഞുപോയില്ലെങ്കിൽ കുട്ടികളെ ദത്തെടുക്കാൻ നൽകുമെന്ന് ഉദ്യോഗസ്ഥർ ഭീഷണിപ്പെടുത്തിയതായി റിപ്പോർട്ടുകൾ വ്യക്തമാക്കുന്നു. നേരത്തെ സമർപ്പിച്ച രേഖകളിൽ, ഈ കുടുംബങ്ങളെ തിരികെ കൊണ്ടുവരാൻ ഉത്തരവിടാൻ കോടതിക്ക് അധികാരമില്ലെന്നായിരുന്നു സർക്കാർ വാദിച്ചിരുന്നത്. സാധുവായ നിയമരേഖകൾ ഉണ്ടായിരുന്നിട്ടും പുറത്താക്കപ്പെട്ട കുടുംബങ്ങൾ ഉൾപ്പെടെയുള്ളവർ “സ്വമേധയാ” ആണ് രാജ്യം വിട്ടതെന്നും സർക്കാർ വാദിച്ചിരുന്നു.
ഈ കുടുംബങ്ങൾ തിരികെ വരുന്നത് വരെ അവർക്ക് അർഹമായ ആനുകൂല്യങ്ങളും നിയമസഹായവും ഉറപ്പാക്കാൻ കോടതി നിർദ്ദേശിച്ചിട്ടുണ്ട്.
Judge orders repatriation of three immigrant families deported based on false information provided by agents at government expense
