ന്യൂയോർക്ക്: അമേരിക്കയുടെ മുൻ വൈസ് പ്രസിഡൻ്റ് കമല ഹാരിസ് 2028-ലെ പ്രസിഡൻ്റ് തിരഞ്ഞെടുപ്പിൽ വീണ്ടും ജനവിധി തേടാനൊരുങ്ങുന്നതായി സൂചന. വെള്ളിയാഴ്ച ന്യൂയോർക്ക് സിറ്റിയിൽ നടന്ന നാഷണൽ ആക്ഷൻ നെറ്റ്വർക്ക് കോൺഫറൻസിൽ വെച്ചാണ് താൻ വീണ്ടും മത്സരിക്കുന്നതിനെക്കുറിച്ച് ആലോചിക്കുന്നുണ്ടെന്ന് കമല ഹാരിസ് ആദ്യമായി വെളിപ്പെടുത്തിയത്.
സിവിൽ റൈറ്റ്സ് ഗ്രൂപ്പ് സ്ഥാപകൻ റവറൻ്റ് അൽ ഷാർപ്റ്റണുമായുള്ള സംഭാഷണത്തിനിടെ, 2028-ൽ മത്സരിക്കുമോ എന്ന ചോദ്യത്തിന് “തീർച്ചയായും, ഞാൻ അതിനെക്കുറിച്ച് ആലോചിക്കുന്നുണ്ട്” എന്ന് ഹാരിസ് മറുപടി നൽകി. 2024-ലെ തിരഞ്ഞെടുപ്പ് പരാജയത്തിന് ശേഷം തൻ്റെ രാഷ്ട്രീയ ഭാവിയെക്കുറിച്ച് ഹാരിസ് നടത്തുന്ന ഏറ്റവും ശക്തമായ പ്രതികരണമാണിത്. ‘വീണ്ടും മത്സരിക്കൂ’ (Run again) എന്ന മുദ്രാവാക്യങ്ങളോടെയാണ് അണികൾ ഈ പ്രഖ്യാപനത്തെ സ്വീകരിച്ചത്.
നാല് വർഷം പ്രസിഡൻ്റ് പദവിക്ക് തൊട്ടടുത്ത് വൈസ് പ്രസിഡന്റായി സേവനമനുഷ്ഠിച്ച വ്യക്തി എന്ന നിലയിൽ ആ പദവിയുടെ ഉത്തരവാദിത്തങ്ങളെക്കുറിച്ച് തനിക്ക് വ്യക്തമായ ധാരണയുണ്ടെന്ന് കമല ഹാരിസ് പറഞ്ഞു. ഭരണകൂടത്തിലെ അനാവശ്യമായ ചുവപ്പുനാടകൾ ഒഴിവാക്കി ജനങ്ങൾക്ക് നേരിട്ട് ഉപകാരപ്പെടുന്ന പുരോഗതി കൊണ്ടുവരികയാണ് ലക്ഷ്യമെന്നും അവർ കൂട്ടിച്ചേർത്തു.
“എനിക്ക് ഇതും കൂടി പറയാനുണ്ട്, അമേരിക്കൻ ഐക്യനാടുകളുടെ പ്രസിഡന്റ് പദവിക്ക് തൊട്ടടുത്ത് (ഒരു ഹൃദയമിടിപ്പ് അകലെ) ഞാൻ നാല് വർഷം സേവനമനുഷ്ഠിച്ചു… ആ ജോലി എന്താണെന്നും അതിന് എന്താണ് ആവശ്യമെന്നും എനിക്കറിയാം,” ഹാരിസ് പറഞ്ഞു.
“ഭരണകൂടത്തിലെ ചില ചുവപ്പുനാടകൾ ഒഴിവാക്കേണ്ടതും, ജനങ്ങൾക്ക് വേണ്ടത് നടപടിക്രമങ്ങളല്ല (process), മറിച്ച് പുരോഗതിയാണെന്ന് (progress) മനസ്സിലാക്കേണ്ടതും ഈ വിഷയത്തിന്റെ ഭാഗമാണ്,” അവർ പറഞ്ഞു. “നോക്കൂ, അധികാരത്തിൽ വരാനും നേതാവാകാനും ആഗ്രഹിക്കുന്ന ഏതൊരാളും അത് തങ്ങളെക്കുറിച്ചോ തങ്ങൾക്ക് വേണ്ട കാര്യങ്ങളെക്കുറിച്ചോ ആകരുത്, മറിച്ച് അമേരിക്കൻ ജനതയെക്കുറിച്ചായിരിക്കണം എന്ന് പ്രതീക്ഷിക്കാൻ ജനങ്ങൾക്ക് അവകാശമുണ്ട്,” അവർ കൂട്ടിച്ചേർത്തു.
“അങ്ങനെയാണ് ഞാൻ ഇതിനെ കാണുന്നത്. അമേരിക്കൻ ജനതയ്ക്ക് വേണ്ടി ആർക്ക്, എവിടെ, എങ്ങനെ മികച്ച രീതിയിൽ പ്രവർത്തിക്കാൻ കഴിയും എന്ന കാര്യത്തെക്കുറിച്ചാണ് ഞാൻ ചിന്തിക്കുന്നത്. കൂടുതൽ വിവരങ്ങൾ ഞാൻ നിങ്ങളെ അറിയിക്കാം.”- കമല വ്യക്തമാക്കി.
നേരത്തെ കമല ഹാരിസ് കാലിഫോർണിയ ഗവർണർ സ്ഥാനത്തേക്ക് മത്സരിക്കുമെന്ന് അഭ്യൂഹങ്ങൾ ഉണ്ടായിരുന്നെങ്കിലും, പുതിയ പ്രസ്താവനയോടെ അവർ വീണ്ടും ദേശീയ രാഷ്ട്രീയത്തിൽ സജീവമാകാനാണ് ലക്ഷ്യമിടുന്നതെന്ന് വ്യക്തമായി. ഇറാൻ വിഷയത്തിൽ നിലവിലെ ഭരണകൂടത്തിൻ്റെ നിലപാടുകളെയും അവർ രൂക്ഷമായി വിമർശിച്ചു. ആണവായുധ ശേഖരം നശിപ്പിച്ചെന്ന വാദം തെറ്റാണെന്നും ഹാരിസ് ചൂണ്ടിക്കാട്ടി.
“അതുകൊണ്ട് അദ്ദേഹം ഈ യുദ്ധത്തിലേക്ക് പ്രവേശിക്കുന്നു, അതൊരു ബോധപൂർവമായ യുദ്ധമാണ്. ഓർക്കുക, അവരുടെ ആണവായുധ ശേഖരം താൻ ഇല്ലാതാക്കിയെന്നും തകർത്തുവെന്നുമാണ് അദ്ദേഹം പറഞ്ഞത്. ‘ഒബ്ലിറ്ററേറ്റഡ്’ (obliterated) പോലുള്ള വാക്കുകൾ ഉപയോഗിക്കാൻ അദ്ദേഹം ഇഷ്ടപ്പെടുന്നു. അതൊരു അവ്യക്തമായ പദമല്ല, നിങ്ങൾ അത് പൂർണ്ണമായും നശിപ്പിച്ചു എന്നാണ് അതിനർത്ഥം. എന്നാൽ വ്യക്തമായും അദ്ദേഹം അത് ചെയ്തിട്ടില്ല.”- കമല പറഞ്ഞു.
ഒരു പുസ്തകം എഴുതുന്ന തിരക്കിലായതിനാൽ തന്റെ രാഷ്ട്രീയ ഭാവി സംബന്ധിച്ച പദ്ധതികൾ ഹാരിസ് ഇതുവരെ അവ്യക്തമായി നിലനിർത്തുകയായിരുന്നു. കമലാ ഹാരിസിൻ്റെ ഈ പുതിയ നീക്കം വരും വർഷങ്ങളിൽ അമേരിക്കൻ രാഷ്ട്രീയത്തിൽ വലിയ ചർച്ചകൾക്ക് വഴിവെക്കുമെന്ന് ഉറപ്പാണ്.
Kamala Harris preparing for comeback: Plans to run in 2028 presidential election
