വാഷിങ്ടൻ : വെനസ്വേലയിൽ ജനുവരി 3ന് നിക്കോളാസ് മഡുറോയെ പിടികൂടുന്നതിനുള്ള സൈനിക നീക്കങ്ങളിൽ യുഎസ് സൈന്യം അത്യാധുനികമോ നിഗൂഢമോ ആയ ആയുധങ്ങൾ ഉപയോഗിച്ചതായി വിദേശ മാധ്യമങ്ങൾ റിപ്പോർട്ട് ചെയ്യുന്നു. സാധാരണ തോക്കുകൾക്ക് പകരം ലേസർ സാങ്കേതികവിദ്യയോ മൈക്രോവേവ് തരംഗങ്ങളോ ഉപയോഗിക്കുന്ന ആയുധങ്ങൾ പ്രയോഗിക്കപ്പെട്ടതായി ചില സൈനികർ അവകാശപ്പെട്ടിരുന്നു. വെനസ്വേലയിലെ വൈദ്യുതി ബന്ധം തകരാറിലാക്കാനും ആശയവിനിമയ സംവിധാനങ്ങൾ തടസ്സപ്പെടുത്താനും നിഗൂഢമായ സൈബർ ആയുധങ്ങൾ ഉപയോഗിച്ചതായി റിപ്പോർട്ടുകളുണ്ട്
വെനസ്വേലയിൽ കടന്നുകയറി ദൗത്യത്തിൽ യുഎസ് ‘നിഗൂഢ ആയുധം’ ഉപയോഗിച്ചതായി മാധ്യമ റിപ്പോർട്ടുകൾ. വെനസ്വേലയിലെ സൈനികരുടെ പ്രതികരണങ്ങളിൽനിന്നാണ് ദൗത്യത്തിൽ യുഎസ് സൈന്യം നിഗൂഢ ആയുധം ഉപയോഗിച്ചതായി വിദേശ മാധ്യമങ്ങൾ റിപ്പോർട്ട് ചെയ്തത്. സൈനികരുടെ മനോവീര്യം തകർക്കാൻ അത്യാധുനിക ഇലക്ട്രോണിക് ഉപകരണങ്ങൾ ഉപയോഗിച്ച് ഭീതി പടർത്തിയതായും ആരോപണമുയർന്നു
പ്രധാനമായും ഡ്രോണുകളും ഹെലികോപ്റ്ററുകളും ഉപയോഗിച്ചാണ് വെനസ്വേലയിൽ യുഎസ് സൈന്യം കടന്നുകയറിയത്. എന്നാൽ ഇവ എത്തുന്നതിനും മുൻപേ ശക്തമായ ആക്രമണം തങ്ങൾ നേരിട്ടുവെന്നാണ് വെനസ്വേലയിലെ സൈനികരുടെ പ്രതികരണം. ഹെലികോപ്റ്ററുകൾ എത്തുന്നതിനു മുൻപേ റഡാറുകൾ നിശ്ചലമായി. തുടർന്ന് തീവ്രമായ ശബ്ദതരംഗം പുറപ്പെടുവിക്കുന്ന അജ്ഞാതമായ ആയുധം യുഎസ് പ്രയോഗിച്ചതായാണ് വെനസ്വേലയിലെ സൈനികർ പറയുന്നത്. ഈ ആയുധങ്ങളുടെ ഉപയോഗം കാരണം വെനസ്വേലൻ സൈനികർക്ക് മൂക്കിൽ നിന്നും വായയിൽ നിന്നും രക്തസ്രാവം ഉണ്ടായതായും, കഠിനമായ വേദനയും ഛർദ്ദിയും അനുഭവപ്പെട്ടതായും ദൃക്സാക്ഷികൾ വെളിപ്പെടുത്തി. ചിലർ തളർന്നുവീണുവെന്നും പറയുന്നു.
യുഎസ് ആക്രമണത്തിൽ (ഓപ്പറേഷൻ അബ്സല്യൂട്ട് റിസോൾവിൽ) ബി-1ബി ലാൻസർ ബോംബറുകൾ, എഫ്-22 റാപ്റ്റർ, എഫ്-35 തുടങ്ങിയ 150-ലധികം വിമാനങ്ങളും ഡ്രോണുകളും ഉൾപ്പെട്ടിരുന്നു.
കാരക്കാസിലെ മഡുറോയുടെ വസതിയിൽ യുഎസ് സേനയുടെ എലൈറ്റ് വിഭാഗമായ ഡെൽറ്റ ഫോഴ്സ് (Delta Force) നടത്തിയ മിന്നലാക്രമണത്തിലാണ് മഡുറോയും ഭാര്യ സിലിയ ഫ്ലോറസും പിടിയിലായത്. മഡുറോയെ പിന്നീട് ന്യൂയോർക്കിലേക്ക് കൊണ്ടുപോയി. ഈ സൈനിക നീക്കത്തിൽ ഏകദേശം 100 വെനസ്വേലൻ സുരക്ഷാ ഉദ്യോഗസ്ഥർ കൊല്ലപ്പെട്ടതായി വെനസ്വേലൻ ആഭ്യന്തര മന്ത്രാലയം സ്ഥിരീകരിച്ചു.
അമേരിക്കൻ അധികൃതർ ഈ നിഗൂഢ ആയുധങ്ങളെക്കുറിച്ച് ഔദ്യോഗികമായി പ്രതികരിച്ചിട്ടില്ലെങ്കിലും, വൈറ്റ് ഹൗസ് പ്രസ് സെക്രട്ടറി ഈ വാർത്തകൾ പങ്കുവെച്ചത് വലിയ ശ്രദ്ധ നേടി
Report: US used ‘mystery weapon’ in mission to capture Maduro.
