വാഷിംഗ്ടൺ: മിഡിൽ ഈസ്റ്റിൽ സംഘർഷം കനക്കുന്നതിനിടെ ഇറാനിയൻ ഡ്രോണുകളെ നേരിടാൻ പുതിയ ആൻ്റി-ഡ്രോൺ സംവിധാനമായ ‘മെറോപ്സ്’ (Merops) വിന്യസിക്കാൻ അമേരിക്ക ഒരുങ്ങുന്നു. ഇറാൻ്റെ പക്കലുള്ള ഷാഹെദ് (Shahed) ഡ്രോണുകളെ തടയുന്നതിൽ നിലവിലെ പ്രതിരോധ സംവിധാനങ്ങൾ പരാജയപ്പെടുന്നു എന്ന തിരിച്ചറിവിനെത്തുടർന്നാണ് പെൻ്റഗണിൻ്റെ ഈ നീക്കം.
ഇറാനെതിരെ അമേരിക്ക നടത്തുന്ന ‘ഓപ്പറേഷൻ എപ്പിക് ഫ്യൂറി’യുടെ ഭാഗമായി മിഡിൽ ഈസ്റ്റിലെ യുഎസ് സൈനികർക്ക് പരമാവധി സുരക്ഷ ഉറപ്പാക്കുകയാണ് ലക്ഷ്യമെന്ന് പ്രതിരോധ സെക്രട്ടറി പീറ്റ് ഹെഗ്സെത്ത് പറഞ്ഞു. വരും ദിവസങ്ങളിൽ തന്നെ ഈ സംവിധാനം മേഖലയിൽ പ്രവർത്തനസജ്ജമാകും.
എന്താണ് മെറോപ്സ്?
പെരനിയൽ ഓട്ടോണമി എന്ന കമ്പനി വികസിപ്പിച്ചെടുത്ത, കൃത്രിമബുദ്ധി (AI) ഉപയോഗിച്ച് പ്രവർത്തിക്കുന്ന ചെറിയ വിമാനങ്ങളാണ് മെറോപ്സ്. ഇതിനെ ‘ഡ്രോണുകളെ വേട്ടയാടുന്ന ഡ്രോൺ’ എന്ന് വിശേഷിപ്പിക്കാം. ആശയവിനിമയ സംവിധാനങ്ങൾ ജാം ചെയ്യപ്പെട്ടാലും സ്വയം പറക്കാനും ശത്രു ഡ്രോണുകളെ കണ്ടെത്തി നശിപ്പിക്കാനുമുള്ള കഴിവാണ് ഇതിൻ്റെ ഹൈലൈറ്റ്.
നിലവിൽ പേട്രിയറ്റ്, താഡ് തുടങ്ങിയ കോടികൾ വിലയുള്ള മിസൈൽ പ്രതിരോധ സംവിധാനങ്ങളാണ് ഡ്രോണുകളെ തടയാൻ യുഎസ് ഉപയോഗിക്കുന്നത്. വെറും 50,000 ഡോളർ മാത്രം വിലയുള്ള ഇറാനിയൻ ഡ്രോണുകളെ തകർക്കാൻ ദശലക്ഷക്കണക്കിന് ഡോളർ ചിലവഴിക്കുന്നത് വലിയ സാമ്പത്തിക ബാധ്യതയാണെന്ന് യുഎസ് അധികൃതർ ചൂണ്ടിക്കാട്ടുന്നു. ഇതിന് പരിഹാരമായാണ് ചിലവ് കുറഞ്ഞതും എന്നാൽ ഫലപ്രദവുമായ മെറോപ്സ് വിന്യസിക്കുന്നത്.
മാത്രമല്ല, റഷ്യ-യുക്രെയ്ൻ യുദ്ധഭൂമിയിലും പോളണ്ട്, റൊമാനിയ തുടങ്ങിയ നാറ്റോ രാജ്യങ്ങളിലും ഇതിനകം മെറോപ്സ് കരുത്ത് തെളിയിച്ചിട്ടുണ്ട്. ഷാഹെദ് ഡ്രോണുകളെ പ്രതിരോധിക്കുന്നതിൽ യുക്രെയ്നിൻ്റെ സഹായം യുഎസ് തേടിയതായി പ്രസിഡൻ്റ് വൊളോഡിമിർ സെലൻസ്കിതന്നെ വ്യക്തമാക്കിയിട്ടുണ്ട്.
‘Merops’ ready to destroy Iran’s Shahed drones, America tightens defenses in the Middle East
