വാഷിംഗ്ടൺ: അരിസോണയിൽ പൊലീസ് ഹെലികോപ്റ്റർ തകർന്നുവീണ് പൈലറ്റും ഒരു സൈനികനും മരിച്ചു. ബുധനാഴ്ച രാത്രി 10:15-ഓടെ അരിസോണയിലെ ഫ്ലാഗ്സ്റ്റാഫിലാണ് അപകടം നടന്നത്. അരിസോണ ഡിപ്പാർട്ട്മെൻ്റ് ഓഫ് പബ്ലിക് സേഫ്റ്റിയിലെ (AZDPS) പൈലറ്റായ റോബർട്ട് സ്കാങ്കി, പാരമെഡിക് കൂടിയായ ഒരു സ്റ്റേറ്റ് ട്രൂപ്പർ എന്നിവരാണ് കൊല്ലപ്പെട്ടത്.
പ്രദേശത്ത് ഒരാൾ തോക്കുപയോഗിച്ച് ജനങ്ങൾക്ക് നേരെ വെടിയുതിർക്കുന്ന സാഹചര്യത്തിൽ, പൊലീസിന് ആകാശനിരീക്ഷണം നൽകുന്നതിനായാണ് ‘റേഞ്ചർ’ ഹെലികോപ്റ്റർ എത്തിയത്. വെടിവെപ്പ് നടക്കുന്നതിനിടെയാണ് അപകടം സംഭവിച്ചതെങ്കിലും, ഹെലികോപ്റ്റർ വെടിയേറ്റാണോ തകർന്നതെന്ന കാര്യം വ്യക്തമല്ല. ഫെഡറൽ ഏവിയേഷൻ അഡ്മിനിസ്ട്രേഷനും (FAA), നാഷണൽ ട്രാൻസ്പോർട്ടേഷൻ സേഫ്റ്റി ബോർഡും (NTSB) അന്വേഷണം തുടങ്ങിയിട്ടുണ്ട്.
വെടിയുതിർത്ത പ്രതിയെ പൊലീസ് പരിക്കുകളോടെ പിടികൂടി. പൈലറ്റ് റോബർട്ട് സ്കാങ്കി 10 വർഷം യു.എസ് മറൈൻ കോർപ്സിൽ സേവനമനുഷ്ഠിച്ച വ്യക്തിയാണ്. മലനിരകളിലെയും വെള്ളത്തിലെയും രക്ഷാപ്രവർത്തനം ഉൾപ്പെടെയുള്ള അതീവ അപകടസാധ്യതയുള്ള സാഹചര്യങ്ങളിൽ പ്രവർത്തിക്കാൻ പരിശീലനം ലഭിച്ചവരാണ് സ്റ്റേറ്റ് ഡിപ്പാർട്ട്മെന്റ് ഓഫ് പബ്ലിക് സേഫ്റ്റിയുടെ ഈ എയർ റെസ്ക്യൂ യൂണിറ്റ്.
Police helicopter crashes in Arizona, pilot and trooper killed.
