വാഷിംഗ്ടൺ: യുഎസ് – ഇസ്രയേൽ സംയുക്ത ആക്രമണത്തിൽ കൊല്ലപ്പെട്ട ഇറാൻ്റെ മുൻ പരമോന്നത നേതാവ് ആയത്തുള്ള അലി ഖമേനിയുടെ പിൻഗാമികളാകാൻ സാധ്യതയുള്ള മിക്കവരെയും ആക്രമണം ഇല്ലാതാക്കിയെന്ന് പ്രസിഡൻ്റ് ഡോണൾഡ് ട്രംപിൻ്റെ വെളിപ്പെടുത്തൽ. ഞായറാഴ്ച രാത്രി എബിസി ന്യൂസ് ചീഫ് വാഷിംഗ്ടൺ കറസ്പോണ്ടൻ്റ് ജോനാഥൻ കാളുമായി നടത്തിയ ഫോൺ സംഭാഷണത്തിലാണ് ട്രംപിൻ്റെ നിർണായക വെളിപ്പെടുത്തൽ.
“ആക്രമണം അതീവ വിജയകരമായിരുന്നു, അത് മിക്ക സ്ഥാനാർത്ഥികളെയും പുറത്താക്കി. നമ്മൾ കരുതിയിരുന്ന ആരും ഇനി വരാൻ പോകുന്നില്ല, കാരണം അവരെല്ലാം മരിച്ചു. രണ്ടാം സ്ഥാനത്തോ മൂന്നാം സ്ഥാനത്തോ ഉണ്ടായിരുന്നവർ കൊല്ലപ്പെട്ടു,” ട്രംപ് പറഞ്ഞു. നേരത്തെ ന്യൂയോർക്ക് ടൈംസുമായി നടത്തിയ മറ്റൊരു ഫോൺ സംഭാഷണത്തിൽ, ഭാവിയിൽ ഇറാനെ നയിക്കാൻ തൻ്റെ പക്കൽ “മികച്ച മൂന്ന് ചോയിസുകൾ” ഉണ്ടെന്ന് ട്രംപ് പറഞ്ഞിരുന്നു. എന്നാൽ അദ്ദേഹം ഇവരുടെ പേരുകൾ വെളിപ്പെടുത്തിയില്ല. എബിസി ന്യൂസിനോട് സൂചിപ്പിച്ച വ്യക്തികൾ തന്നെയാണോ ഇവരെന്ന കാര്യത്തിലും വ്യക്തതയില്ല. യുഎസ്-ഇസ്രായേൽ ആക്രമണങ്ങളുടെ പശ്ചാത്തലത്തിൽ, സർക്കാരിനെ അട്ടിമറിക്കാനും റെവല്യൂഷണറി ഗാർഡിനോട് കീഴടങ്ങാനും ട്രംപ് ഇറാനിലെ ജനങ്ങളോട് ആഹ്വാനം ചെയ്തിട്ടുണ്ട്.
ശനിയാഴ്ചത്തെ ആക്രമണത്തിൽ ഖമേനി കൊല്ലപ്പെട്ടതിനെത്തുടർന്ന് ഇറാൻ്റെ നിയന്ത്രണം ആരുടെ കൈകളിലെത്തുമെന്ന കാര്യത്തിൽ അനിശ്ചിതത്വം തുടരുകയാണ്. ഖമേനിക്ക് വ്യക്തമായ ഒരു പിൻഗാമി ഉണ്ടായിരുന്നില്ല. രാജ്യത്തിൻ്റെ നേതൃത്വത്തിലേക്ക് ആര് വരുമെന്ന് പ്രവചിക്കുക പ്രയാസമാണെന്ന് മുതിർന്ന യുഎസ് ഉദ്യോഗസ്ഥരും അഭിപ്രായപ്പെടുന്നുണ്ട്.
“ആർക്കും ഇതിനൊരു ലളിതമായ ഉത്തരം നൽകാൻ കഴിയുമെന്ന് ഞാൻ കരുതുന്നില്ല,” ഖമേനിയുടെ പിൻഗാമിയെക്കുറിച്ച് സെനറ്റർ ടോം കോട്ടൺ ഞായറാഴ്ച ‘ഫേസ് ദ നേഷൻ’ പരിപാടിയിൽ പറഞ്ഞു. “ഇറാനിൽ ഇപ്പോൾ അധികാരത്തിനായി വലിയ പോരാട്ടം നടക്കുന്നുണ്ടാകാം. പരമോന്നത നേതാവിനെ തിരഞ്ഞെടുക്കുന്നതിന് അവർക്ക് കൃത്യമായ കൂടിയാലോചനകളും നടപടിക്രമങ്ങളുമുണ്ട്. ഒരു പിൻഗാമിയെ മുൻകൂട്ടി നിശ്ചയിക്കാതിരുന്നതിന് പിന്നിൽ ഖമേനിക്ക് കൃത്യമായ കാരണങ്ങളുണ്ടാകാം.”- അദ്ദേഹം വ്യക്തമാക്കി.
“പരമോന്നത നേതാവോ ഭരണകൂടമോ വീണാൽ ഇറാനിൽ അടുത്തത് എന്ത് സംഭവിക്കുമെന്ന് ആർക്കും കൃത്യമായി പറയാനാവില്ലെന്ന് ജനുവരിയിൽ സ്റ്റേറ്റ് സെക്രട്ടറി മാർക്കോ റൂബിയോ പറഞ്ഞിരുന്നു. സിസ്റ്റത്തിനുള്ളിൽ നിന്നുതന്നെ സമാധാനപരമായ ഒരു മാറ്റത്തിന് തയ്യാറുള്ള ആരെങ്കിലും ഉണ്ടാകുമെന്ന് നമുക്ക് പ്രത്യാശിക്കാം എന്നും അദ്ദേഹം വ്യക്തമാക്കിയിരുന്നു.
Potential successors to Khamenei killed in attack; Trump’s shocking revelation
