ഒഹായോ: അമേരിക്കയിലെ ഒഹായോയിൽ ദന്തഡോക്ടറെയും ഭാര്യയെയും വീട്ടിൽ വെടിയേറ്റ് മരിച്ച നിലയിൽ കണ്ടെത്തിയ സംഭവത്തിൽ പൊലീസ് അന്വേഷണം ഊർജിതമാക്കി. കൊളംബസിലെ വെയ്ൻലാൻഡ് പാർക്ക് (വെയ്ൻലാൻഡ് പാർക്ക്) മേഖലയിലുള്ള വസതിയിലാണ് സ്പെൻസർ ടെപെ (37), ഭാര്യ മോണിക്ക് ടെപെ (39) എന്നിവരെ ഡിസംബർ 30-ന് മരിച്ച നിലയിൽ കണ്ടെത്തിയത്. ഈ സംഭവത്തിന് പിന്നിൽ ആരാണെന്ന് ഇതുവരെ തിരിച്ചറിഞ്ഞിട്ടില്ല.
ദമ്പതികൾ കൊല്ലപ്പെട്ട സമയത്ത് അവരുടെ രണ്ട് ചെറിയ കുട്ടികളും വീട്ടിലുണ്ടായിരുന്നുവെങ്കിലും അവർ സുരക്ഷിതരായിരുന്നു. വീട്ടിൽ ബലം പ്രയോഗിച്ച് അതിക്രമിച്ചു കയറിയതിൻ്റെ ലക്ഷണങ്ങൾ കണ്ടെത്തിയിട്ടില്ല. കൂടാതെ സംഭവസ്ഥലത്ത് നിന്ന് തോക്കുകളും കണ്ടെടുത്തിട്ടില്ല. ഇതൊക്കെയും ഈ സംഭവത്തിൽ സങ്കീർണത വർധിപ്പിക്കുന്നുണ്ട്.
സ്പെൻസർ ടെപ്പെയ്ക്ക് ശരീരത്തിൽ ഒന്നിലധികം തവണ വെടിയേറ്റിരുന്നു. മോണിക്കിനാകട്ടെ നെഞ്ചിന് വെടിയേറ്റ നിലയിലായിരുന്നു.
ഏതാനും വർഷങ്ങളായി ഈഥൻസ് ഡെൻ്റൽ ഡിപ്പോയിൽ ദന്തഡോക്ടറായി ജോലി ചെയ്യുകയായിരുന്നു സ്പെൻസർ ടെപെ. അദ്ദേഹം ജോലിക്ക് എത്താത്തതിനെ തുടർന്ന് സഹപ്രവർത്തകർ നൽകിയ വിവരമനുസരിച്ച് പൊലീസ് നടത്തിയ പരിശോധനയിലാണ് കൊലപാതക വിവരം പുറംലോകം അറിയുന്നത്.
Ohio dentist and wife found murdered in their home: Search intensifies for suspect
