വാഷിംഗ്ടൺ: നീല തൊപ്പിയും സ്പൈഡർമാൻ ബാക്ക്പാക്കും ധരിച്ച്, അഞ്ച് വയസ്സുകാരൻ പ്രീസ്കൂൾ വിദ്യാർത്ഥിയായ ലിയാം കൊനെജോ റാമോസ് വീട്ടിലേക്ക് മടങ്ങുകയായിരുന്നു. പെട്ടെന്നാണ്, യുഎസ് ഇമിഗ്രേഷൻ ഏജൻ്റുമാർ അവനെയും പിതാവിനെയും പിടികൂടി ടെക്സസിലെ ഒരു തടങ്കൽ കേന്ദ്രത്തിലേക്ക് കൊണ്ടുപോയത്. മിനസോട്ടയിലെ കൊളംബിയ ഹൈറ്റ്സിൽ നിന്നുള്ള കുട്ടിയെ യുഎസ് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് കസ്റ്റഡിയിലെടുത്തത് വലിയ വിവാദങ്ങൾക്കും കാരണമായി.
കഴിഞ്ഞ രണ്ടാഴ്ചയ്ക്കിടെ ആ സ്കൂൾ ഡിസ്ട്രിക്റ്റിൽ നിന്നും ഐസിഇ കസ്റ്റഡിയിലെടുക്കുന്ന നാലാമത്തെ വിദ്യാർത്ഥിയായിരുന്നു ലിയാം എന്ന് സ്കൂൾ അധികൃതർ വ്യക്തമാക്കി. ഇതിനുമുമ്പ് രണ്ട് ഹൈസ്കൂൾ വിദ്യാർത്ഥികളെയും ഒരു പത്ത് വയസ്സുകാരിയെയും ഇത്തരത്തിൽ കസ്റ്റഡിയിലെടുത്തിരുന്നു.
ലിയാമിനെ പിതാവിനെ പിടികൂടാനുള്ള ഒരു ‘ഇര’ ആയി ഉദ്യോഗസ്ഥർ ഉപയോഗിച്ചു എന്നാണ് സ്കൂൾ അധികൃതരും മനുഷ്യാവകാശ പ്രവർത്തകരും ആരോപിക്കുന്നത്. സ്കൂളിൽ നിന്ന് മടങ്ങി വരുന്ന സമയത്ത് പിതാവിനൊപ്പം ലിയാമിനെ തടഞ്ഞുവെക്കുകയും, വീട്ടിലുള്ള മറ്റുള്ളവരെ പുറത്തിറക്കാൻ കുട്ടിയെക്കൊണ്ട് വാതിലിൽ മുട്ടിക്കുകയും ചെയ്തുവെന്നും ആരോപണമുണ്ട്.
എന്നാൽ ഈ ആരോപണങ്ങൾ ഐസിഇ നിഷേധിച്ചു. പിതാവ് ഓടി രക്ഷപ്പെടാൻ ശ്രമിച്ചപ്പോൾ കുട്ടിയെ സുരക്ഷിതമായി നോക്കുക മാത്രമാണ് ചെയ്തതെന്നാണ് അവരുടെ വിശദീകരണം. യുഎസ് വൈസ് പ്രസിഡൻ്റ് ജെ.ഡി. വാൻസ് ഈ നടപടിയെ ന്യായീകരിക്കുകയും ചെയ്തു.
കമല ഹാരിസ് ഉൾപ്പെടെയുള്ള രാഷ്ട്രീയ നേതാക്കൾ ഈ സംഭവത്തെ ശക്തമായി അപലപിച്ചിട്ടുണ്ട്. ലിയാം വെറുമൊരു കുഞ്ഞാണെന്നും അവൻ തൻ്റെ കുടുംബത്തോടൊപ്പം വീട്ടിലുണ്ടാകേണ്ടവനാണെന്നും കമല ഹാരിസ് പറഞ്ഞു. ഒരു കുഞ്ഞിനെ ടെക്സസിലെ ഇമിഗ്രേഷൻ സെന്ററിൽ തടഞ്ഞുവെക്കുന്നതിനെതിരെ അവർ ശക്തമായ പ്രതിഷേധം രേഖപ്പെടുത്തി. ട്രംപ് ഭരണകൂടത്തിൻ്റെ ഇത്തരം നടപടികൾ വലിയ അനീതിയാണെന്നും ഇതിനെതിരെ എല്ലാവരും പ്രതികരിക്കണമെന്നും അവർ ആവശ്യപ്പെട്ടു.
“ലിയാം റാമോസ് വെറും ഒരു കുഞ്ഞാണ്. അവൻ കുടുംബത്തോടൊപ്പം വീട്ടിലിരിക്കണം, ഐസിഇയുടെ ഇരയായി ഉപയോഗിക്കപ്പെടുകയും ടെക്സസിലെ ഒരു തടങ്കൽ കേന്ദ്രത്തിൽ പാർപ്പിക്കുകയും ചെയ്യരുത്. ഞാൻ പ്രകോപിതനാണ്, നിങ്ങളും അങ്ങനെ തന്നെ ആയിരിക്കണം.”- ഡെമോക്രാറ്റ് നേതാവ് കമല ഹാരിസ് ആൺകുട്ടിയുടെ ചിത്രവും പങ്കിട്ടുകൊണ്ട് സമൂഹമാധ്യമത്തിൽ കുറിച്ചു.
Liam Ramos is just a baby. He should be at home with his family, not used as bait by ICE and held in a Texas detention center.
— Kamala Harris (@KamalaHarris) January 22, 2026
I am outraged, and you should be too. pic.twitter.com/djr2z1AG0N
ലിയാമിനെയും പിതാവിനെയും നിലവിൽ ടെക്സസിലെ ഒരു ഡിറ്റൻഷൻ സെന്ററിലേക്ക് മാറ്റിയിരിക്കുകയാണ്. ഇക്വഡോറിൽ നിന്നുള്ള ആൺകുട്ടിയും പിതാവും നിയമവിരുദ്ധമായല്ല താമസിക്കുന്നതെന്നും ഇവർക്ക് സാധുവായ അഭയ അപേക്ഷ ഉണ്ടെന്നും കുടുംബത്തിന്റെ അഭിഭാഷകൻ വാർത്താ ഏജൻസിയായ റോയിട്ടേഴ്സിനോട് പറഞ്ഞു.
Kamala Harris slams ICE for arresting 5-year-old in immigration raid.
