വാഷിംഗ്ടൺ: മിനസോട്ടയിൽ വെച്ച് ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെൻ്റ് (ഐസിഇ) കസ്റ്റഡിയിലെടുത്ത അഞ്ച് വയസ്സുകാരനായ ലിയാം കൊനെജോ റാമോസും പിതാവ് അഡ്രിയാൻ അലക്സാണ്ടർ കൊനെജോ ആരിയസും തിരികെ വീട്ടിലെത്തിയതായി യുഎസ് കോൺഗ്രസ് അംഗം അറിയിച്ചു. ടെക്സസിലെ ഡില്ലി ഡിറ്റൻഷൻ സെൻ്ററിൽ നിന്ന് മോചിതരായ ഇരുവരും മിനിയാപൊളിസിലേക്ക് മടങ്ങിയതായി ടെക്സാസ് കോൺഗ്രസ് അംഗം ജോക്വിൻ കാസ്ട്രോയാണ് ഞായറാഴ്ച അറിയിച്ചത്. “ലിയാം ഇപ്പോൾ വീട്ടിലുണ്ട്. അവൻ്റെ തൊപ്പിയും ബാഗുമായി അവൻ മടങ്ങിയെത്തി,” കാസ്ട്രോ പറഞ്ഞു.
മിനസോട്ടയിൽ നിന്നുള്ള കോൺഗ്രസ് അംഗം ഇൽഹാൻ ഒമറും ലിയാമിൻ്റെയും പിതാവിൻ്റെയും മടങ്ങിവരവിൽ സന്തോഷം പ്രകടിപ്പിച്ചു. ലിയാമിനെ മിനിയാപൊളിസിലേക്ക് അനുഗമിച്ച ജോക്വിൻ കാസ്ട്രോയ്ക്ക് അവർ നന്ദി അറിയിക്കുകയും ചെയ്തു.
ഇരുവരെയും തടഞ്ഞുവെച്ച നടപടി വലിയ പ്രതിഷേധങ്ങൾക്കും ആഗോളതലത്തിൽ തന്നെ വൻ രോഷത്തിനും ട്രംപ് ഭരണകൂടത്തിനെതിരായ വ്യാപക വിമർശനത്തിനും ഇടയാക്കിയിരുന്നു. എന്നാൽ കുട്ടിയെ ലക്ഷ്യം വെക്കുകയോ അറസ്റ്റ് ചെയ്യുകയോ ചെയ്തിട്ടില്ലെന്നാണ് ഡിപ്പാർട്ട്മെൻ്റ് ഓഫ് ഹോംലാൻഡ് സെക്യൂരിറ്റി (DHS) വ്യക്തമാക്കിയത്. കുടുംബത്തിൻ്റെ അഭിഭാഷകൻ നൽകിയ അടിയന്തര അപേക്ഷ പരിഗണിച്ച് ശനിയാഴ്ച ഇവരെ വിട്ടയക്കാൻ യുഎസ് ഡിസ്ട്രിക്റ്റ് ജഡ്ജി ഫ്രെഡ് ബിയറി ഉത്തരവിടുകയായിരുന്നു. “അനിയന്ത്രിതമായ അധികാരത്തോടുള്ള വഞ്ചനാപരമായ മോഹമാണ്” ഈ നടപടിക്ക് പിന്നിലെന്ന് ജഡ്ജി വിമർശിച്ചു. കുട്ടികളെ മാനസികമായി തളർത്തിക്കൊണ്ടാണെങ്കിലും നാടുകടത്തൽ ക്വാട്ട തികയ്ക്കാനുള്ള സർക്കാരിൻ്റെ കഴിവില്ലായ്മയാണ് ഈ കേസിന് ആധാരമെന്നും അദ്ദേഹം തൻ്റെ വിധിന്യായത്തിൽ കുറിച്ചു.
പിതാവും മകനും നിയമവിരുദ്ധമായാണ് അമേരിക്കയിൽ പ്രവേശിച്ചതെന്ന് ഹോംലാൻഡ് സെക്യൂരിറ്റി വിഭാഗം ആവർക്കുമ്പോഴും, അഭയം തേടുന്നതിനുള്ള എല്ലാ നടപടിക്രമങ്ങളും പാലിച്ചിട്ടുണ്ടെന്നാണ് കുടുംബത്തിൻ്റെ അഭിഭാഷകൻ പറയുന്നത്. സിബിപി വൺ (CBP One) ആപ്പ് വഴി അപ്പോയിൻ്റ്മെൻ്റ് എടുത്ത് കൃത്യമായ രേഖകളുമായാണ് ഇവർ എത്തിയതെന്ന് അഭിഭാഷകൻ മാർക്ക് പ്രോകോഷ് വ്യക്തമാക്കി.
ഇവരെ കസ്റ്റഡിയിലെടുത്ത സാഹചര്യത്തെക്കുറിച്ച് പരസ്പരവിരുദ്ധമായ റിപ്പോർട്ടുകളാണ് വരുന്നത്. ലിയാം പ്രീ-സ്കൂളിൽ നിന്ന് വീട്ടിലെത്തിയപ്പോൾ, വീട്ടിൽ മറ്റാരെങ്കിലും ഉണ്ടോ എന്ന് നോക്കാൻ കുട്ടിയോട് വാതിലിൽ മുട്ടാൻ ഐസിഇ ഉദ്യോഗസ്ഥർ ആവശ്യപ്പെട്ടതായി സ്കൂൾ അധികൃതർ പറയുന്നു. എന്നാൽ ലിയാമിനെ പിതാവ് ഉപേക്ഷിച്ച് ഓടിപ്പോയതാണെന്നും കഠിനമായ തണുപ്പിൽ നിന്ന് കുട്ടിയെ രക്ഷിക്കുകയാണ് തങ്ങൾ ചെയ്തതെന്നുമാണ് ഐസിഇയുടെ വാദം.
Moments of relief: Five-year-old boy and father taken into ICE custody return to Minnesota
