വാഷിംഗ്ടൺ: ഇറാനുമായുള്ള നയതന്ത്ര ചർച്ചകൾ പൂർത്തിയാക്കിയ ഉടൻ, അമേരിക്കൻ മിഡിൽ ഈസ്റ്റ് പ്രതിനിധി സ്റ്റീവ് വിറ്റ്കോഫും പ്രസിഡന്റ് ട്രംപിന്റെ മരുമകൻ ജാരെഡ് കുഷ്നറും യുഎസ്എസ് എബ്രഹാം ലിങ്കൺ വിമാനവാഹിനിക്കപ്പൽ സന്ദർശിച്ചു. യുഎസ് സെൻട്രൽ കമാൻഡ് മേധാവി അഡ്മിറൽ ബ്രാഡ് കൂപ്പറിന്റെ ക്ഷണപ്രകാരമാണ് ഇവർ കപ്പലിലെത്തിയത്. മേഖലയിൽ സേവനമനുഷ്ഠിക്കുന്ന അമേരിക്കൻ സൈനികർക്ക് നന്ദി അറിയിക്കുക എന്നതായിരുന്നു സന്ദർശനത്തിന്റെ ഔദ്യോഗിക ലക്ഷ്യം.
കഴിഞ്ഞ ചൊവ്വാഴ്ച വിമാനവാഹിനിക്കപ്പലിന് നേരെ പ്രകോപനപരമായി പറന്ന ഒരു ഇറാനിയൻ ഡ്രോണിനെ വെടിവെച്ചിട്ട യുഎസ് പൈലറ്റുമായി ഇവർ കൂടിക്കാഴ്ച നടത്തി. സൈന്യത്തിന്റെ ജാഗ്രതയെ വിറ്റ്കോഫ് എക്സിൽ പ്രശംസിച്ചു. ഒമാനിലെ മസ്കറ്റിൽ വെള്ളിയാഴ്ച നടന്ന ചർച്ചകൾക്ക് പിന്നാലെയായിരുന്നു ഈ സന്ദർശനം. ചർച്ചകൾ പുരോഗമിക്കുമ്പോഴും മേഖലയിൽ അമേരിക്കൻ സൈനിക സന്നാഹം ശക്തമായി തുടരുന്നു എന്ന സന്ദേശമാണ് ഇതിലൂടെ നൽകുന്നത്.
“ശക്തിയിലൂടെയുള്ള സമാധാനം” എന്ന ട്രംപിന്റെ നയമാണ് ഈ കപ്പലും അതിലെ സൈനികരും നടപ്പിലാക്കുന്നതെന്ന് വിറ്റ്കോഫ് കുറിച്ചു. വെള്ളിയാഴ്ച നടന്ന ചർച്ചകൾ “മികച്ച തുടക്കം” എന്നാണ് പ്രസിഡന്റ് ട്രംപും ഇറാൻ വിദേശകാര്യ മന്ത്രി അബ്ബാസ് അരാഗ്ചിയും വിശേഷിപ്പിച്ചത്. ഇറാൻ ആണവ പദ്ധതികൾ ഉപേക്ഷിക്കുക, മിസൈൽ പരീക്ഷണങ്ങൾ നിയന്ത്രിക്കുക എന്നിവയാണ് അമേരിക്കയുടെ പ്രധാന ആവശ്യങ്ങൾ. എന്നാൽ സാമ്പത്തിക ഉപരോധങ്ങൾ നീക്കുന്നതിലാണ് ഇറാന്റെ താല്പര്യം. വരും ദിവസങ്ങളിൽ മസ്കറ്റിൽ രണ്ടാം ഘട്ട ചർച്ചകൾ നടക്കുമെന്ന് പ്രതീക്ഷിക്കുന്നു.
