വാഷിംഗ്ടൺ: ഉൽപ്പന്നങ്ങളിൽ രേഖപ്പെടുത്താത്ത കൃത്രിമ നിറങ്ങൾ അടങ്ങിയിട്ടുണ്ടെന്ന കണ്ടെത്തലിനെത്തുടർന്ന് യുണൈറ്റഡ് സ്റ്റേറ്റ്സിലുടനീളം വിതരണം ചെയ്ത ഏകദേശം 1,22,000 കേസുകൾ ഗെറ്റോറേഡ് (Gatorade) സ്പോർട്സ് പാനീയങ്ങൾ പെപ്സികോ തിരിച്ചുവിളിക്കുന്നതായി ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്.ഡി.എ) അറിയിച്ചു.
യു.എസിലെ 37 സംസ്ഥാനങ്ങളിൽ വിറ്റഴിക്കപ്പെട്ട 28 ഔൺസ് കുപ്പികളടങ്ങിയ ഗെറ്റോറേഡ് ലെമൺ ലൈം, ഗെറ്റോറേഡ് ലെമൺ ലൈം സീറോ, ഗെറ്റോറേഡ് ഓറഞ്ച്, ഗെറ്റോറേഡ് ഓറഞ്ച് സീറോ എന്നീ നാല് വ്യത്യസ്ത ഇനങ്ങളെയാണ് ഈ തിരിച്ചുവിളിക്കൽ ബാധിച്ചിരിക്കുന്നത്. ഉൽപ്പന്നങ്ങളുടെ നിറം വർദ്ധിപ്പിക്കാൻ ഉപയോഗിക്കുന്ന യെല്ലോ നമ്പർ 6, യെല്ലോ നമ്പർ 5 എന്നീ സിന്തറ്റിക് ഡൈകൾ ലേബലിൽ വ്യക്തമാക്കാതെ ചേർത്തതായി എഫ്.ഡി.എ ചൂണ്ടിക്കാട്ടി.
സെപ്റ്റംബർ 25-നാണ് പെപ്സികോ സ്വമേധയാ തിരിച്ചുവിളിക്കൽ നടപടികൾ ആരംഭിച്ചത്. തുടർന്ന് ഒക്ടോബർ രണ്ടിന് എഫ്.ഡി.എ ഈ നടപടിയെ ‘ക്ലാസ് II’ കാറ്റഗറിയിലേക്ക് മാറ്റി. ഇത്തരം ഉൽപ്പന്നങ്ങൾ ഉപയോഗിക്കുന്നത് താൽക്കാലികമോ വൈദ്യസഹായത്തോടെ പരിഹരിക്കാവുന്നതോ ആയ ആരോഗ്യപ്രശ്നങ്ങൾക്ക് കാരണമായേക്കാം എന്നാണ് ഈ തരംതിരിവ് വ്യക്തമാക്കുന്നത്. H-0009-2027 എന്നാണ് ഈ തിരിച്ചുവിളിക്കലിന് നൽകിയിരിക്കുന്ന ഔദ്യോഗിക തിരിച്ചറിയൽ നമ്പർ.
അലാസ്ക, അലബാമ, അർക്കൻസാസ്, അരിസോണ, കാലിഫോർണിയ, കൊളറാഡോ, ഫ്ലോറിഡ, ജോർജിയ, ഹവായ്, അയോവ, ഐഡഹോ, ഇല്ലിനോയി, ഇന്ത്യാന, കൻസാസ്, കെന്റക്കി, ലൂസിയാന, മിഷിഗൺ, മിനസോട്ട, മിസോറി, മിസിസിപ്പി, നോർത്ത് കരോലിന, നോർത്ത് ഡക്കോട്ട, നെബ്രാസ്ക, ന്യൂജേഴ്‌സി, ന്യൂ മെക്സിക്കോ, നെവാഡ, ന്യൂയോർക്ക്, ഒഹായോ, ഒക്‌‌ലഹോമ, പെൻസിൽവേനിയ, സൗത്ത് കരോലിന, സൗത്ത് ഡക്കോട്ട, ടെന്നസി, ടെക്സസ്, യൂട്ടാ, വാഷിംഗ്ടൺ, വിസ്കോൺസിൻ എന്നീ സംസ്ഥാനങ്ങളിലാണ് ഇവ വിതരണം ചെയ്തിരുന്നത്. റീക്കോൾ ചെയ്ത ഉൽപ്പന്നങ്ങൾ വാങ്ങിയ ഉപഭോക്താക്കൾക്ക് പണം തിരികെ നൽകുമോ എന്ന കാര്യത്തിൽ പെപ്സികോ ഇതുവരെ ഔദ്യോഗിക പ്രതികരണം നൽകിയിട്ടില്ല.
