വാഷിംഗ്ടൺ: നാറ്റോ (NATO) സഖ്യരാജ്യങ്ങൾക്കെതിരെ കടുത്ത വിമർശനവുമായി അമേരിക്കൻ പ്രസിഡൻ്റ് ഡോണൾഡ് ട്രംപ്. നാറ്റോ തലവൻ മാർക്ക് റുട്ടയുമായി വൈറ്റ് ഹൗസിൽ നടത്തിയ കൂടിക്കാഴ്ചയ്ക്ക് പിന്നാലെ തൻ്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് ട്രംപ് നിലപാട് വ്യക്തമാക്കിയത്.
“നമുക്ക് ആവശ്യമുള്ളപ്പോൾ നാറ്റോ കൂടെയുണ്ടായിരുന്നില്ല, ഇനി ഒരു ആവശ്യം വന്നാലും അവർ കൂടെയുണ്ടാകില്ല. ഗ്രീൻലൻഡിൻ്റെ കാര്യം ഓർക്കുക—അതൊരു വലിയ, മോശമായി ഭരിക്കപ്പെടുന്ന വെറും മഞ്ഞുപാളിയാണ്!” എന്നാണ് ട്രംപ് കുറിച്ചത്.
ഇസ്രായേലുമായി ചേർന്ന് ഇറാനെതിരെ അമേരിക്ക നടത്തിയ സൈനിക നടപടികളിൽ നാറ്റോ രാജ്യങ്ങൾ പിന്തുണ നൽകാത്തതാണ് ട്രംപിനെ ചൊടിപ്പിച്ചത്. അമേരിക്കൻ ജനതയുടെ പണം കൊണ്ട് സംരക്ഷണം നേടുന്നവർക്ക് തിരിച്ചൊരു സഹായം ചെയ്യാൻ താല്പര്യമില്ലെന്ന് ട്രംപ് കുറ്റപ്പെടുത്തി.
ഡാനിഷ് അധീനതയിലുള്ള ഗ്രീൻലൻഡ് പ്രദേശം അമേരിക്കയോട് ചേർക്കാനുള്ള തൻ്റെ മുൻപത്തെ താല്പര്യം ട്രംപ് വീണ്ടും സൂചിപ്പിച്ചു. ഗ്രീൻലൻഡിനെ അമേരിക്കയുടെ ഭാഗമാക്കാനുള്ള ട്രംപിൻ്റെ നീക്കത്തെ നാറ്റോ സഖ്യകക്ഷികൾ നേരത്തെ എതിർത്തിരുന്നു. അമേരിക്ക നാറ്റോ സഖ്യത്തിൽ നിന്ന് പുറത്തുപോകുന്നതിനെക്കുറിച്ച് ട്രംപ് ഗൗരവമായി ആലോചിക്കുന്നതായി വൈറ്റ് ഹൗസ് വൃത്തങ്ങൾ സൂചിപ്പിക്കുന്നു. “നമുക്ക് നാറ്റോയിൽ നിന്ന് ഒന്നും ആവശ്യമില്ല” എന്ന് അദ്ദേഹം നേരത്തെ വ്യക്തമാക്കിയിരുന്നു.
ഇറാൻ വിഷയത്തിൽ അമേരിക്കയെ പിന്തുണയ്ക്കാൻ നാറ്റോ സഖ്യകക്ഷികൾ വിസമ്മതിച്ചതിൽ ട്രംപ് വലിയ നിരാശയിലാണെന്ന് നാറ്റോ സെക്രട്ടറി ജനറൽ മാർക്ക് റുട്ട പറഞ്ഞിരുന്നു. വൈറ്റ് ഹൗസിൽ ബുധനാഴ്ച നടന്ന അടച്ചിട്ട മുറിയിലെ കൂടിക്കാഴ്ചയ്ക്ക് ശേഷം സംസാരിക്കുകയായിരുന്നു അദ്ദേഹം. സഖ്യത്തിൽ നിന്ന് അമേരിക്ക പിന്മാറുമെന്ന ഭീഷണി ട്രംപ് കൂടിക്കാഴ്ചയിൽ ആവർത്തിച്ചോ എന്ന ചോദ്യത്തിന് റുട്ട നേരിട്ട് മറുപടി നൽകിയില്ല. എന്നാൽ “രണ്ട് സുഹൃത്തുക്കൾ തമ്മിലുള്ള വളരെ തുറന്നതും വ്യക്തവുമായ ചർച്ചയാണ് നടന്നത്” എന്ന് അദ്ദേഹം വിശേഷിപ്പിച്ചു. ഇറാൻ ആക്രമണങ്ങൾക്ക് ശേഷം ലോകം കൂടുതൽ സുരക്ഷിതമാണെന്ന് അദ്ദേഹം അഭിപ്രായപ്പെട്ടെങ്കിലും, ട്രംപിൻ്റെ അതൃപ്തി പരിഹരിക്കാനായോ എന്നതിൽ വ്യക്തതയില്ല.
തനിക്ക് ആവശ്യമുള്ളപ്പോൾ സൈനിക സഹായം നൽകാത്ത നാറ്റോ സഖ്യത്തെ കടലാസ് പുലി എന്നാണ് ട്രംപ് വിശേഷിപ്പിച്ചത്. അമേരിക്ക ഇത്രയും കാലം സംരക്ഷിച്ചവർ നിർണ്ണായക ഘട്ടത്തിൽ കൈവിട്ടത് അംഗീകരിക്കാനാവില്ലെന്ന നിലപാടിലാണ് അദ്ദേഹം.
“NATO wasn’t there when America needed it; Greenland is an ice sheet”; Trump’s attack on Truth Social
