മിനിയാപൊളിസ്: അമേരിക്കയിലെ മിനിയാപൊളിസിൽ ഇമിഗ്രേഷൻ വിഭാഗം നടത്തുന്ന നടപടികൾക്കിടെ വെടിയേറ്റ് ഒരു യുവതി കൊല്ലപ്പെട്ട സംഭവത്തെത്തുടർന്ന് നഗരത്തിൽ ഭരണകൂടവും ഫെഡറൽ ഏജന്റുമാരും തമ്മിലുള്ള പോരാട്ടം രൂക്ഷമാകുന്നു. “മിനിയാപൊളിസിൽ നിന്ന് ഉടൻ പുറത്തുപോകൂ” എന്ന് ഫെഡറൽ ഏജന്റുമാർക്ക് മേയർ ജേക്കബ് ഫ്രേ കർശനമായ താക്കീത് നൽകി. കുടിയേറ്റക്കാരെ പിടികൂടാനുള്ള ഫെഡറൽ നീക്കത്തിനെതിരെ പ്രതിഷേധിച്ച റെനി നിക്കോൾ ഗുഡ് എന്ന 37-കാരി ജനുവരി ഏഴിന് ഏജന്റിന്റെ വെടിയേറ്റ് കൊല്ലപ്പെട്ടതാണ് നഗരത്തെ പ്രക്ഷുബ്ധമാക്കിയത്.
ഇതിന് പിന്നാലെ ബുധനാഴ്ച രാത്രി മറ്റൊരു പ്രവാസിയുടെ കാലിന് ഫെഡറൽ ഏജന്റിന്റെ വെടിയേറ്റതോടെ സ്ഥിതിഗതികൾ കൂടുതൽ വഷളായി. തന്നെ ആക്രമിക്കാൻ ശ്രമിച്ചപ്പോഴാണ് വെടിയുതിർത്തതെന്നാണ് ഏജന്റിന്റെ വിശദീകരണം. “പ്രസിഡന്റ് ട്രംപിന്റെ അരാജകത്വത്തെ നമ്മുടെ നഗരത്തിലെ അരാജകത്വം കൊണ്ട് നേരിടാൻ കഴിയില്ല” എന്ന് മേയർ ഫ്രേ പറഞ്ഞു. സമാധാനപരമായ പ്രതിഷേധങ്ങളെ അദ്ദേഹം സ്വാഗതം ചെയ്തെങ്കിലും അക്രമാസക്തമായ നീക്കങ്ങളിൽ നിന്ന് വിട്ടുനിൽക്കാൻ പ്രതിഷേധക്കാരോട് അഭ്യർത്ഥിച്ചു.
നഗരത്തിലെ പ്രതിഷേധങ്ങളെ അടിച്ചമർത്താൻ സൈന്യത്തെ ഇറക്കുമെന്ന് പ്രസിഡന്റ് ഡോണൾഡ് ട്രംപ് ഭീഷണിപ്പെടുത്തിയിട്ടുണ്ട്. മിനസോട്ടയിലെ രാഷ്ട്രീയക്കാരെ ‘അഴിമതിക്കാർ’ എന്ന് വിശേഷിപ്പിച്ച അദ്ദേഹം, ഐസിഇ ഏജന്റുമാരെ സംരക്ഷിക്കാൻ ഏതറ്റം വരെയും പോകുമെന്ന് വ്യക്തമാക്കി. മിനസോട്ട സംസ്ഥാന ഭരണകൂടവും മിനിയാപൊളിസ്, സെന്റ് പോൾ നഗരസഭകളും ചേർന്ന് ഫെഡറൽ നടപടികൾ തടയുന്നതിനായി കോടതിയെ സമീപിച്ചു. ഫെഡറൽ ഏജന്റുമാർ നഗരത്തിൽ ഭീതി വിതയ്ക്കുകയാണെന്ന് അറ്റോർണി ജനറൽ കീത്ത് എലിസൺ കുറ്റപ്പെടുത്തി.
സംഘർഷം വ്യാപിക്കുന്ന പശ്ചാത്തലത്തിൽ ഗവർണർ ടിം വാൾസ് സംസ്ഥാനത്തെ നാഷണൽ ഗാർഡിനോട് ജാഗ്രത പാലിക്കാൻ നിർദ്ദേശിച്ചു.
രണ്ടായിരത്തിലധികം ഫെഡറൽ ഏജന്റുമാരെയാണ് കുടിയേറ്റ വിരുദ്ധ നടപടികൾക്കായി ട്രംപ് ഭരണകൂടം മിനിയാപൊളിസിലേക്ക് അയച്ചിരിക്കുന്നത്. പ്രാദേശിക സർക്കാരുകളുടെ ശക്തമായ എതിർപ്പിനെ അവഗണിച്ചുകൊണ്ട് ഫെഡറൽ ഏജൻസികൾ നീങ്ങുന്നത് അമേരിക്കയിൽ വലിയ നയതന്ത്ര-നിയമ പ്രതിസന്ധിക്ക് കാരണമായിരിക്കുകയാണ്.
