ടെഹ്റാൻ: ഇറാനിലെ മുതിർന്ന ഉദ്യോഗസ്ഥരെ ലക്ഷ്യമിട്ടുള്ള തുടർച്ചയായ വധശ്രമങ്ങളും ഭരണതലത്തിലെ അധികാരത്തർക്കവും രാജ്യത്തെ മറ്റൊരു ‘ഉത്തര കൊറിയ’യാക്കി മാറ്റിയേക്കാമെന്ന് ഭൗമരാഷ്ട്രീയ വിദഗ്ധർ മുന്നറിയിപ്പ് നൽകുന്നു. ലണ്ടൻ സ്കൂൾ ഓഫ് ഇക്കണോമിക്സിലെ ഇന്റർനാഷണൽ റിലേഷൻസ് പ്രൊഫസർ ഫവാസ് ഗെർഗസ് ആണ് സിഎൻഎന്നിന് നൽകിയ അഭിമുഖത്തിൽ ഈ ആശങ്ക പങ്കുവെച്ചത്. അമേരിക്കയും ഇസ്രായേലും ചേർന്ന് നാൽപ്പതിലധികം ഉന്നത ഇറാനിയൻ നേതാക്കളെ വധിച്ചതായാണ് അദ്ദേഹം വിലയിരുത്തുന്നത്.
ഫെബ്രുവരി 28-ന് പരമോന്നത നേതാവ് അലി ഖമേനി വധിക്കപ്പെട്ടതിനെത്തുടർന്ന് ഇറാന്റെ നയതന്ത്ര-സൈനിക നീക്കങ്ങൾക്ക് നേതൃത്വം നൽകിയിരുന്ന അലി ലാരിജാനിയും കൊല്ലപ്പെട്ടത് രാജ്യത്ത് വലിയ ഭരണപരമായ ശൂന്യത സൃഷ്ടിച്ചിരിക്കുകയാണ്. ലാരിജാനിയുടെ മരണം ഇറാനിലെ അധികാരം തീവ്രനിലപാടുകാരായ യുവ ഉദ്യോഗസ്ഥരുടെ കൈകളിലേക്ക് മാറാൻ കാരണമായെന്ന് പ്രൊഫസർ ഗെർഗസ് ചൂണ്ടിക്കാട്ടി. യുദ്ധാനന്തര ഇറാൻ കൂടുതൽ വിപ്ലവകരവും തീവ്രവുമായ നിലപാടുകളിലേക്ക് മാറാനാണ് സാധ്യതയെന്നും അദ്ദേഹം നിരീക്ഷിക്കുന്നു.
ഗൾഫ് മേഖലയുടെയും മിഡിൽ ഈസ്റ്റിന്റെയും ഹൃദയഭാഗത്ത് മറ്റൊരു ഉത്തര കൊറിയൻ മോഡൽ രാജ്യം ഉയർന്നുവരുന്നത് തന്നെ അത്ഭുതപ്പെടുത്തില്ലെന്ന് അദ്ദേഹം പറഞ്ഞു. ലോകരാജ്യങ്ങളുമായി സഹകരിക്കാത്ത, കൂടുതൽ ഒറ്റപ്പെട്ടതും എന്നാൽ ആയുധബലത്തിൽ ഊന്നിയതുമായ ഒരു ഭരണകൂടമായി ഇറാൻ മാറുന്നത് മേഖലയിലെ സമാധാനത്തിന് വലിയ ഭീഷണിയാകും. നിലവിലെ സംഘർഷങ്ങൾ അവസാനിച്ചാലും ഇറാൻ സ്വീകരിക്കുന്ന പുതിയ രാഷ്ട്രീയ ശൈലി അന്താരാഷ്ട്ര തലത്തിൽ വലിയ പ്രത്യാഘാതങ്ങൾ ഉണ്ടാക്കുമെന്നാണ് ഈ റിപ്പോർട്ട് വ്യക്തമാക്കുന്നത്.
